Nɛhimaya
8 Mi waŋnda kpou chuuŋgiaŋ diompilɛ o Dio Kpaki Mamɛŋndo hɔlndɔ,+ okoŋ ma dimul Ɛsilua,+ wana ndoo miŋgi diom Mɛlɛkaa poonyiaa wo, le mbo hiŋ a yau laSawa Muuse wo,+ sawala Chɛhowa ke Isɔluɛiya laŋ.+ 2 O paale taseleŋ choo o paŋgii ŋɔmmɛu ve niŋ, mi Ɛsilua wana soliaa lasalaa huŋ a yau laSawaa waŋnda kpou o hɔl,+ wana pɔnɔ ni, wana lanɔ ni, a wana o wana tiuba mbo yaŋ nilaŋ nduyɛ mbo bii bila.+ 3 Okoŋ, mbo veelu diomndaŋ leniŋ choo choo kpeleŋ+ o luŋ Dio Kpaki Mamɛŋndo hɔlndɔ, chɔŋ idiiyo haaa mi paaleŋ le sim o bolleŋ choo. Nduyɛ wana pɔnɔ ni, wana lanɔ ni, a wana o wana ndoo tiuba mbo bii bila, ma yaŋ nilaŋ nyɛkɛndɛi+ o yau laSawaa. 4 Ɛsilua, wana ndoo miŋgi diom Mɛlɛkaa poonyiaa wo wa isisi o biŋ nda toosiaa a yɔmnde le bɔŋaŋ koŋ ndo choo. Nduyɛ wanaa wa ndu isisi ikɛi o ba ndɔ kɛndɔɔ choo wa cho haa ni: Matitiya, Siɛma, Anaaya, Yuulaya, Hilikaya, a Maasɛya. A wa ndu isisi ikɛi o ba ndɔ miallo choo wa cho haa ni: Pɛdaya, Misiayɛɛ, Malikicha,+ Hasium, Hasi-badina, Sɛkalaya, a Mɛsiulam.
5 Mi Ɛsilua kumbi yau laSawaa waŋnda kpou o hɔl, kanifuule o wa isisi o fondaŋ filioŋndo. Nduyɛ mɛɛ o kumbi ndu, mi waŋnda kpou chaŋ ma sim. 6 Okoŋ mi Ɛsilua saŋgala Chɛhowa, Mɛlɛka tonyaa, Mɛlɛka Bɛndoo. Nduyɛ mi waŋnda kpou heelu balaŋ choo choo ma dimi aa, “Amiina!* Amiina!”+ Okoŋ kɔɔli, ma tunduŋ ma beŋ Chɛhowa wulaŋ, ma fuuluu hɔlla lɛŋ. 7 Waŋnda wa isisi, mi Livaiya haa wa nda Sawalaŋ tɛɛsiallo.+ Nda cho ni: Chɛsuaa, Bani, Siɛluɛbaya,+ Chamiŋ, Akubi, Siabɛtai, Hodaya, Maasɛya, Kelita, Asaluaya, Chosabadi,+ Henaŋ, a Pɛlaya. 8 Ma hiau lachi a diomndaŋ veeloo o yau laSawa Mɛlɛka tonyaa niŋ, ma tɛɛsial waŋnda ndu nyɛkɛndɛi, nduyɛ ma chɔm nda nyɛ o sim ndo. Okoŋ, ma mala waŋnda ma bii nyɛ nda wa nda diomndaŋ veelullo wo bila.+
9 Mi Nɛhimaya, o wa masa ibuŋgaa* wo, Ɛsilua+ wana soliaa lasalaa a wana ndoo miŋgi diom Mɛlɛkaa poonyiaa wo, a Livaiyaa wa waŋnda pɛɛkoo wa dimul waŋnda kpou aa: “Paale hauleŋ ndeŋ, paale diandaa leŋ le cho le Chɛhowa Mɛlɛka nyaa ni.+ La nɔ mi la bii imɔnɔ ɔɔ mi la chaŋ te.” Kanifuule waŋnda kpou wa chaŋndaŋ mɛɛ nda tuei nyɛ sawala Mɛlɛkalaŋ la dimi wo. 10 Mbo dimul nda aa: “La kɔ mi la kɔ dio nyɛdiaala nyala kɛndɛlaŋ,* mi la kol muɛima nyama yeelɛiyaŋ, nduyɛ mi la ke wanaa nɔ nyɛ o nyɛ le wa nyɛdiaa nya toosiaa wo o tiŋ.+ Paale hauleŋ ndeŋ, paale diandaa leŋ le cho le Masanɔ naa ni. Lelaŋ la tambu kɔl te, kanifuule kɔl kɛndɛ Chɛhowa wo cho yoomuma nyaŋ* ni.” 11 Livaiya wa waŋnda kpou nyɔɔloo ma dimul nda aa: “La mei! Kanifuule, paale diandaa leŋ le cho leŋ hau ni. Lelaŋ, la tambu kɔl te.” 12 Okoŋ mi waŋnda kpou kua le ma kɔ dio, ma kol, ma ke wanaa nɔ nyɛ le wa nyɛdiaa nda toosiaa wo o tiŋ, nduyɛ ma dɔɔnuŋ nyaale tau tau.+ Kanifuule, ma bii nyɛ nda wa nda tɛɛsiallo wo bila nyɛkɛndɛi.+
13 O paale diiŋ ndɔ leŋ choo, mi yuŋgula leboltaŋ le waŋnda kpou, wanaa soliaa lasalaa, a Livaiya chuuŋgiaŋ naapilɛ, ma kua naa Ɛsilua wana ndoo miŋgi diom Mɛlɛkaa poonyiaa wo chua, le ma chɔɔlu sawala Mɛlɛkalaŋ sina. 14 Ma saaluŋ o sawala Chɛhowa ke Muuse laŋ niŋ maa Isɔluɛiya nɔ ma wa o bafɛilaŋ* niŋ, a teleŋ bɔŋaŋ laBafɛiyo o paŋgii ŋɔmmɛu ve niŋ.+ 15 Nduyɛ maa a nɔ ma yonda+ o chieeŋ ndaŋ bɛndoŋ niŋ kpou a o Chulusalɛm niŋ aa: “La kɔ o fondaŋnda ŋpembulaŋ, mi la kɔ kiolu lɛuwuŋ yɔmii ɔlifiive, yɔmii machuɛiye, yɔm matɔɔ wo, siɔɔla waulaŋ, a lɛuwuŋ yɔmii cheleŋ, mi la huŋ toosiaa bafɛilaŋ, a mɛɛ i cho i poonyiaa yɛ.”
16 Okoŋ, mi waŋnda kua ma kɔ huŋ a lɛuwuŋ muŋ, ma toosiaa bafɛilaŋ le ndapila o chiɛila ndalaŋ choo a o luŋnda ndalaŋ. Ma toosiaa vɛlɛ bafɛilaŋ o luŋ chiɛi Mɛlɛka tonyaa,+ luŋ Dio Kpaki Mamɛŋndo,+ a o luŋ Dio Kpaki Ifiluem Ndo.+ 17 Mi Isɔluɛiyaa fula o chɛleŋ niŋ kpou ma miiŋgu wa toosiaa bafɛilaŋ, nduyɛ ma wa leniŋ. Chɔŋ a teleŋ Chɔɔsuaa+ po Nuŋ ndo haaa mbo huŋ bii a boondii keŋ, Isɔluɛiya ndaa tosa wɔ ndi lende le. Le hei, mi waŋnda duaunuŋ nyaale tau tau.+ 18 Nduyɛ chɔŋ paale taseleŋ haaa paale mɛɛlaaleŋ, a wa diomndaŋ veeloo lepaa o lepaa o yau laSawa Mɛlɛka tonyaa niŋ.+ Nduyɛ ma bii bɔŋaŋndo le palɛi i ŋɔmmɛu. O paale ŋɔmaa leŋ choo, ma bii bɔŋaŋ teŋgeŋndo, a mɛɛ sawaa dimi yɛ.+