Maatiu

23 Okoŋ, mi Chiisu suaa o faŋgaa lo a buɛiyaa nduaa aa: 2 “Wanaa pɛɛku waŋnda sawala Mɛlɛkalaŋ nda a Falisiiya chua foofo Muuse wo. 3 Lelaŋ, nyɛ o nyɛ nda dimul nya pɛ le tosaa, la tosa, kɛ la tual kaala ndalaŋ kɔɔli le. Kanifuule, o cho nyɛ nda dimi wo le nda tosa le.+ 4 A bii pɛ a chua wolɔɔla lusulɛilaŋ a handu chaanda o lachoŋgu,+ kɛ suei bɛɛ ndapila yee le laŋ chuaa le.+ 5 A yeema mi waŋnda chieeya che nyɛ o nyɛ nda tosa.+ Nyɛla waŋnda wounuŋ a diom Mɛlɛkaa leniŋ ndaŋ, ma tosa la ndalaŋ la bɛndu foodoo le ndapila mandaa.+ Nduyɛ ma handu misalaŋ o domala ndalaŋ.+ 6 Te a kuɛ pɛ o dunyaŋ, o fondaŋnda sɔvɛlaŋ nda yeema challe ni. O chiɛila Chuuwa piɛi Mɛlɛka laŋ niŋ bɛɛ, o kpeŋgbeila cho lachi laŋ* nda yeema challe ni.+ 7 Te a wa o luŋ* pɛ, a yeema mi waŋnda yil nda yilɔɔ teŋgeŋndo, nduyɛ ma veelu nda aa Luabai.* 8 Kɛ nya nya, la chɛl ma veelu nya aa Luabai le, kanifuule Wana Pɛɛkaa o pilɛ kpe nya nɔ ni.+ Kɛ nduyɛ, nya kpou puaapiliaa nya cho ni. 9 La veelu wana o wana o lɛŋndeŋ choo naŋ aa finya nya le, kanifuule Finyaa o pilɛ kpe nya nɔ ni,+ hoo o choo choo niŋ. 10 La chɛl ma veelu nya wanaa bɛnduaa laŋ te, kanifuule Wana Bɛndoo o pilɛ kpe nya nɔ ni, ndu cho Kiliti ni. 11 Kɛ wana bɛndoo nya tɛɛŋ nɔ mbo wa buɛiyo le nya.+ 12 Wana o wana heeluŋ pɛ, a cho ndu tusi.+ Kɛ wana o wana tusiŋ pɛ, a cho ndu heelu.+

13 “Kpundɔɔ cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, la kindal chaanda dioo le luɛiyɔɔ o Masale Mɛlɛkaleŋ niŋ. Nyapila luei le, nduyɛ la chɛl vɛlɛ mi wanaa yeema luɛiyɔɔ wa luɛi le.+ 14* ——

15 “Kpundɔɔ cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ!+ Kanifuule, mi la kuɛ ba o ba fee le waŋndo nuuviaa mbo simnuŋ wana laalaŋndo.* Kɛ okoŋ kɔɔli, mi la tosa vɛlɛ mi wana koŋ o huŋ kɔ Kɛhɛna* bɛmbɔɔ le diiŋ mbo hiou bɛɛ nyapila.

16 “Kpundɔɔ cho le nya simlachiaa sumɛiya.+ La dimi aa, ‘Te waŋndo chua pɛ buŋgɛi mbo mɛnaŋ a chiɛi Mɛlɛkaa, o cho suɛi wɔɔŋ te. Kɛ te waŋndo chua pɛ buŋgɛi mbo mɛnaŋ a kooliiyoŋ* o chiɛi Mɛlɛkaa niŋ, o nɔ mbo peelu buŋgɛi keŋ.’+ 17 La cho diɔmaa sumɛiyaa bɛndu! Kooliiyoŋ a chiɛi Mɛlɛka tosa mi kooliiyoŋ wa le Mɛlɛka wo, o kuɛɛnɛ hiou yɛ wa o sɔvɛ? 18 La dimi vɛlɛ aa, ‘Te waŋndo chua pɛ buŋgɛi mbo mɛnaŋ a bandu luamaa lasalaa, o cho suɛi wɔɔŋ te. Kɛ te waŋndo chua pɛ buŋgɛi mbo mɛnaŋ a sala cho o bandu koŋ choo wo, o nɔ mbo peelu buŋgɛi keŋ.’ 19 Nya wanaa sumɛiya haa! Salaa a bandu luamaa lasala tosa mi salaa wa le Mɛlɛka wo, o kuɛɛnɛ hiou yɛ wa o sɔvɛ? 20 Lelaŋ, wana o wana chua pɛ buŋgɛi mbo mɛnaŋ a bandu luamaa lasalaa, mɛɛ o chii mɛnaŋ a ndu vɛlɛ a nyɛ o nyɛ cho lechoo. 21 Nduyɛ, wana o wana chua pɛ buŋgɛi mbo mɛnaŋ a chiɛi Mɛlɛkaa, mɛɛ o chii mɛnaŋ a Mɛlɛka cho o chiɛi koŋ niŋndo.+ 22 Nduyɛ wana o wana chua pɛ buŋgɛi mbo mɛnaŋ a choo choo, mɛɛ o chii mɛnaŋ a kpeŋgbei lemasa Mɛlɛkaa vɛlɛ a wana cho ichali lechoo wo.

23 “Kpundɔɔ cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, mi la yɔŋgu miŋtiiyo, diliiyo, a kiumiŋndo* o tɔ ndɔɔ.+ Kɛ sɔɔŋ hiou wa ŋ sɔvɛ o Sawala Mɛlɛkalaŋ niŋ ndoŋ, mɛɛ sandei,+ nyiɛɛye,+ a waa sakpo cho nuaa yɛ, mi la kpeeŋa muŋ ikɛi. Sɔɔŋ muŋ cho nya kuee le tosaa, kɛ la nɔ mi la kpeeŋa sɔɔŋ cheleŋndoŋ ikɛi le.+ 24 Nya wanaa sumɛiya haa,+ mi la yuei mɛŋma nya kol laŋ le nyaa pɔmbuaa deli leniŋ nda,+ kɛ mɛɛ nyɔɔmiɔɔ cho nuaa yɛ, mi la mel koŋ.+

25 “Kpundɔɔ cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, mi la tuei taalaa a hɛŋgɛiyo o kɔɔ fo fo,+ kɛ hɔlte bɛndeŋ a pululeŋ+ le cho nya le piaa niŋ cha.+ 26 Nya Falisiiyaa sumɛiya haa, la dindi wɔ fɛlɛŋ taalaa ɔɔ hɛŋgɛiyo leniŋ. Okoŋ, o nɔla mbo wa o diandaa o kɔɔ.

27 “Kpundɔɔ cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ!+ Kanifuule, la cho ko maa sɛila nda sui pɔu humboo laŋ.+ O kɔɔ, naŋɔɔ pila la naŋ ni. Kɛ leniŋ ndu, la piaa cha a paala waŋvilɛiya, vɛlɛ a nyɛm wɔɔŋ suu o suu ko. 28 Lende koni nya bɛɛ cho ni. Waŋnda o hɔl, mi la chɔm maa la cho wanaa sakpo. Kɛ kaa mulu muluaŋndo a sɔɔŋ wɔɔŋ suu o suu cho nya ŋ piaa niŋ cha.+

29 “Kpundɔɔ cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ!+ Kanifuule, mi la chɔu sɛila wanaa ndaa suaa le Mɛlɛka wa, nduyɛ mi la bɛɛndiaa sɛila* wanaa cho sakpo wa nyɛkɛndɛi.+ 30 Mi la dimi aa, ‘Te naŋ wa pɛ a teleŋ finyaa naa mamaa, ŋ ve nda sɔɔŋguu ikɛi le wanaa ndaa suaa le Mɛlɛka wa diuwo le.’ 31 Kɛ, la cho chɔmndo kpendekele maa wanaa diu kaŋ wanaa ndaa suaa le Mɛlɛka wa,+ chuauwaa ndaa nya cho ni. 32 Mɛɛ la siou niko wali finyaa nyaa mamaa kandu wo.

33 “Nya kɛuwaa wɔɔŋ wɔɔŋnda haa,+ vɛɛ nya hialuŋ yɛ niŋ yamɛi nda cho nya hunɔɔ kilul le kɔlaŋ Kɛhɛna* ve?+ 34 Le saboo hoo, I cho wanaa suaa le Mɛlɛka wa,+ a wanaa taasiaa, a wanaa pɛɛku waŋnda sawala Mɛlɛkalaŋ nda viomɔɔ naa nya chua.+ La cho apum diyɔɔ+ mi la landu nda o yɔmnde choo, apum mi la lɔɔ nda+ o chiɛila Chuuwa piɛi Mɛlɛka laŋ niŋ, nduyɛ mi la tusi nda nyɛpalaa choo o chiooŋ niŋ,+ 35 le halikpeŋ mi tɔɔyaŋ piɔm wanaa sakpuaa kpou o lɛŋndeŋ choo wa nya choo. Chɔŋ a piɔm wana sakpoo Ebɛl+ mbo kɔ bii a Sɛkalaya po Baluakaya wo, o nya dii o chiɛi Mɛlɛkaa hɔlndɔ, o bandu luamaa lasalaa ikɛiyo.+ 36 A tonya mi dimul nya, kpundɔɔ cho nya tolɔɔ choo le sɔɔŋ nya tosa muŋ ndoŋ kpou.

37 “Ee nya waŋnda Chulusalɛm! La diu diu wanaa ndaa suaa le Mɛlɛka wa, nduyɛ mi la vii vii wanaa nda vem o nya lo wa a poutaŋ.+ Teleŋ o teleŋ I wa kindiŋndo le nya chuuŋgiaa naapilɛ mɛɛ sɔɔ komsaa chuuŋgiaa nuaa chuauwaa nduaa o kumbaŋnda ndɔlaŋ bɛŋgu yɛ. Kɛ la chɛl te.+ 38 Le saboo hoo, Mɛlɛka chii chiɛi nyaa baa faŋa choo.*+ 39 Mi dimul nya, la chi lɛ niŋ ya le haaa mi la huŋ dimi aa, ‘Salaa cho le wana hiŋ hoo o diola Chɛhowa* laŋ niŋndo!’”+