Walta Kiilaa

18 Okoŋ kɔɔli, mi Pɔɔl faŋaŋ Atɛŋ mbo kua Kɔliŋ. 2 Mbo komal Chuunɔ pilɛ loŋ diolaŋ aa Akuila.+ Wana waa Pɔŋtɔɔ o wa ni. Nda Pilisila laa ndɔ ndaa hiŋ ko sɛnɛi fulaa o lɛŋnde Itali leŋ niŋ. Kanifuule, Kulɔdiɔɔ ndoo dimi ni maa Chuuwa kpou faŋaŋ Luom. Mi Pɔɔl kua o nda lo. 3 Tɛndiilaŋ Pɔɔl ndoo toosiaa ni. Akuila nda Pilisila bɛɛ, wali pilɛ koŋ kpe ndaa tosa ni. Le hei, mi Pɔɔl kua o nda lo ma wa tɛndiilaŋ toosiaa latulu.+ 4 O paale pɛŋgiaale kɛ kɛ+ choo, mi ndoo yɔŋgu suɛi o chiɛi Chuuwa piɛi Mɛlɛka wo niŋ.+ Nduyɛ, mi ndoo muli Chuuwa a Kilikiiya kɔltaŋ le ma laalaŋ.

5 Mɛɛ Sailaa+ nda Timoti+ chɛŋ Masidooniaa ma huŋ, mi Pɔɔl chua teleŋ ndɔɔ kpede le waŋnda suɛi Mɛlɛkɛi pɛɛkoo. O wa Chuuwa yooŋgu kɛndɔɔ dimullo le chɔmndo maa Chiisu cho Kiliti ni.+ 6 Kɛ mɛɛ nda simul Pɔɔl, nduyɛ ma wa ndu diomnda wɔɔŋndaŋ dimullo, mbo kuaŋ doma ndɔɔ.+ Mbo dimul nda aa: “Kooma nyaŋ ma cho nyapila o lebol.+ Tɔɔyaŋ o tɔɔyaŋ cho ya choo le.+ Chɔŋ a hau mbo kuɛ kɛ, o wanaa cho ŋChuu le wa lo ya cho lakɔ ni.”+ 7 Okoŋ mbo faŋaŋ loŋ,* mbo kua o chiɛi po pum diolaŋ aa Tisiɔɔ Chɔsitɔɔ. Mɛlɛka ndoo piɛi ni, nduyɛ chiɛi ndɔɔ wa o chiɛi Chuuwa piɛi Mɛlɛka wo ikɛi. 8 Mi Kilisipɔɔ,+ wana bɛndoo o chiɛi Chuuwa piɛi Mɛlɛka wo niŋ, nda yuŋgu ndɔɔ kpou simnuŋ wanaa laalaŋnda o Masanɔɔ niŋ. Nduyɛ mi Kɔliŋtiaŋaa bɔɔbɔɔ tuei yooŋgoo wa simnuŋ wanaa laalaŋnda, ma sɔla yiŋɔɔ. 9 Nyumma pilɛ, mi Masanɔɔ dimul Pɔɔl o yilaŋnde niŋ aa: “Yɔŋ isiooŋ te. Hiou lachi a suɛi. Wu ŋdial te. 10 I cho a num latulu.+ Wana o wana cho num nyɛ yɔŋ te, kanifuule I nɔ waŋnda tau chiee nanuŋ.” 11 Okoŋ, mi Pɔɔl chii loŋ wɔsioo o pilɛ a paŋgoŋ ŋɔmpum. O wa nda diom Mɛlɛkaa pɛɛkoo.

12 Boondii Kaalioo wa masa ibuŋgaa le Akeya wo, mi Chuuwa chɛlaŋ, ma bii Pɔɔl. Okoŋ ma kua a ndu le ma kɔɔsa a ndu. 13 Ma wa dimioo aa: “Poo hoo cho waŋnda kɔltaŋ mulioo le ma piɛi Mɛlɛka, kɛ o cho a mɛɛ sawaa dimi yɛ le.” 14 Mɛɛ Pɔɔl hiŋ le suɛi, mi Kaalioo dimul Chuuwa aa: “Te ndoo wa pɛ aa suɛi wɔɔŋnde ɔɔ sawa lelɛŋndo o tɛɛmbuu ni, I wa biunɔŋ mi yaa yaŋ nya nilaŋ. 15 Kɛ le mɛɛ o cho diomnda hiŋa hiŋaŋndaŋ o sɔɔŋ choo, diola waŋnda, a o sawa nyaa choo yɛ,+ nyapila kɔ toosiaa ndi. I yeema mi wa wana kialaa ŋyama le sɔɔŋ muŋ te.” 16 Okoŋ, mbo tuau nda le ma faŋaŋ o fondaŋ kialaa ŋyamaa. 17 Mi nda kpou bii Sɔsitini,+ wana bɛndoo o chiɛi Chuuwa piɛi Mɛlɛka wo niŋ. Ma kandu ndu lɔɔ o fondaŋ kialaa ŋyamaa hɔlndɔ. Kɛ Kaalioo mulul nda bɛɛ le.

18 Mɛɛ Pɔɔl chɔɔlu viouwɔɔ loŋ le palɛi i tiŋ, mbo choŋguŋ puaapiliaa, mbo luɛi o dɛndɔɔ niŋ mbo kua Siiliaa. Mi Akuila nda Pilisila liila ndu. Pɔɔl wa Sɛŋkiliaa mbo sendi,+ kanifuule ndoo chua buŋgɛi o Mɛlɛka lo. 19 Mɛɛ nda fuuluu Ɛfisɔɔ, mbo mɛi nda loŋ. Kɛ mbo luɛi o chiɛi Chuuwa piɛi Mɛlɛka wo niŋ, mbo dimul Chuuwa diom Mɛlɛkaa.+ 20 Mi che bɛɛ a wa Pɔɔl nyɔɔloo le mbo chɔɔlu viouwɔɔ loŋ, kɛ o chɛl te. 21 Mbo choŋguŋ nda aa: “Te Chɛhowa* chɛl pɛ, I cho vɛlɛ miiŋgu naa nya chua.” Mbo luɛi o dɛndɔɔ niŋ, mbo faŋaŋ Ɛfisɔɔ 22 mbo kua Sisaliaa. Chɔnɔŋndo loŋ, mbo kua Chulusalɛm mbo kɔ yil kunda wanaa laalaŋnda loŋ. Fulaa loŋ, mbo kua Aŋtiɔɔ.+

23 Mɛɛ o viou loŋ le teleŋ tiŋ, mbo faŋaŋ loŋ mbo balu wanaa laalaŋnda kpou yoomuaŋ lueiyo+ o fondaŋnda yɛ yɛlaŋ o Kaleesiaa niŋ a Filichiaa.+

24 Mi Chuunɔ pilɛ kua Ɛfisɔɔ diolaŋ aa Apɔlɔɔ,+ violɔŋ waa Alɛkisandiliaa. Ndoo chaa bɔɔ suɛi. Nduyɛ ndoo sina nyɛ cho o Yau Mɛlɛkaa niŋndo tau. 25 Mi poo hoo sɔla pɛɛkoo o nɛi Chɛhowa* wo choo. Nduyɛ mi nyina Mɛlɛkaa tosa mbo nɔ dialuŋ fulaŋ tau, mbo wa waŋnda pɛɛkoo nyɛkɛndɛi a sɔɔŋ cho a Chiisu okɔɔ woŋ. Kɛ a yiŋɔɔ Chɔŋ ndo okɔɔ kinɛi ndoo sina wɔ ni. 26 Mbo kandu waŋnda pɛɛkoo a dialuŋ fulaa o chiɛi Chuuwa piɛi Mɛlɛka wo niŋ. Mɛɛ Pilisila nda Akuila+ tuei ndu, ma kua a ndu o lesɔŋgi ma tɛɛsial ndu nɛi Mɛlɛkaa nyɛkɛndɛ kɛndɛi. 27 Le mɛɛ Apɔlɔɔ ndoo yeema mbo kuɛ Akeya yɛ, mi puaapiliaa Ɛfisɔɔ poonyial wanaa laalaŋnda Akeya yauwo le ma bii Apɔlɔɔ nyɛkɛndɛi. Mɛɛ o fuuluu loŋ, mbo mala wanaa Mɛlɛka tosal kɛndɛi nduɛi bɛnduei ma simnuŋ wanaa laalaŋnda wa tau. 28 Le mɛɛ o wa suɛi a dialuŋ fulaa yɛ, mbo chɔm kpendekele maa pɛɛkula Chuuwa la ve tonya le. O wa nda chɔmndo o Yau Mɛlɛkaa niŋ maa Chiisu cho Kiliti ni.+