Ikilisiaati

4 Mi handu vɛlɛ kɔllo o nyɛkindilaa kɛ kɛ nda wa waŋnda chieeya handɔɔ choo o chieeŋndo choo. Mi cha wanaa nda wa nyɛkindilaa tusioo choo wa mɛmiaŋ tusioo kpasu kpasu, kɛ wana o wana ve le nda kɔllo dɛɛniaa le.+ Nduyɛ wanaa wa nda nyɛkindilaa handɔɔ choo wa ndaa nɔ kpaayaa, kɛ wana o wana ve le nda kɔllo dɛɛniaa le. 2 Mi cha maa wanaa vi niŋnda cho fisa mbo hiau wanaa cho yoomu wa.+ 3 Kɛ kundala tiɔɔŋndaŋ ndaŋ kpou, a viluŋ ndɔ le wa hiou vɛlɛ wa fisa a nda.+ Kanifuule, nda chi wɔ sɔɔŋ kindilaŋ cho yɔŋnɔŋndo o chieeŋndo choo woŋ te.+

4 Mi cha vɛlɛ mɛɛ waŋnda chieeya cho sɛmbɔɔ dɔwɔɔ,* nduyɛ ma wa taasioo soliŋndo kpeku le kilulaŋndo o wallo niŋ yɛ.+ Hei bɛɛ, nyɛ fondoo fuu i cho ni, mɛɛ waŋndo wa nuaa hueiye nyaanɔŋndo kɔɔli yɛ.

5 Diɔmndo, dialuŋ ndɔŋ wa tambei* mbo kafala balaŋ.+

6 O bɛnda mi wana tosa wallo nyɛɛmbɔ ma pɛŋgi, mbo hiau yiŋnɔŋndo o wallo niŋ a pɛŋgi le. Hei bɛɛ cho ko mɛɛ waŋndo wa nuaa hueiye nyaanɔŋndo kɔɔli yɛ.+

7 Mi handu vɛlɛ kɔllo o suɛi fonduei cheleŋ cho yɔŋnɔŋndo o chieeŋndo hoo choo ve: 8 Waŋndo cho, ndupilɛ kpe cho ni. O nɔ ichaŋya le, o nɔ po le, o nɔ iwanaya le, kɛ teleŋ o teleŋ o cho o tuandaŋ o wali ndɔɔ niŋ. Lɔɔlɔɔ o hini kɔl a sullo le.*+ Kɛ kani bɛɛ o nyunaŋ niŋ pa aa, ‘Le nɛɛnɛ ya cho yɛ wallo tosaa kalaŋ, nduyɛ mi wa yapila taunɔŋndo a nyɛm kɛndɛ kɛndɔŋ’?+ Hei bɛɛ nyɛ fondoo fuu i cho ni, nduyɛ kɔl tambɛiyo koni wali waa nuaa chuu wana ni.+

9 Wanaa ŋiɔɔŋ bɛnda mbo hiau wana pilɛ.+ Kanifuule, ma sɔla fulamakɔɔli kɛndɔɔ* le wali kala kala nda tosa wo. 10 Te o pilɛ del pɛ, waŋndo o pilɔɔ mala chaaŋ ndɔ o sim. Kɛ te waŋndo wa pɛ ndupilɛ mbo del, yɛɛnɛ yɔŋnuŋ yɛ ndu te o nɔ wana mala ndu mbo sim ndo le?

11 Okoŋ kɔɔli, te wanaa ŋiɔɔŋ hini pɛ, ma sinaŋ lafuu. Kɛ vɛɛ wana cho ndupilɛ wo sinaŋ yɛ lafuu? 12 Waŋndo nɔla mbo tiu wana pilɛ ba, kɛ wanaa ŋiɔɔŋ nɔla ma simul ndu. Nduyɛ yoole cho le kpeendaa a yuei i yaa leŋ, wana nɔla leŋ kiolɔɔ chɔ chɔ le.*

13 Poombɔ feleŋgɔnɔ bala fondo nɔ taasioo wo bɛnda, mbo hiau masa idiɔm cho niŋ o yuwɛi,+ o yeema lɛ mbo yaŋ nilaŋ o silaa le wo.+ 14 Kanifuule mbo* fula o chiɛi manyumndo niŋ le mbo simnuŋ masaa,+ mi che bɛɛ o bala fondolaŋ niŋ o veluŋ ni teleŋ masa yuwɛi koŋ wa o masaleŋ choo wo.+ 15 I che niŋ nyɛ yɔŋnuŋ a wanaa cho yoomu ma wa balɔŋndo o chieeŋndo hoo choo wa, vɛlɛ a nyɛ yɔŋnuŋ poombɔ feleŋgɔnɔ chua foofo wana cheleŋndo wo. 16 Mi che bɛɛ wanaa toolu ndu wa chuu kɔɔli le, kɛ wanaa cho hunɔɔ o nda kɔɔli wa hini niŋ kɔl a ndu le.+ Hei bɛɛ nyɛ fondoo fuu i cho ni, mɛɛ waŋndo wa nuaa hueiye nyaanɔŋndo kɔɔli yɛ.