Sam
Chondii Deeve ve. Masiki.*
32 Kɔl kɛndɔɔ cho le wana Mɛlɛka mal haki, mbo kumbu hakila ndɔlaŋ ndo.+
2 Kɔl kɛndɔɔ cho le wana Chɛhowa yiyaŋ lɛ a haki ndɔɔ okɔɔ le wo,+
Wana bala ndɔla cho o lakafa niŋ te wo.
3 Mɛɛ ya kɛɛ le hakila nilaŋ chɔɔmuuwo, mi dialloŋ wu ya pɔli pɔli, nduyɛ mi yaa niilu mɔnɛi biyɔɔ kpɛŋ o kɔl niŋ.+
4 Kanifuule, paaleŋ a nyumndaŋ ba numndo wa ya kindilaa.+
Yoomuaŋ ma wa ya fulaŋndo, mɛɛ wɔɔle kala kalaleŋ le veesiaa nuaa mɛŋndaŋ yɛ. (Sila)
5 O mɛɛlulaŋ kpɔŋ, mi chɔɔmuu haki nuu naa num chua.
I viŋ yɔŋ ni wɔɔŋndo le.+
Mi dimi aa: “I cho yɔŋnda nila wɔɔŋndaŋ chɔɔmuu o Chɛhowa lo.”+
Nduyɛ ma mal la haki le hakila nilaŋ.+ (Sila)
6 Le saboo hoo, wana chɔm num lo lechoo wo wo cho piɛi o numndo,+
A teleŋ wana nɔla ma saaluŋ numndo.+
Nduyɛ, hali mɛŋma hunaŋ bɛɛ ma nɔla mi ma komal ndu le.
7 Num cho fondaŋ ya viaŋnuŋ ndo ni.
A cho ya manda o teleŋ kpundɔɔ niŋ.+
A cho ya balɔɔ, nduyɛ mi deŋi a nyaaloo le mɛɛ ŋ piŋi ya yɛ.+ (Sila)
8 “I cho tosa ma nɔ sinapɛŋgoo, nduyɛ mi pɛɛku num nɛi ŋ nɔ ma kuɛ choo wo.+
I cho num sila, nduyɛ mi handu num hɔlteŋ choo.+
9 Wa maa soo ɔɔ chɔlu yɛyii muuliaŋ* nɔ sinapɛŋgu le wo le,+
O nda wou chiliŋnde o sondo le ndu nanɔɔ,
Mbo hiŋ num o ibuŋ ndo le.”
10 Nyɛ nɛiyaa pila wanaa dɛnɛ wɔɔŋnda sɔla ni.
Kɛ wana dɔu tiindaŋ ndɔɔ o Chɛhowa niŋndo, mbo balu ndu silɔ a kaala ndɔ lo lechoo wo.+
11 Nya wanaa cho sakpo wa, la dɔɔnuŋ nyaale le nyɛ Chɛhowa tosa wo, nduyɛ mi la wa a kɔl kɛndɛ.
Nya wanaa cho sakpo o kɔltaŋ niŋnda kpou, la deŋi choo choo a nyaaloo.