Walta Kiilaa

20 Mɛɛ wooluŋ wooluŋndo pɔlul, mi Pɔɔl veelu wanaa laalaŋnda. Mbo dimul nda diomnda kɔl dɛɛniaalaŋ, mbo choŋguŋ nda. Okoŋ mbo mal le kɔlaŋ Masidooniaa. 2 Mɛɛ o chii wanaa laalaŋnda diomnda kɔl dɛɛniaalaŋ dimul o tandala laŋ niŋ, mbo kua Kilisi. 3 Mbo chii loŋ paŋgoŋ ŋgaa. Kɛ mɛɛ o hiŋ le luɛiyɔɔ o dɛndɔɔ niŋ le kɔlaŋ Siiliaa, mbo sina maa Chuuwa kɛɛsiaa le ma dii ndu.+ Le hei, mbo kɛɛsiaa le miiŋgoo a Masidooniaa. 4 Wanaa kuɛ latulu a ndu wa cho haa ni: Sopata, po Pilɔɔsi wo fulaa Bɛluiya, Aluitakɔɔ+ nda Sɛkuŋndɔɔsi, a fula Tɛsalonaika wa, Kayɔɔ fula Dɛbi wo, Timoti,+ Tichikɔɔ+ nda Tilofimɔɔ,+ fulaa o buŋgɛi Eesiaa ve niŋ. 5 Mi puaa haa hiau naa lachi ma kɔ chum naa Towaasi. 6 Mɛɛ bɔŋaŋ Beedii Nɔ Yiisii Leniŋ Te Wo+ hiou, miŋ luɛi o dɛndɔɔ niŋ le kɔlaŋ Filipai. O palɛi ŋuɛɛnu bɛŋgu, miŋ fuuluu naa nda chua Towaasi. Miŋ chua palɛi i ŋɔmmɛu Towaasi loŋ.

7 Mɛɛ naŋ chuuŋgiaŋ naapilɛ le nyɛdiaa dioo o paale taseleŋ choo o lɔɔ bɛŋgu, mi Pɔɔl kandu suɛi o nda lo, kanifuule ndoo nɔ le kɔŋndaŋ diimandɔɔ. Le hei, mbo lo suɛi o nda lo haaa mi ditɛɛŋndo fuuluu. 8 Lambuilaŋ la wa tiŋ chalaŋ o chiɛi choo choo naŋ chuuŋgiaŋndo niŋ. 9 Teleŋ Pɔɔl wa suɛiyo, po chua piaandu pilɛ diolaŋ aa Yutikɔɔ wa ichali o wundɛiyo* mbo hiaunuŋ o luaŋ yikpi. O lo o luaŋ, mbo fula o chiɛi choo choo wo helɔɔ le yaa mbo del lɛŋ. Mɛɛ nda kɔ chua ndu, o wa niŋ o vilɛiyo. 10 Kɛ mi Pɔɔl tual lɛŋ mbo kɔ hini ndu choo, mbo kɔmaŋ ndu.+ Mbo dimi aa: “La tambu kɔl te. O cho yoomu.”+ 11 Okoŋ mi Pɔɔl miiŋgu chiɛiniŋ, ma kɔ kandu nyɛdiaa dioo. Mbo hiau lachi a suɛi haaa mi paaleŋ le sia. Mbo mal mbo kuaŋnuŋ. 12 Mi waŋnda huŋ chua po chua piaandoo hoo, nduyɛ mi nda kpou duaunuŋ nyaale tau le mɛɛ o miiŋgu yoomu yɛ.

13 Okoŋ miŋ kɔ luɛi o dɛndɔɔ niŋ, miŋ kua Asɔɔ, kɛ mi Pɔɔl ndu kua a ŋpelu. A mɛɛ o dimul naa yɛ, loŋ naŋ nɔ le ndu keiyo chuaa o dɛndɔɔ niŋ ni. 14 Mɛɛ o komal naa Asɔɔ, mbo luɛi o dɛndɔɔ niŋ, miŋ kua Mitiliŋ. 15 Diimandɔɔ, miŋ mal o dɛndɔɔ niŋ miŋ fuuluu Chiɔsi. O paale diiŋ ndɔleŋ choo, miŋ kua Samosi. Diimandɔɔ, miŋ fuuluu Miletɔɔ. 16 Pɔɔl ndoo kɛɛsiaa le mbo lo kɔlaŋ o dɛndɔɔ niŋ haaa mbo hiou Ɛfisɔɔ.+ Ndoo yeema mbo chua teleŋndo o buŋgɛi Eesiaa ve niŋ te, kanifuule o wa keleŋaa le mbo fuuluu Chulusalɛm+ o paale Bɔŋaŋ Pɛŋtikɔɔsi leŋ choo.

17 Pɔɔl lo Miletɔɔ mbo viam waŋnda le ma kɔ veelul ndu bɛnduaa kundaa o Ɛfisɔɔ niŋ. 18 Mɛɛ nda hiŋ, mbo dimul nda aa: “Chɔŋ a paale tasele ya luɛi o buŋgɛi Eesiaa ve niŋnde, nyapila sina mɛɛ ya wa nya tɛɛŋ yɛ.+ 19 I wa wali Masanɔɔ tosaa o tusiŋ bɛndoo niŋ,+ a mɛmiaŋ o lahɔl. Nduyɛ mi sɔɔŋ palaŋ komal la le kɛɛsiaala wɔɔŋnda Chuuwa ndaa nɔ le ya laŋ. 20 La sina maa nyɛ o nyɛ cho nyɛ tɔnɔ le nya, I viŋ nya ndu le. Mi pɛɛku nya waŋnda o hɔl kpendekele,+ nduyɛ mi dimi yooŋgu kɛndɔɔ chiɛiyo a chiɛiyo.+ 21 Mi dimul Chuuwa a Kilikiiya yooŋgu Mɛlɛkaa nyɛkɛndɛi le ma wookuŋ+ ma muliŋ naa Mɛlɛka chua, nduyɛ ma laalaŋ o Masanɔ naa Chiisu niŋ.+ 22 I nɔ mi tol nɛi chɔmaa nyina diandaa kɔɔli mi kuɛ Chulusalɛm suŋ suŋ, mi che bɛɛ I sina nyɛ cho ya lakɔ yɔŋnɔŋ loŋ ndo le. 23 Chiee o chiee ya kuɛ pɛ, nyina diandaa cho ya dimullo maa a nɔ le ya dɔwɔɔ o chiɛi manyumndo niŋ, nduyɛ ma tusi ya nyɛpalaa choo.+ 24 Kɛ a koŋ kpou, I chue bɛɛ yoomu nuu maa o cho nyɛ sɔvɛ le ya le. O ya hauba kinɛiyo cho le mi lo lechoo haaa o mɛɛlulaŋ ni, nduyɛ mi chii wali Masanɔɔ Chiisu ke ya le tosaa wo,+ ndu yɔŋnuŋ ni maa yooŋgu kɛndɔɔ dimioo a kɛndɛi bɛnduii Mɛlɛkɛi okɔɔ.

25 “I sina maa nya ya kei yooŋgu kɛndɔɔ dimul a Masale Mɛlɛkaleŋ okɔɔ wa kpou, wana pilɛ bɛɛ chi lɛ niŋ ya le. 26 Lelaŋ ya veelu nya ni, le mi la wa lesei paale hauleŋ ndeŋ maa kooma wana o wana cho ya o lebol te.+ 27 Kanifuule, I viŋ nya nyɛ o nyɛ Mɛlɛka dimi le tosaa wo le.+ 28 Lelaŋ, la manda nyapila+ vɛlɛ a wanaa Mɛlɛka ke nya le mandaa wa. Nya nyina diandaa yulu iso ni le waa wanaa chua chilaŋ nda,+ le mi la manda kunda Mɛlɛkaa,+ o ndupila pendu kpali a kooma Po ndɔɔ waŋ ndo.+ 29 I sina maa te I huŋ faŋaŋ pɛ, visiaa biyaa cho nya luɛiyɔɔ tɛɛŋ,+ ma bii wanaa laalaŋnda ŋuasu ŋuasu. 30 Waŋnda cho nya fula tɛɛŋ ma muli tonyaa balaŋ amakɔɔ, le mi wanaa laalaŋnda tol nda kɔɔli.+

31 “Lelaŋ, la wa yekeŋ. La loonuŋ maa le wɔsilaŋ la yaa,+ idii a ichɔl, I wa nya pilɛŋ pilɛŋnda silaa a mɛmiaŋ o lahɔl. 32 Suŋ suŋ niŋ, I mal nya Mɛlɛka o ba. Nduyɛ yooŋgoo a kɛndɛi nduɛi bɛnduei okɔɔ cho nya manda. Yooŋgoo hoo cho nya yoomuaŋ luei, nduyɛ mbo ke nya nyɛm kɛndɛŋ o kɛsul wanaa laalaŋaa* o hɛli wa kpou.+ 33 I luei lehɔl le kaniŋ humboŋ, ɔɔ kooliiyoŋ, ɔɔ nyɛ chuɛɛnaŋ pila le.+ 34 Nyapila sina maa a bala nilaŋ ndaŋ ya wa wallo ni, le o diaa sɔlaa le yapila+ a wanaa ndaa liila ya wa. 35 I chɔm nya o nyɛ o nyɛ niŋ maa, te la tosa pɛ wallo kalaŋ o nɛi waa nuaa choo,+ la nɔla mi la mala wanaa nɔ kpaaya tosaa nyɛ le wa. Nduyɛ la loonuŋ nyɛ Masanɔɔ Chiisu pila dimi wo. Mbo dimi aa: ‘Waŋndo nyɔɔ kioo wana hiau wa a kɔl kɛndɛ,+ a waŋndo num nyɔɔ kioo.’”

36 Mɛɛ o chii sɔɔŋ muŋ dimi, mi nda kpou baŋ wulaŋ ma piɛi. 37 Okoŋ, mi nda kpou piɔl a chaŋndo, ma kɔmaŋ Pɔɔl, nduyɛ ma sɔsa ndu kuuwo. 38 Le mɛɛ o dimul nda maa a chi lɛ niŋ ndu kposoŋ te yɛ,+ nda tambu kɔllo tau ni. Okoŋ ma liila ndu o dɛndɔɔ.