Kɔliŋtiaŋ Diiŋ Ndɔɔ

6 Naŋ cho wallo latulu a Mɛlɛka wa,+ ŋ cho nya nyɔɔloo maa la chɛl mi kɛndɛi bɛnduii Mɛlɛka tosal nya ve simnuŋ nyɛ fondoo fuu le.+ 2 Kanifuule, Mɛlɛka dimi aa: “A boondii kɛndɛi, mi tuɛi piɛile numndeŋ. Nduyɛ paale ŋ sɔla pioŋɔɔ leŋ bɛɛ, mi mala num.”+ Lelaŋ, boondii kpeekpeiye cho hei ni. Paale naŋ nɔ le pioŋɔɔ sɔlaa leŋ le cho leŋ ni.

3 Ŋ yeema miŋ tosa nyɛ o nyɛ tɛɛmbuu waŋndo kɔllo wo le, yɔŋii o dimi sɔɔŋ wɔɔŋndoŋ a wali naŋ cho tosaa le Mɛlɛka wo okɔɔ.+ 4 Kɛ o nɛi o nɛi niŋ, miŋ chɔm waŋnda maa buɛiyaa Mɛlɛkaa naŋ cho ni.+ Miŋ biunuŋ sɔɔŋ palaŋ bɔɔbɔɔ, nyɛpalaa, boonduŋ kala kalaŋ, a bahawɛilaŋ.+ 5 Lepum ma lɔɔ naa, ma dɔu naa o chiɛila manyumndaŋ niŋ,+ mi faŋgaa del naa choo, miŋ tosa wali kala kalaa. Lepum luaŋ bɛɛ ŋ lɔl te. Nduyɛ lepum ŋ sɔla nyɛdiaa le dio le.+ 6 Kaala naalaŋ la cho la diandaa, ŋ nɔ kɔl kaloo a tonyaa okɔɔ, ŋ cho wanaa biuwaŋ,+ ŋ nɔ kɛndɛi,+ ŋ cho nyina Mɛlɛkaa chɛlɔɔ mbo wa naa nɛiyo chɔmndo, nduyɛ o kɔllo niŋ di kaala naa cho ni.+ 7 Miŋ dimi tonyaa, ŋ tiindaŋ kpaaya Mɛlɛkaa,+ nduyɛ ŋ bii nyɛm chɔu cho sakpo woŋ+ a ba kɛndɔɔ, vɛlɛ a ba miallo. 8 Ma ke naa bɛɛleŋ, nduyɛ ma tusi naa siɔmbulaŋ. Ma pɛɛsa naa, nduyɛ ma chandu naa. Ma chua naa maa wanaa lachoowaa naŋ cho ni, kɛ tonyaa naŋ dimi ni. 9 Ma chua naa maa wana sina naa le, kɛ Mɛlɛka sina naa. Ma chua naa maa ŋ nɔ le piɔmndo sɔlaa, kɛ ŋ cho wɔ yoomu.+ Ma tusi naa nyɛpalaa choo, kɛ a dii naa le.+ 10 Ma yiyaŋ maa ŋ cho a kɔlta tambɛilaŋ, kɛ lɔɔlɔɔ ŋ cho a nyaale. Ma chua naa maa ŋ cho wanaa bala fondo, kɛ ŋ cho waŋnda nyɛm kɛndɔŋ kioo tau. Ma chua naa maa ŋ nɔ nyɛ o nyɛ le, kɛ ŋ nɔ nyɛ o nyɛ fee.+

11 Chaaŋaa naa laalaŋnda Kɔliŋ, o nya lo naŋ cho suɛi kpendekele ni, nduyɛ ŋ kumbul nya kɔlta naalaŋ wakpa. 12 Ŋ chɔm nya kaala naa,+ kɛ mi nya kɛɛ le naa kaalaa chɔmndo. 13 I cho suɛi o nya lo maa chuauwaa ni. La bii naa mɛɛ naŋ bii nya yɛ. Nya bɛɛ la kumbi kɔlta nyalaŋ wakpa.+

14 La yiinaŋ* a wanaa cho wanaa laalaŋ te wa le.+ Chɛlaŋ yɛɛ cho yɛ sakpoyɛi tɛɛŋ a sawaa kiɔɔ biyɔɔ?+ Chɛlaŋ yɛɛ cho yɛ nyɛ teŋgaa tɛɛŋ a nyumndaŋ?+ 15 Nduyɛ, chɛlaŋ yɛɛ cho yɛ Kiliti tɛɛŋ nda Bilaya?*+ Ɔɔ chaŋyɛi cho wana laalaŋndo tɛɛŋ a wana cho wana laalaŋ te wo?+ 16 Nduyɛ chɛlaŋ yɛɛ cho yɛ chiɛi Mɛlɛkaa tɛɛŋ a piɔmnda?+ Kanifuule, Mɛlɛka cho yoomu wo, chiɛi ndɔɔ naŋ cho ni.+ Mi Mɛlɛka dimi aa: “I cho nda hunɔɔ wa tɛɛŋ,+ nduyɛ mi balu nda tɛɛŋ. I cho simnɔŋ Mɛlɛka nda, mi nda bɛɛ simnuŋ wanaa ni.”+ 17 Mi Chɛhowa* dimi vɛlɛ aa: “Lelaŋ, la fula nda tɛɛŋ, mi la faŋaŋ nda ikɛi. Nyɛ o nyɛ cho nyɛ nɔɔlɛi, la pilaŋ ndu le.+ Okoŋ, mi chɛl nya.”+ 18 Mi Chɛhowa,* Mɛlɛka Kpaaya Kpou Kpou Wo dimi vɛlɛ aa: “I cho simnɔŋ finya nya,+ nduyɛ mi nya simnuŋ puaa niaa a chuauwaa niaa laanduaa.”+