Koloniko Diiŋ Ndɔɔ
22 Okoŋ, mi waŋnda Chulusalɛm siiŋguu Ahasaya po ndɔ lumndo masaa o foofo ndɔɔ. Kanifuule, mi wanaa wɔɔŋaa kei waŋnda delɔɔ choo wa kua latulu nda Aluabuiya o dɔɔŋgɔ ndaa niŋ ma diu diu puaa nduaa kaasoŋnda kpou.+ Okoŋ, mi Ahasaya po Chɛholuam ndo miiŋgu o masaleŋ choo Chuda.+ 2 Ahasaya wa wɔsilaŋ 22 mbo simnuŋ masaa, nduyɛ mbo chii wɔsioo o pilɛ o masaleŋ choo Chulusalɛm. Kala ndɔ ndoo nɔ diolaŋ ni aa Atalaya,+ chua mama* Omili wo.+
3 Mi ndu bɛɛ tual nɛila yuŋgu Ehaabi wo kɔɔli,+ kanifuule mi kala ndɔ simnuŋ wana ndɔ silaa le dɛnɛ wɔɔŋndo tosaa. 4 Mbo hiau lachi a nyɛ bɛnda Chɛhowa o hɔl te wo tosaa, maa yuŋgu Ehaabi wo. Kanifuule mɛɛ finya ndɔ vi, mi yuŋgu Ehaabi wo simnuŋ wanaa nduaa silaa le ndu kpundɔɔ tusioo choo. 5 Mbo tual sila ndaa kɔɔli, okoŋ mbo kua latulu a Chɛholuam po Ehaabi wo masaa le Isɔluɛi, le ma kɔ chiŋalaŋ Hasayɛɛ+ masaa le Siiliaa a chɔuwo Luamɔti-kiliaadi.+ Nduyɛ, mi wanaa wuu chiŋuaŋ nda yɔŋul Chɛholuam tau. 6 Mbo miiŋgu Chɛsiluɛɛ+ le mbo kɔ chiɔu yɔŋul nda yɔŋul ndu Luama, teleŋ o kɔ chiŋalaŋ Hasayɛɛ masaa le Siiliaa a chɔuwo wo.+
Mi Ahasaya* po Chɛholuam ndo,+ masaa le Chuda kua Chɛsiluɛɛ le mbo kɔ yil Chɛholuam+ po Ehaabi wo, le mɛɛ nda yɔŋul ndu o chɔuwo yɛ.+ 7 Kɛ mi Mɛlɛka tusi Ahasaya nyɛpalaa choo le mɛɛ o kuɛ Chɛholuam yilɔɔ yɛ. Mɛɛ o kuɛ, mi ndu nda Chɛholuam kua naa Chehu chua,+ po mama* Nimisai yo. Nduyɛ Chehu yɛ, Chɛhowa ndoo chii ndu niŋ pɔya le mbo diu diu waŋnda o yuŋgu Ehaabi wo niŋ.+ 8 Mɛɛ Chehu kandu waŋnda o yuŋgu Ehaabi wo niŋ nyɛpalaa tusioo choo, mbo saaluŋ waŋ banaa Chuda a tooŋgoowaa Ahasaya wa, a wa wallo le Ahasaya wa, mbo diu diu nda.+ 9 Mbo viam vɛlɛ waŋnda le ma kɔ nuuviaa Ahasaya. Ma kɔ bii ndu naa o wa o vioŋnɔŋndo niŋ Sameeliaa wa, ma huŋ a ndu naa Chehu chua. Okoŋ ma dii ndu, ma kumbu ndu.+ Kanifuule ma dimi aa: “Po mama Chɛhosiafati wo o cho ni, o nuuviaa Chɛhowa a kɔl ndɔɔ kpou wo.”+ Nduyɛ, wana o wana ve lɛ o yuŋgu Ahasaya wo choo le mbo miiŋgu o masaleŋ choo le.
10 Mɛɛ Atalaya+ kalaa Ahasaya che maa po ndɔɔ vi, mbo chaŋ mbo diu diu wana o wana fula o yuŋgu lemasaa choo* o Chuda niŋ.+ 11 Kɛ mi Chɛhosiaba, chua Masaa Chɛholuam ndo,+ chua Chɛhowasi+ po Ahasaya wo, mbo faŋa ndu* puaa masaa tɛɛŋ, a ndaa nɔ le piɔmndo sɔlaa wa, mbo kɔ vioŋ ndu nda wana wa ndu mandaa wo o lumui ndɔɔ niŋ. (Chɛhosiaba yɛ, ndu wa lanɔɔ Chɛhoyada+ wana soliaa lasalaa ni. Nduyɛ ndu wa vɛlɛ yemaa Atalaya ni.) Mbo kindiŋ mbo viaŋ ndu kpiŋ, Atalaya seeluŋ ndu le. Le hei, o nɔla mbo dii ndu le.+ 12 Le wɔsilaŋ la ŋɔmpum, o wa nda o ba o viaŋaa o chiɛi Mɛlɛka tonyaa niŋ. Nduyɛ a teleŋ koŋ, Atalaya wa masaa o lɛŋndeŋ niŋ ni.