Maatiu
2 Mɛɛ nda velu Chiisu Bɛtilɛhɛm+ o Chudiaa niŋ a boondii Hɛlɔɔ*+ wa masaa ve, mi wanaa pɛɛku a looŋ okɔɔ wa* chaŋ ba paaleŋ le chaŋ ndo ma huŋ Chulusalɛm. 2 Ma nyuna aa: “Kuɛɛnɛ poombɔ nda velu wo cho yɛ, o cho wa masa Chuuwa wo?+ Kanifuule, ŋ wa ba paaleŋ le chaŋ ndo, miŋ cha luei a violɔŋ ndɔɔ okɔɔ. Le hei, ŋ hiŋ le miŋ ke ndu bɛɛleŋ.”* 3 Mɛɛ Masaa Hɛlɔɔ tuei hei, mi siooŋii bɛnduei bii ndu a waŋnda Chulusalɛm kpou. 4 Okoŋ, mbo chuuŋgiaa masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda. Mbo nyuna nda le naa Kiliti* nɔ le violɔŋndo wa. 5 Ma muli aa: “Bɛtilɛhɛm+ o Chudiaa niŋ. Kanifuule, mi wana suaa le Mɛlɛka wo poonyiaa aa: 6 ‘Oo num Bɛtilɛhɛm o lɛŋnde Chuda leŋ niŋ, a cho chiee kɛɛ wa o sɔvɛ o chieeŋ lemasaŋ cho o lɛŋnde Chuda leŋ niŋndoŋ tɛɛŋ te. O num niŋ masaa cho violɔŋ ni, nduyɛ ndu manda niŋ wanaa niaa ni, Isɔluɛiya.’”+
7 Okoŋ, mi Hɛlɔɔ veelu wanaa pɛɛku kaŋ a looŋ okɔɔ wa sɔɔ sɔɔ, mbo nyuuniaa nda le sinaa boondii kpeekpei luei hei fula o halaa niŋnde. 8 Mɛɛ o wa nda viomɔɔ Bɛtilɛhɛm, mbo dimul nda aa: “La kɔ nuuviaa nyɛkɛndɛ kɛndɛi naa poombɔ koŋ cho wa. Te la saaluŋ ndu pɛ, la huŋ doonuŋ ya kona, le halikpeŋ mi ya bɛɛ kɔ ke ndu bɛɛleŋ.” 9 Mɛɛ o dimul nda lende, ma chaŋ kɔlaŋ. Okoŋ, mi luei nda che teleŋ nda wa ba paaleŋ le chaŋ ndo wo,+ i lo nda kɔlaŋ lachi haaa mi i kɔ sim o fondaŋ kpeekpei poombɔɔ wa wo. 10 Mɛɛ nda che luei hei, ma duaunuŋ nyaale tau tau. 11 Mɛɛ nda luɛi chiɛiniŋ, ma cha poombɔɔ nda Meele kala ndɔ. Ma beŋ ndu wulaŋ le ndu bɛɛleŋ kioo. Okoŋ kɔɔli, ma soli kooliiyoŋ, a filaŋkiŋsɛŋ, a nyɛm chuŋ kɛndɔŋ* ŋpum ma ke ndu. 12 Kɛ le mɛɛ Mɛlɛka sila nda o lɔma sɔlaŋ niŋ+ maa a miiŋgu lɛ naa Hɛlɔɔ chua le yɛ, ma keekuŋ a nɛi cheleŋ ma miiŋguŋ o lɛŋnde ndaleŋ niŋ.
13 Mɛɛ nda kuɛŋnuŋ, mi maalikɛinɔ Chɛhowa* wo fula Choosɛ o hɔl o lɔma sɔlaŋ niŋ.+ Mbo dimul ndu aa: “Chɔŋ ma chua poombɔɔ nda kala ndɔ mi la nyaanuŋ Ichipi. La lo loŋ haaa mɛɛ mi dimul num maa la faŋaŋ loŋ. Kanifuule, Hɛlɔɔ cho chɔnɔŋ poombɔɔ hoo nuuviaa le ndu diyɔɔ.” 14 Okoŋ, mi Choosɛ chua poombɔɔ nda kala ndɔ a nyumndaŋ ma kuaŋnuŋ Ichipi. 15 A lo loŋ haaa mi Hɛlɔɔ wu. Mi nyɛ yɔŋnuŋ hoo wo peelu nyɛ wana suaa le Chɛhowa* wo dimi wo aa: “I veelu po nuu le mbo faŋaŋ Ichipi.”+
16 Mɛɛ Hɛlɔɔ saaluŋ maa wanaa pɛɛku a looŋ okɔɔ wa hui ndu, mbo duaunuŋ tumbe tau tau. Mbo viam waŋnda maa a diu puaambuaa pɔmbuaa kpou Bɛtilɛhɛm a o tanda koŋ niŋ. Chɔŋ a puaambuaa nda velu sɛnɛiya mbo kɔ bii a puaambuaa wa wɔsilaŋ la tiɔɔŋ nda. Kanifuule, boondii keŋ wanaa pɛɛku a looŋ okɔɔ wa chɔm ndu ni.+ 17 Mi hei peelu nyɛ Chɛluimaya, wana ndoo suaa le Mɛlɛka wo dimi wo. Mbo dimi aa: 18 “Waŋndo mal yioo kpeleŋ Luama chiee. Luechɛɛ+ cho chaŋndo le chuauwaa nduaa. O cho chaŋndo kpeekpei o nyɔɔluŋ te, kanifuule chuauwaa nduaa chuu paku.”+
19 Mɛɛ Hɛlɔɔ vi, mi maalikɛinɔ Chɛhowa* wo fula Choosɛ o hɔl o lɔma sɔlaŋ niŋ+ Ichipi. 20 Mbo dimul ndu aa: “Chɔŋ ma chua poombɔɔ nda kala ndɔ mi la miiŋgu o lɛŋnde Isɔluɛi leŋ niŋ, kanifuule wanaa wa ndu nuuviaa le ndu diyɔɔ wa a vi.” 21 Okoŋ, mbo chua poombɔɔ nda kala ndɔ ma miiŋgu o lɛŋnde Isɔluɛi leŋ niŋ. 22 Kɛ mɛɛ Choosɛ tuei maa Akelɔɔ, po Hɛlɔɔ wo miiŋgu o masaleŋ choo Chudiaa ni, mi siooŋnde bii ndu le miiŋgoo loŋ. Mɛɛ o sɔla nɛi chɔmaa Mɛlɛkaa o lɔma sɔlaŋ niŋ,+ mbo kuaŋnuŋ o lɛŋnde Kalili leŋ niŋ.+ 23 Okoŋ, mbo kɔ chal Naasaluɛi chiee+ le mi nyɛ wanaa suaa le Mɛlɛka wa dimi wo peeluŋ. Ndu cho ni: “A veelu niŋ ndu aa Naasaluɛinɔɔ.”*+