Polowaa
5 Po nuu, yaŋ nilaŋ o diomnda nila taasi laŋ.
Yaŋ nilaŋ nyɛkɛndɛi o sina pɛŋgu nuu,+
2 Le halikpeŋ ma yiyaŋ o sɔɔŋ choo,
Nduyɛ ma mandaŋ a nyɛ ŋ dimi wo.+
3 Diɔɔmule wana lanɔ suundɛiyo* le yeela naŋ chaa liaaŋ ni,+
Nduyɛ sondo ndɔɔ chuluka o hiou chuɛiyaŋ.+
4 Kɛ o mɛɛlulaŋ, mbo lol naŋ chaa yɔm lolɛiyo ni.+
Nduyɛ o luɛi naŋ chaa muɛi sondola tiɔɔŋnde ni.+
5 O piɔmndo niŋ peluŋ ndɔŋ yaa wana ni.
O Sɛiyo* niŋ sanaa kelala ndɔlaŋ la yaa wana ni.
6 O yiyaŋ pɛŋ a nɛi yoomoo okɔɔ le.
Mbo wa balɔɔ ikpamna kpamnɛi, kɛ o sina naa o wa kɔlaŋ nda le.
7 Lelaŋ po nuu,* yaŋ ya nilaŋ.
Nduyɛ, faŋaŋ o nyɛ ya cho num dimullo wo choo le.
8 Sɔɔŋguu ndu ikɛi le.
Kua pɛŋ o sondo chiɛi ndɔɔ ikɛi le,+
9 Yɔŋii acheleŋnda kɛɛ bɛɛleŋ nɔɔ le num,+
Nduyɛ ma wa o saŋgaa niŋ haaa a yoomu numndo mɛɛlulaŋ.+
10 Okoŋ mi nyɛm num kiɔɔŋ kuɛŋnuŋ wanaa cheleŋ o ba,+
Nduyɛ mi nyɛ o nyɛ ŋ saŋga le ndu kuɛŋnuŋ mialla o ba.
11 Te o cho koŋ te, a cho mɛɛlu mɔnɛi biyɔɔ o yoomu numndo niŋ,
Boondii dialuŋ numndoŋ cho yɔkpa ve.+
12 Okoŋ ma nyunaŋ aa: “Le yɛɛnɛ ya tul lɛ silaa leyɛ?
Mɛɛ nda miŋgi ya o nɛi, le yɛɛ ya kɛɛ yɛ?
13 I yeŋ wanaa niaa pɛɛkaa lani le,
Kɛlɛŋgaa niŋ te mi handu kɔllo o nyɛ nda wa ya dimullo wo.
15 Kol mɛŋndaŋ o sooŋ numndo niŋ,
Mɛŋma kɛndɛ kɛndɛma cho o sooŋ numndo niŋndaŋ.+
16 O bɛnda pa ma mal mɛŋndaŋ o sooŋ numndo niŋ mi ma saŋnuŋ o bɛɛ,
Nduyɛ mi mɛŋndaŋ o sooŋ numndo niŋ ma wa le wana o wana?+
17 Ma nɔ mi ma wa le numpilɛ kpe,
Kɛ chɛl mi ma wa le wanaa cheleŋ te.+
18 Maa salaa wa sooŋ num mamɛŋndo* choo,
Nduyɛ ma dɔɔnuŋ nyaale a lanɔ ŋ chua o feleŋgɔyɛi numnde niŋndo.+
19 O cho ko maa kial fɔŋndɔ laandoo, nduyɛ maa chuiŋ bandila.+
Mɛɛma nduaŋ ma nɛŋi num kɔl le teleŋ o teleŋ,
Maa kaala o nɔ le numndo tosa ma handu ndu kɔllo choo.+
20 Lelaŋ po nuu, le yɛɛnɛ ma chɛl mi kaala wana lanɔ suundɛiyo* luɛi num o kɔl,
Ɔɔ ma kɔɔmiaŋ wana lanɔ tiamaa?+
21 Kanifuule mi Chɛhowa che kelala wanachioo kpou,
Nduyɛ mbo mɛɛndaŋ nɛila ndɔlaŋ.+
22 Mi wana dɛnɛ wɔɔŋndo hau o haki o tosa wo niŋ,
Nduyɛ mi yuei haki o tosa wo yiu yiu ndu.+
23 O cho piɔmndo sɔla le mɛɛ o kɛɛ silaa yɛ,
Nduyɛ o cho laasiaŋ le diɔmii nduɛi bɛndu bɛnduei.