Ikilisiaati

12 Loonuŋ a Wana Toosiaa numndo teleŋ ŋ cho feleŋgɔnɔ wo.+ Tuupa mi palɛi nyɛpalaa* fuuluu,+ okoŋ ma yuuwa ma dimi aa: “I tuii yoomoo yeela le.” 2 A tonya, loonuŋ a Wana Toosiaa numndo tuupa mi paaleŋ, paŋgei, a looŋ simnuŋ nyumndaŋ,+ a chi lɛ niŋ nyɛ wawoŋ te, tuupa mi piɔɔ sia wo miiŋgu o yumbu yumbu. 3 A boondii keŋ, wanaa cho chiɛiyo mandaa wa cho hiilɔŋ.* Nduyɛ wanaa nɔ yoomuaŋ nda sim ndɛ sakpo le, mi waŋ laanduaa pɛŋgi nyɔɔŋ chuiyo, kanifuule a cho lɛ a bɔɔ le. Mi haa wa tofaa o wundɛilaŋ,* kɛ mi nyɔɔ yɔŋnuŋ nda o hɔl yifidii.+ 4 Boondii diola cho ba nɛiyo laŋ la kindaŋ niŋ nde, nduyɛ mi diom wa fulaa o chiei nda wa chuoo niŋnde tol toolo ve. Boondii waŋndo tiandu te o tuei pɛ youwo chaŋndo ve, nduyɛ mi chuaa laanduaa soli chondoŋ nda kpou vi ŋdial le.+ 5 Boondii waŋndo wa vɛlɛ a siooŋnde le fondaŋ filioŋndo ve, nduyɛ mi sɔɔŋ ŋsiooŋndoŋ wa vɛlɛ o nɛi bɛndoo choo ve. Boondii yɔm amɔŋ ndo soli peeŋgelaŋ,+ mi kambalaa bɛɛ kuɛ a sɛɛsɔŋndo, okoŋ mi komɔɔ nɛi yiaaŋ ndo yandu ve. Kanifuule, wanachioo cho kɔŋndaŋ o chiɛi ndɔ cho le fɛɛŋ a fɛɛŋ ndo niŋ,+ mi wanaa cho mɔnɛi biyɔɔ wa, wa balɔɔ o nɛi bɛndoo choo.+ 6 Loonuŋ a Wana Toosiaa numndo tuupa ma faŋa yoole nda toosiaa a kanii humbuei leŋ, nduyɛ ma chuii hɛŋgɛi nda toosiaa a kooliiye wo, okoŋ ma pɛl kpɛɛnɛi cho le mɛŋndaŋ kɔndɔɔ ve, vɛlɛ ma kelu yoole cho le mɛŋndaŋ solioo o sooŋndo niŋ ndeŋ. 7 Wanachioo, o fula o puuloo niŋndo cho miiŋgu o puuloo niŋ.+ Nduyɛ, mi yoomoo miiŋgu o Mɛlɛka tonyaa lo, wana yɔŋgu ndu wo.+

8 Mi wana pɛɛkaa+ dimi aa: “Nuawɔ se nyɛ fondo bɛndu! Nyɛ o nyɛ fee, nyɛ fondoo fuu o cho ni.”+

9 Wana pɛɛkaa simnuŋ ko wana taasi le, kɛ mbo hiau lachi a waŋnda pɛɛkoo sɔɔŋ ndoo sina woŋ.+ Mbo yiyaŋ nyɛkɛndɛi nduyɛ mbo tosa yaasiaa yiŋgoloŋ, le halikpeŋ mbo dɔu* talela bɔɔbɔɔ naapilɛ.+ 10 Mi wana pɛɛkaa hɛli diomnda pilaŋ waŋnda kɔllo laŋ+ a diomnda tonyalaŋ, okoŋ mbo poonyiaa laŋ.

11 Diomnda wanaa taasiaa la cho ko maa yɔm sɛɛmbiaa.+ Nduyɛ, diomnda nda hɛli le dimioo laŋ la cho ko mɛɛ nda baŋ nuaa lɔndimɛiye* o yɔmndo peŋ yɛ. Nduyɛ, wana mandaa lasaa o ba diomndaŋ ndaŋ la fula ni. 12 O fulawɔ o sɔɔŋ muŋ kɔɔli, sila ya yeema mi ke numndo cho hoo ni po nuu: Te o hiŋ pɛ a yaula bɔɔbɔɔ toosiaa, mɛɛlula cho le. Nduyɛ, yɔŋgɔŋndo tau o laŋ toosiaa niŋ chuu wana yɔkpaa o dialloŋ niŋ.+

13 Mɛɛ nyɛ o nyɛ chuu niŋ dimiŋ yɛ, suɛi biyɔɔ bolle pilɛ cho hei ni: Nɔ siooŋnde le Mɛlɛka tonyaa,+ nduyɛ ma bii sawala ndɔlaŋ.+ Nyɛ cho wanachioo kuee le tosaa wo cho hoo ni.+ 14 Kanifuule, Mɛlɛka tonyaa cho waŋnda chieeya yamɛi kilul le nyɛ o nyɛ nda tosa, hali sɔɔŋ nda tosa sɔɔsɔɔ woŋ bɛɛ. O wa ŋ kɛndɛ, o wa ŋ wɔɔŋ.+