Chondii Sɔlɔmɔŋ Nde
8 “Te ndoo yɔŋ pɛ maa yema nuu ŋ cho ni,
O wɛi mɛɛma kala nuu wo,
Te yaa saaluŋ num pɛ o bɛɛ, I wa num sondoo sɔsa,+
Nduyɛ wana o wana ve ya tul leyɛ le!
I wa num muɛima chuŋ kɛndɛ kɛndiaŋ ke le ma kol,
A nyɛma yeelɛima nda toosiaa a pɔmɛkilanetiiyaŋ ndaŋ.
3 Ba ndɔ miallo cho ya wa o bolleŋ bɛŋgu,
Nduyɛ mi ba ndɔ kɛndɔɔ kɔmaŋ ya.+
4 Nya chuaa laanduaa Chulusalɛm, la mɛnaŋ o ya lo:
La kindiŋ le ya kaalaa tindioo ɔɔ kpeeŋiaa niŋ te, haaa mi che kaala kpeekpeiyo.”+
5 “Nɛɛnɛ cho yɛ koŋ hunɔɔ o pollo niŋ nda,
Mbo yɛŋgbaŋ wana o kaala wo choo?”
“O yɔm apuiyo bɛŋgu ya tindi num o luaŋ ni.
Loŋ pulii vialɛi wa kala num nɛiyo ni,
Teleŋ o wa a foli* numndo wo.
6 Kɛsiŋ ya o kɔl maa kelɛi nda handu tamasioo ve,
Nduyɛ ma bii ya o ba mɛɛ kelɛi nda handu tamasioo ve cho yɛ.
Kanifuule mɛɛ piɔmndo nɔ kpaayaa yɛ, lende koni kaalaa bɛɛ nɔ kpaayaa ni.+
Nduyɛ yeemɛi waŋndo nɔ le wana o kaala wo holnɔŋndo ve nɔ kpaayaa mɛɛ Sɛiyo* nɔ kpaayaa yɛ.
Kaala waa nuaa cho ko maa yiŋnde bɛndule cho sandei leŋ, yiŋnde Chɛhowa leŋ.+
7 Mɛɛ mɛɛ mɛŋndaŋ ma wa, ma nɔla kaala waa nuaa nyumi le,+
Kɛlɛŋgaa niŋ te mi peela bɛndulaŋ la hiou a ndu.+
O yɔŋ bɛɛ mi waŋndo yɔŋgu sul ndɔɔ kpou o ndu lo chiɛiniŋ le kaala waa nuaa piondɔɔ,
Pɛɛsaa koni nda pɛɛsa ndu ni.”
8 “Ŋ nɔ yema naa pɔmbɔɔ,+
Kɛ mɛɛma cho wɔ ndu o ibuŋ te.
Yɛɛnɛ naŋ cho yɛ tosa le yema naa,
Paale waŋndo cho fula le ndu chuaa o nɔɔ niŋndeŋ?”
9 “Te o yɔŋ pɛ maa kpakioo o cho ni,
Ŋ cho kpaki kala kalaa taŋgul ndu choo a kanii humbuei.
Kɛ te o yɔŋ pɛ maa dioo o cho ni,
Ŋ cho ndu bɛɛndiaa nyɛkɛndɛ kɛndɛ a yɔm sida wo.”
10 “Kpakioo ya cho ni,
Nduyɛ mɛɛma niaŋ ma cho maa bandula vilɛi.
Lelaŋ te o nua ya pɛ,
Mbo che kɛsɛ maa wana cho o kɔl nyuloo niŋndo ya cho ni.
11 Sɔlɔmɔŋ ndoo nɔ kpele makilepiiyo+ Baal-hamɔŋ.
Mbo ke ndu waŋnda le ma wa wallo leniŋ.
Mi o kɛ kɛ ndoo hiŋ a kaniŋ humboŋ waapilɛ le kɔmnde ndɔleŋ.
12 Sɔlɔmɔŋ nɔ kaniŋ humboŋ waapilɛ,
Mi wanaa cho kpeloo mandaa wa nɔ kɛmɛ lediiŋ.
Kɛ ya I nɔ kpele makilepiiyo, nduyɛ le yapilɛ kpe o cho ni.”
13 “Num cho hoo o kpelelaŋ niŋndo,+
Chaaŋaa niaa yeema ma tuei num diom.
I yeema mi tuei num diom.”+
14 “Num wana ya kaala wo, keleŋa hunɔɔ,
Nduyɛ ma nyaanuŋ chɔ chɔ mɛɛ puuwɔɔ,+
Ɔɔ kial chuaa nyaanuŋ nuaa,
O pembuŋ nɔ tɔlɔɔla chuŋ kɛndɛlaŋ ndoŋ choo yɛ.”