Masaa Diiŋ Nduaa
11 Mɛɛ Atalaya,+ kalaa Ahasaya che maa po ndɔɔ vi,+ mbo chaŋ mbo diu diu wana o wana fula o yuŋgu lemasaa choo.*+ 2 Kɛ mi Chɛhosiɛba, chua Masaa Chɛholuam ndo, yemaa Ahasaya chua Chɛhowasi+ po Ahasaya wo, mbo faŋa ndu puaa masaa tɛɛŋ, a ndaa nɔ le piɔmndo sɔlaa wa, mbo kɔ vioŋ ndu nda wana wa ndu mandaa wo o lumui ndɔɔ niŋ. Ma kindiŋ ma viaŋ ndu kpiŋ, Atalaya seeluŋ ndu le. Le hei, o sɔla piɔm te. 3 O lo ndu o ba o viaŋaa o chiɛi Chɛhowa wo niŋ haaa le wɔsilaŋ la ŋɔmpum. Nduyɛ a teleŋ koŋ, Atalaya wa masaa o lɛŋndeŋ niŋ ni.
4 O wɔsi ŋɔmmɛu wo niŋ, mi Chɛhoyada yooŋgu wanaa manda masaa wa wanaa ndaa banaa, a waŋnda kɛmɛ wa o ba bɛŋgu wa, vɛlɛ a wanaa manda chiɛi lemasaa wa wanaa ndaa banaa,+ ma huŋ o ndu lo o chiɛi Chɛhowa wo. Mbo yii kpemaa a nda, nduyɛ mbo dimul nda le ma mɛnaŋ o chiɛi Chɛhowa wo niŋ maa a cho lo o kpema koŋ choo. Mɛɛ nda chii mɛnaŋ, mbo chɔm nda po masaa.+ 5 Mbo dimul nda aa: “Nyɛ nya nɔ mi la tosa wo cho hoo ni: O kundala yaala nɔ le mɛŋgɛlaa o Paale Pɛŋgiaaleŋ choo laŋ tɛɛŋ, kundaa o pilɛ nɔ mbo wa chiɛi lemasaa hɔlteŋ choo,+ 6 mi kundaa o pilɛ wa o Dio Kpaki Chiyii Chiɛiyo, nduyɛ mi kundaa o pilɔɔ sim o dio wanaa manda chiɛi lemasaa wa kɔɔli. Okoŋ mi la wa siŋgafilaŋndo le chiɛi Mɛlɛkaa* waa hɔlteŋ choo. 7 Kundala tiɔɔŋnda laa nɔ le pɛŋgioo o Paale Pɛŋgiaaleŋ choo laŋ, la nɔ mi la wa chiɛi Chɛhowa wo hɔlteŋ choo le masaa mandaa. 8 La nɔ mi la balu masaa silɔ, nduyɛ mi wana o wana bii nyɛm ndɔŋ chɔuwoŋ o ba. Wana o wana luɛi nya tɛɛŋ pɛ, o nɔ mbo sɔla piɔmndo. Ba o ba masaa kuɛ pɛ,* la kɔ a ndu latulu.”
9 Mi bolii puaa chɔuwa a waŋnda kɛmɛ wa o ba bɛŋgu wa,+ a Chɛhoyada, wana soliaa lasalaa yooŋgu haa wa tosa mɛɛ o mɛɛ o dimul nda yɛ. Okoŋ mi wana o wana chua laŋgbaa nduaa, a ndaa nɔ le wallo tosaa o Paale Pɛŋgiaaleŋ choo wa, latulu a wanaa ndaa nɔ le pɛŋgioo o Paale Pɛŋgiaaleŋ choo wa, ma huŋ o Chɛhoyada, wana soliaa lasalaa lo.+ 10 Mi wana soliaa lasalaa chua baltaŋ a boola tiu tiula Masaa Deeve ndoo nɔ laŋ, la wa o chiɛi Chɛhowa wo niŋndaŋ, mbo ke bolii puaa chɔuwa haa, a waŋnda kɛmɛ wa o ba bɛŋgu wa. 11 Mi wanaa manda chiɛi lemasaa wa+ bii nyɛm ndaŋ chɔuwoŋ o laba, ma sim o fondaŋnda ndalaŋ o chiɛi Mɛlɛkaa hɔlndɔ. Haa wa o ba kɛndɔɔ choo, haa wa o ba miallo choo. Apum wa vɛlɛ o bandu luamaa lasalaa ikɛi,+ mi apum wa o chiɛiyo ikɛi. Nda kpou ma balu masaa silɔ. 12 Okoŋ mi Chɛhoyada soli po masaa+ o bɛɛ, mbo wou ndu mɔsil lemasaa, nduyɛ mbo kɛsi ndu yau laSawaa o lebol,*+ okoŋ mbo pɔya ndu, mbo siiŋguu ndu masaa. Ma kandu balaŋ tiɔmɔɔ ma dimi aa: “Maa masaa viou naa choo fɔ!”+
13 Mɛɛ Atalaya tuei waŋnda kiltaŋ a bɔɔluuwo, mbo chaŋ o lepilɛ niŋ kpe mbo kua naa waŋnda wa o chiɛi Chɛhowa wo+ wa. 14 Okoŋ, mbo cha masaa isisi o suŋgbuleŋ ikɛi a mɛɛ naamu ndaa wa yɛ.+ Bolii puaa chɔuwa a wanaa hɔŋ bululaŋ nda+ wa masaa ikɛi. Nduyɛ waŋnda kpou wa nyaaloo ma wa bululaŋ hɔŋndo. Okoŋ mi Atalaya sɛɛsiaŋ nyɛlaŋ lekɔɔ, mbo chaŋ choo choo aa: “A yii ya dumbu fɔ! A yii ya dumbu fɔ!” 15 Kɛ mi Chɛhoyada, wana soliaa lasalaa dimul wanaa wa puaa chɔuwa bolleŋ nda+ aa: “La soli ndu nya tɛɛŋ. Nduyɛ wana o wana tol ndu kɔɔli pɛ, la dii ndu a muɛi faŋnde!” Wana soliaa lasalaa ndoo chii nda niŋ dimul aa: “La dii ndu o chiɛi Chɛhowa wo niŋ te.” 16 Okoŋ ma bii ndu. Mɛɛ nda fuuluu a ndu o fondaŋ nda luei suaa o chiɛi lemasaa+ niŋndo, ma dii ndu loŋ.
17 Mi Chɛhoyada tosa mi masaa a waŋnda yii kpemaa a Chɛhowa+ maa, a cho hiouwɔɔ lachi a waa wanaa Chɛhowa wa. Nduyɛ mbo tosa vɛlɛ mi waŋnda yii kpemaa a masaa.+ 18 Okoŋ kɔɔli, mi waŋnda kpou o lɛŋndeŋ niŋ kua o maaŋ nda sooluu Baal lo, ma pesi pesi bandula luamaa lasalalaŋ+ a piɔmnda wɔ wɔ.+ Ma dii vɛlɛ Mataŋ, wana soliaa lasalaa le Baal+ o bandula luamaa lasalalaŋ hɔlndɔ.
Okoŋ mi wana soliaa lasalaa yulu waŋnda iso, le ma wa chiɛi Chɛhowa wo chilaŋ.+ 19 Okoŋ kɔɔli, mi masaa chua wanaa wa puaa chɔuwa bolleŋ nda, a waŋnda kɛmɛ wa o ba bɛŋgu wa,+ wanaa manda masaa wa, wanaa manda chiɛi lemasaa wa,+ a waŋnda kpou o lɛŋndeŋ niŋ, ma liila masaa chɔŋ o chiɛi Chɛhowa wo haaa o chiɛi lemasaa. Nduyɛ, ma luɛi o dio wanaa manda chiɛi lemasaa wa sim ndo, mbo chal o kpeŋgbei* lemasaa choo.+ 20 Okoŋ, mi waŋnda o lɛŋndeŋ niŋ kpou duaunuŋ nyaale. Nduyɛ chioo wa o kɔl nyulu niŋ, kanifuule ma dii Atalaya a muɛi faŋnde o chiɛi lemasaa.