Polowaa
29 Te a sila pɛ waŋndo teleŋnda bɔɔbɔɔ mbo wa wɔ nilakalulaŋ tosaa,*+
Kpundɛ cho ndu komal o lepilɛ niŋ kpe wo, wana nɔla lɛ niŋ ndu mala le.+
2 Wanaa sakpuaa kui pɛ tau, waŋnda dɔɔnuŋ nyaale.
Kɛ te wanaa dɛnɛ wɔɔŋnda wa pɛ o masaleŋ choo, waŋnda ŋɔɔchiaŋ.+
3 Wana kaala taasioo wo tosa mi finya ndɔ dɔɔnuŋ nyaale.+
Kɛ te waŋndo tosa chaŋyɛi a wanaa suundɛiya pɛ, o laasiaa sul ndɔɔ.+
4 Te masaa sandu pɛ o sɔɔŋ niŋ, mbo tosa mi lɛŋnde ndɔleŋ le sim yi.+
Kɛ te waŋndo kindiŋ pɛ le luɛiyɔɔla niŋndaŋ biyɔɔ o sɔɔŋ niŋ, o tɛɛmbuu lɛŋnde ndɔleŋ.
5 Te waŋndo saŋgala pɛ wana nda chiɛɛliaŋndo o siɔuve choo,
Mɛɛ yaŋɔɔleŋ o cho ndu leŋ yeŋndo ni le peluŋ ndɔŋ.+
6 Wana dɛnɛ wɔɔŋndo mi hakila o tosa laŋ la luei ndu o yaŋɔɔleŋ niŋ,+
Kɛ mi wanaa cho sakpo wa soli chonduŋ kɔl kɛndɔŋ, nduyɛ ma dɔɔnuŋ nyaale.+
7 Mi wanaa cho sakpo wa buulaŋ a dila wanaa bala fonduaa okɔɔ,+
Kɛ wanaa dɛnɛ wɔɔŋnda nɔ buulaŋ waa lende le.+
8 Wanaa kaala saŋgalaŋ bɛndoo wa cho ko maa wanaa mal chioo o yiŋ nda,+
Kɛ mi wanaa nɔ taasioo wa tosa mi wanaa dɔɔnuŋ tumbe wa pɔlul kɔl.+
9 Te wana kɔl kaloo wa pɛ diomndaŋ hiŋaŋndo nda diɔmndo,
Deŋioo koni diɔm koŋ deŋi ni nduyɛ mbo wa mamɔɔ, kɛ wana taasioo sɔla kɔl nyulu o suɛi keŋ niŋ te.+
10 Wanaa diyaa tul wana tɛɛmbuu isɔɔ le wo leyɛ,+
Nduyɛ ma nuuviaa nɛilaŋ le wana cho sakpo wo diyɔɔ.*
11 Diɔmndo nɔla kɔl ndɔ tuuwo dɔwɔɔ o mandaa bɛŋgu le,+
Kɛ mi wana taasioo dɔu kɔl ndɔ tuuwo o mandaa bɛŋgu.+
12 Te masaa yaŋ pɛ nilaŋ o choola waŋnda dimi laŋ,
Buɛiyaa nduaa kpou cho simnɔŋ wanaa dɛnɛ wɔɔŋnda.+
13 Wana bala fondoo a wana tusi waŋnda nyɛpalaa choo wo,
Nda ŋiɔɔŋ kpou, Chɛhowa ke nda nyɛ teŋgaa ni.*
14 Te masaa wa pɛ waŋnda sɔɔŋ dimioo tɛɛŋ o nɛi sakpoo choo,+
Masale ndɔleŋ le cho wa lɔɔlɔɔ isisi yi.+
15 Sioŋndeŋ a silaa ke waŋndo taasioo ni,+
Kɛ te hɔɔ sɔla silaa le, mbo chuu kala ndɔ siɔmbulaŋ.
16 Te wanaa dɛnɛ wɔɔŋnda kui pɛ, yɔŋ wɔɔŋndo kui.
Kɛ mi wanaa cho sakpo wa che nda o tambei sɔlaa.+
17 Te a sila po numndo pɛ, keŋ cho tosa ma sɔla pɛŋgioo,
Nduyɛ o cho tosa ma naŋ kɔl tau.+
18 Te yilaŋuŋ ve lɛ chɔŋnɔŋ te,* waŋnda tosa sɔɔŋ mɛɛ nda yeema yɛ.+
Kɛ kɔl kɛndɔɔ cho le wanaa diikuŋ sawaa* wa.+
19 Suɛi sonduei kinɛi cho letuu le buɛiyo miŋgioo o nɛi le,
Kanifuule mi che bɛɛ mbo bii bila, kɛ o diikuŋ te.+
20 A che niŋ pa waŋndo o dimi suɛi o yiyaŋ fɛŋ te wo?+
Tiindaŋndo cho le diɔmndo mbo hiau wana waa lende.+
21 Te a hiu pɛ buɛiyo biilu boondii o cho feleŋgɔnɔ ve,
O mɛɛlulaŋ, o cho nɔ balika melaa le num te.
22 Wana keleŋa tumboo dɔɔnɔŋndo wo mɛli sɛɛŋgiaŋndaŋ ni.+
Nduyɛ te waŋndo keleŋa tumboo dɔɔnɔŋ pɛ, mbo tosa hakilaŋ tau.+
23 Te waŋndo heeluŋ pɛ, heelɔŋ ndɔɔ tusi ndu ni.+
Kɛ te waŋndo tusiŋ pɛ, o sɔla bɛɛleŋ.+
24 Te waŋndo simnuŋ pɛ chaaŋ o viinɔɔ, mɛɛ o tul ndupila leyɛ.
Naapum ma veelu ndu le kɔlaŋ seileŋ timbioo,* kɛ o suu nyɛ o nyɛ le.+
25 Siooŋnde nɔɔ le wanachioo, yaŋɔɔleŋ o cho ni,+
Kɛ wana o wana dɔu pɛ tiindaŋndo o Chɛhowa niŋ, o cho ndu manda.+
26 Mi wanaa bɔɔbɔɔ kuɛ o masaa lo le malaa,
Kɛ Chɛhowa kinɛi tosa ni mi waŋndo sɔla di ndɔɔ.+