Ɛsodɔɔ
1 Mi Chekɔpu* kua a puaa nduaa Ichipi, nduyɛ mi o kɛ kɛ kua a yuŋgu ndɔɔ.+ Diola ndalaŋ la cho laŋ ni: 2 Lubɛŋ, Simiɔŋ, Livai, a Chuda.+ 3 Isaka, Sɛbulɔŋ, a Bɛŋjamiŋ. 4 Daŋ nda Nafitalii. Kaadi nda Asia.+ 5 Chuauwaa Chekɔpu velu wa, a wa kpou kpou ŋwaŋ 70. Kɛ Choosɛ ndu waŋnuŋ niŋ Ichipi.+ 6 Mɛɛ teleŋ tiŋ hiou, mi Choosɛ wu.+ Okoŋ kɔɔli, mi pɔmbɔ ndɔ a bɛndaa nduaa kpou bɛɛ wu. Mi pulale leŋ le chuu paku. 7 Mi Isɔluɛiya vialu chuauwa, nduyɛ ma kui tau tau. A wa tuŋ hiouwɔɔ lachi a kuiyo vɛlɛ a yoomuaŋ sɔlaa. Le hei, ma tiu ba o ba fee o tanda nda wa niŋndo.+
8 Mɛɛ teleŋ tiŋ hiou, mi wana cheleŋ simnuŋ masaa o Ichipi niŋ, kɛ ndoo sina Choosɛ le. 9 Mbo dimul wanaa nduaa aa: “La cho chɔɔ mi Isɔluɛiya wa kuiyo, nduyɛ ma wa kpaayaa sɔlaa ma hiau naa.+ 10 La ŋ nuuviaŋ nɛilaŋ miŋ kuuna nda kuiyo. Te o cho koŋ te, a cho hiouwɔɔ lachi a kuiyo. Nduyɛ te chɔuwo del pɛ, a cho hiounɔŋ yaamɔɔwaa naa kɔɔli ma chɔulaba naa, okoŋ ma mal lɛŋnde naaleŋ.”
11 Le hei, ma hɛli waŋnda le ma wa Isɔluɛiya chilaŋ le nda kindilaa le walta kala kalalaŋ tosaa.+ Nduyɛ, ma taŋgul chieeŋ bɛndoŋ ŋ muuŋ le Feloo le waa nyɔɔŋ kɛsioo leniŋ. Muŋ cho ni, Pitɔm a Luamɛsi.+ 12 Kɛ mɛɛ ndaa kindila nda fau, lende koni ndaa hiau lachi a kuiyo ni, nduyɛ ma tiu ba o ba fee. Mi hei tosa mi siooŋii bɛnduei bii nda le Isɔluɛiya.+ 13 Le saboo hoo, mi Ichipiaŋnda siiŋguu Isɔluɛiya chiaa, nduyɛ ma baŋ nda le walta kala kalalaŋ tosaa.+ 14 Ma tosa mi yoomoo kiandu kpoke le nda, kanifuule a wa walta kala kalalaŋ tosaa. A wa puuloo lindaa, kpilikioŋ lɔɔ, vɛlɛ a wali lechɛ suu o suu tosaa o yondola ndalaŋ niŋ. A tonya, ma handu nda nyɛkindilaa choo o wali lechɛ suu o suu niŋ.+
15 “Okoŋ kɔɔli, mi masaa le Ichipi suaa o waŋ laanduaa Hibuluiyaa ndaa bii violɔɔ wa lo. Nda cho ni, Sifiluaa nda Puwa. 16 Mbo dimul nda aa: “Te la wa pɛ wana lanɔ Hibuluinɔɔ malaa le violɔɔ,+ mi la saaluŋ maa wana pɔnɔɔ o velu ni, la nɔ mi la dii hɔɔ koŋ. Kɛ te wana lanɔɔ o velu ni, la dii ndu le.” 17 Kɛ, waŋ laanduaa haa ndaa nɔ siooŋnde le Mɛlɛka tonyaa. Le hei, a tosa nyɛ masaa le Ichipi dimul nda wo le, nduyɛ a ve chɛlɛkpiaa piaanduaa diu diu le.+ 18 Paale pilɛ, mi masaa le Ichipi veelu waŋ laanduaa ndaa bii haa violɔɔ wa, mbo nyuna nda aa: “Le yɛɛnɛ nya cho yɛ chɛlɛkpiaa piaanduaa mɛiyo yoomu?” 19 Ma mulul Feloo aa: “Waŋ laanduaa Hibuluiya cho maa waŋ laanduaa Ichipiaŋnda le. Yoomuaŋ pila nda nɔ ni, nduyɛ a chii niŋ fɛlɛŋ violɔɔ malaŋ waŋ laanduaa bii violɔɔ wa fuuluu o nda lo.”
20 Le hei, mi Mɛlɛka duau waŋ laanduaa haa sala, okoŋ mi Isɔluɛiya hiau lachi a kuiyo vɛlɛ a yoomuaŋ sɔlaa tau tau. 21 Nduyɛ le mɛɛ waŋ laanduaa haa ndaa nɔ siooŋii Mɛlɛka tonyaa yɛ, mbo tosa ma vialu chuauwa. 22 O mɛɛlulaŋ kpɔŋ, mi Feloo dimul wanaa nduaa kpou aa: “Chɛlɛkpɛ Hibuluinɔ kɛ kɛ nda velu pɛ sɛnɛi mbo wa wana pɔnɔɔ, la nɔ mi la viou ndu o Pioo Nail. Kɛ te o yɔŋ pɛ aa wana lanɔɔ, la mal ndu mbo wa yoomu.”+