Maatiu
22 Mi Chiisu suaa vɛlɛ o nda lo o talelaŋ niŋ aa: 2 “Masale Mɛlɛkaleŋ o choo choo niŋ le cho ko maa masa toosiaa nyɛdiaa tau le nɔ kɛsiaa+ po ndɔɔ wo. 3 Okoŋ, mbo viam buɛiyaa nduaa le ma kɔ veelu wanaa ndoo yooŋgu le nɔ kɛsiaa hoo wa. Kɛ a chɛl le hunɔɔ le.+ 4 Mbo viam vɛlɛ buɛiyaa cheleŋ aa, ‘La kɔ dimul wanaa ya yooŋgu wa aa: “I chii nyɛdiaa toosiaa, mi dii nauwaa tooyiaa a chɔluaa niaa chelulɛiya. Nduyɛ nyɛ o nyɛ chuu bɛɛndiaa. La huŋ le nyɛdiaa nɔ kɛsiaa.”’ 5 Kɛ a saalaŋ nda le. Mi o pilɛ kuaŋnuŋ o chiɛi nduɛi niŋ, mi hoo kuaŋnuŋ yulale ndɔ.+ 6 Kɛ mi a tuaa bii buɛiyaa nduaa, ma luaa nda nduyɛ ma diu nda.
7 “Mi masaa tuulu kɔl tau tau, okoŋ mbo viam puaa nduaa chɔuwa ma kɔ diu wanaa diu kaŋ buɛiyaa nduaa wa, ma luam chiee ndaa.+ 8 Okoŋ kɔɔli, mbo dimul buɛiyaa nduaa aa, ‘Nyɛdiaa nɔ kɛsiaa chuu bɛɛndiaa, kɛ wanaa ya yooŋgu wa ndaa suliŋ le ndu dio le.+ 9 Lelaŋ, la kɔ o nɛila bɛndulaŋ mi la kɔ veelu wana o wana nya che pɛ loŋ le nyɛdiaa nɔ kɛsiaa.’+ 10 Mi buɛiya haa kua o nɛila bɛndulaŋ, ma kɔ veelu wanaa nda saaluŋ nda kpou, wana kɛndɛ ni, wana wɔɔŋ ni. Nduyɛ mi toŋgo nɔ kɛsiaa pia cha a wanaa hiŋ le nyɛdiaa dioo wa.
11 “Mɛɛ masaa luɛi le mialaa hiŋ nda tofaa, mbo cha poo nda tɛɛŋ, o ndoo wounuŋ doma nɔ kɛsiaa le wo. 12 Mbo nyuna ndu aa, ‘Poo, vɛɛ ŋ looku yɛ luɛiyɔɔ nanuŋ a wounuŋ doma nɔ kɛsiaa le?’ Bakoo bɛɛ o suu le. 13 Okoŋ mbo dimul buɛiyaa nduaa aa, ‘La yii ndu balaŋ a peloŋ, mi la viou ndu o bɛɛ o nyumndaŋ niŋ. Loŋ o wa niŋ koŋullo a chiŋndoŋ sɔmndo ni.’
14 “Kanifuule wanaa bɔɔbɔɔ sɔla veeloo ni, kɛ atiŋ koni hɛliŋ ni.”
15 Okoŋ mi Falisiiya kua, ma kɛɛsiaa le ndu yaŋɔɔleŋ yeŋndo le halikpeŋ ma bii ndu a nyɛ o wa dimi wo.+ 16 Le hei, ma viam buɛiyaa ndaa a waŋnda o kunda Hɛlɔɔ wo+ choo naa Chiisu chua. Ma dimi aa: “Wana Pɛɛkaa, ŋ sina maa a cho sakpo, nduyɛ tonya cho a Mɛlɛka okɔɔ wo ŋ pɛɛku waŋnda ni. A tosa sɔɔŋ le mi waŋnda hɛnaŋ a num te, nduyɛ o cho mɛɛ waŋnda chieeya cho yɛ le ŋ nua le. 17 Dimullɔ naa, baa o bɛnda pa miŋ mal paawaa* le Siisa* ɔɔ o bɛnda le?” 18 Kɛ mɛɛ Chiisu sina yiyaŋnda ndala wɔɔŋndaŋ, mbo dimi aa: “Nya wanaa mulu muluaŋnda haa, le yɛɛnɛ nya cho yɛ ya yaŋɔɔleŋ yeŋndo? 19 La chɔm ndɔ ya kanii* nda mal paawaa ve.” Ma chuu ndu dinaluɛiye.* 20 Mbo nyuna nda aa: “Hɔlaa nɛɛnɛ a diola nɛɛnɛ la cho yɛ laŋ lechoo?” 21 Ma muli aa: “Siisa.” Okoŋ mbo dimul nda aa: “Mɛɛ la ke Siisa nyɛ cho le Siisa wo, mi la ke Mɛlɛka nyɛ cho le Mɛlɛka wo.”+ 22 Mɛɛ nda tuei hei, mi kɔndɔfillo bii nda, nduyɛ ma faŋaŋ ndu kɔɔli ma kuaŋnuŋ.
23 O paale leŋ choo, mi Sadusiiya, a dimi maa wanaa vi wa miiŋgu lɛ niŋ yoomu le wa+ huŋ nyuna ndu aa:+ 24 “Wana Pɛɛkaa, mi Muuse dimi aa: ‘Te waŋndo nɔ pɛ lanɔɔ okoŋ mbo vi kɛ o vilu chua a ndu le, pɔmbɔ ndɔ ɔɔ bɛ ndɔ nɔ mbo chua lanɔ koŋ o nɔɔ niŋ le mbo vilul wana vi wo chuauwa.’+ 25 Puaa pum wa naa tɛɛŋ nda ŋɔmmɛu, pɔmbɔɔ a bɛndoo waa nda wa ni. Mi o tasoo yil lanɔɔ, kɛ o vilu le mbo wu. Mi pɔmbɔ ndɔ loo lanɔ koŋ. 26 Mi nyɛ pilɛ koŋ kpe yɔŋnuŋ a o diiŋ ndɔɔ, o yaa ndɔɔ, haaa nda ŋɔmmɛu kpou. 27 O mɛɛlulaŋ kpɔŋ, mi chuaa bɛɛ wu. 28 Te nda kpou huŋ miiŋgu pɛ yoomu, lanɔɔ nɛɛnɛ chuaa hoo wa yɛ niŋ? Kanifuule, nda ŋɔmmɛu kpou mi chuaa hoo keeku nda o ba o nɔɔ niŋ.”
29 Mi Chiisu mulul nda aa: “La bendu nɛiyo, kanifuule la sina nyɛ Yau Mɛlɛkaa dimi wo le, kɛlɛŋgaa kpaaya Mɛlɛkaa.+ 30 Te waŋnda huŋ miiŋgu pɛ yoomu, a chue lɛ niŋ ŋlaandu kɛlɛŋgaa ŋpiaandu le. A cho simnɔŋ maa maalikɛiya o choo choo niŋ.+ 31 Nyɛ Mɛlɛka dimul nya a miiŋgoo yoomu okɔɔ wo, baa la nuewɔ ndu le? Mbo dimi aa: 32 ‘Ya cho Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo ni.’+ O cho Mɛlɛka ŋwaŋ vilɛi le, kɛ Mɛlɛka wanaa cho yoomu wa.”+ 33 Mɛɛ faŋgaa tuei hei, mi kɔndɔfillo bii nda a mɛɛ o pɛɛku yɛ.+
34 Mɛɛ Falisiiya tuei maa Chiisu kinda Sadusiiya sondolaŋ, ma chuuŋgiaŋ naapilɛ. 35 Mi wana pilɛ nda tɛɛŋ, o ndoo sina Sawala Mɛlɛkalaŋ tau wo kindiŋ le ndu yaŋɔɔleŋ yeŋndo. Mbo nyuna ndu aa: 36 “Wana Pɛɛkaa, sawa kuɛɛnɛ hiou yɛ o Sawala Mɛlɛkalaŋ tɛɛŋ kpou?”+ 37 Mi Chiisu mulul ndu aa: “‘A nɔ ma kaala Chɛhowa* Mɛlɛka numndo a kɔl numndo kpou, a yoomu numndo kpou, nduyɛ a yiyaŋ numndo kpou.’+ 38 Sawa tase hiou sawalaŋ kpou wo cho hoo ni. 39 Sawa diiŋ ndɔɔ cho machuaa mɛɛ o tasoo cho yɛ. Ndu cho ni, ‘A nɔ ma kaala wana nya chiɛɛliaŋ ndo* mɛɛ ŋ kaala numpila yɛ.’+ 40 O sawala tiɔɔŋndaŋ ndaŋ choo Sawala Mɛlɛkalaŋ kpou, a nyɛ wanaa ndaa suaa le Mɛlɛka wa dimi wo tɔlnuŋ ni.”+
41 Mɛɛ Falisiiya wa a chuuŋgiaŋ naapilɛ, mi Chiisu nyuna nda aa:+ 42 “Vɛɛ nya yiyaŋ yɛ a Kiliti okɔɔ? Po nɛɛnɛ o cho yɛ?” Ma mulul ndu aa: “Po Deeve wo.”+ 43 Mbo nyuna nda aa: “Le yɛɛnɛ niko mi nyina diandaa tosa+ mi Deeve veelu ndu aa, Masanɔɔ? Mbo dimi aa, 44 ‘Chɛhowa* dimul Masanɔ nuu aa: “Chal o ba ni kɛndɔɔ choo haaa mi handu yaamɔɔwaa numnda o peluŋ numndoŋ bɛŋgu.”’+ 45 Te Deeve pila veelu ndu pɛ aa Masanɔɔ, vɛɛ o looku yɛ vɛlɛ mbo wa po ndɔɔ?”+ 46 Kɛ bakoo bɛɛ wana nɔla mbo mulul ndu le. Nduyɛ chɔŋ niŋ a paale leŋ, wana o wana del lɛ kɔl mbo nyuna ndu le.