Luomaŋnda
14 La bii wana kindu o laalaŋ ndɔɔ niŋ te wo nyɛkɛndɛi.+ Nduyɛ la kilul ndu iyama le mɛɛ nya nɔ yiyaŋnda pilɛ le yɛ le. 2 Wana laalaŋ ndɔɔ kendu wo, mbo de nyɛdiaa kɛ kɛ. Kɛ wana laalaŋ ndɔɔ kindu le wo, lam yɔŋaa koni o dia ni. 3 Wana dia hoo nyɛ o nyɛ fee wo, o nɔ mbo pɛɛsa wana hɛli nyɛdiaa laŋ ndo le. Nduyɛ wana hɛli hoo wo, o nɔ mbo kilul wana dia nyɛ o nyɛ fee wo iyama le.+ Mɛlɛka chii wana koŋ chɛlɔɔ. 4 Wana maavɛɛnɛ ŋ cho yɛ le ma kilul buɛi pilaa yamɛi?+ Masanɔ ndɔɔ pila sina ni te o cho pɛ wana kɛndɛ ɔɔ wana wɔɔŋ.+ A mala Chɛhowa* wo, o nɔla mbo sɔla batiuwaa.
5 Waŋnda apum yiyaŋ maa paaleŋ lepum le bɛnda mbo hiau palɛi tuɛi.+ Apum yiyaŋ maa palɛi kpou, nyɛ pilɛ kpe i cho ni.+ O bɛnda mi wana o wana yiyaŋ o kɔl ndɔɔ niŋ maa nyɛ o laalaŋndo cho tonya. 6 Wanaa chua paaleŋ lepum maa le cho teŋgeŋndo cho hei tosaa le Chɛhowa* saŋgalaa. Wanaa dia nyɛ o nyɛ fee wa cho ndu dioo le Chɛhowa* saŋgalaa, kanifuule balikaa nda cho ndu mello ni le keŋ.+ Wanaa hɛli nyɛdiaa laŋ nda bɛɛ cho laŋ hɛlioo le Chɛhowa* saŋgalaa, kanifuule balikaa nda cho ndu mello ni le keŋ.+ 7 Naa kpou, o cho le naapila suee le naŋ cho yoomu le.+ Nduyɛ te ŋ vi pɛ, ŋ vi le naapila suee le. 8 Te ŋ wa pɛ yoomu, le Chɛhowa* naŋ cho yoomu ni.+ Nduyɛ te ŋ vi pɛ, le Chɛhowa* naŋ vi ni. Lelaŋ, ŋ wa yoomu, ŋ wu, le Chɛhowa* naŋ cho ni.+ 9 Le sabu koŋ Kiliti vi ni mbo miiŋgu vɛlɛ yoomu, le mbo wa Masanɔɔ le wanaa cho yoomu wa a wanaa vi wa.+
10 Le yɛɛnɛ ma kilul puaapilɛnɔ numndo yamɛi?+ Ɔɔ, le yɛɛnɛ ma pɛɛsa puaapilɛnɔ numndo? Kanifuule, naa kpou cho hunɔɔ lasisi o kpeŋgbei* lemasa Mɛlɛka wo lachi mbo kɔɔsa naa.+ 11 I cho i poonyiaa aa: “Chɛhowa* dimi aa, ‘I mɛnaŋ po+ maa wana o wana cho ya wulaŋ beŋ, nduyɛ mi wana o wana sina maa ya cho Mɛlɛka ni.’”+ 12 Wana o wana cho hunɔɔ kona dɔɔnɔŋ naa Mɛlɛka chua le ndupila.+
13 Lelaŋ, la pɛŋgi yamaŋ kilulaŋndo vellaa velle.+ La kɛɛsiaŋ o lakɔl maa, fɛɛŋ bɛɛ la tosa nyɛ o nyɛ tosa mi puaapilɛnɔ nɔ laalaŋ kala le wo boŋ o Mɛlɛka piɛiyo niŋ te.+ 14 Mɛɛ ya cho buɛi Masanɔɔ Chiisu wo yɛ, I sina kpendekele maa nyɛ o nyɛ naŋ dia cho o nɔɔlɛi le.+ Kɛ te waŋndo ndupila yiyaŋ pɛ maa nyɔɔ cho o nɔɔlɛi, mɛɛ le ndu, o cho o nɔɔlɛi. 15 Te puaapilɛnɔ numndo tambu pɛ kɔl le nyɛdiaa ŋ dia wo, mɛɛ a cho lɛ kaala chɔm te.+ Ndu bɛɛ Kiliti vi le ndu. A nɔ ma dii laalaŋ ndɔɔ le nyɛdiaa ŋ dia wo le.+ 16 Lelaŋ, la tosa mi wana o wana dimi sɔɔŋ wɔɔŋndoŋ a nyɛ nya laalaŋ maa o naŋ le tosaa wo okɔɔ le. 17 Kanifuule, o cho nyɛ waŋndo dia wo ɔɔ nyɛ o kol lo le tosa mbo luɛi o Masale Mɛlɛkaleŋ niŋ te.+ Kɛ o nɔ mbo wa sakpo, mbo wa wana kɔl nyulu, nduyɛ mbo wa wana nyaale. Nyina diandaa mala ndu mbo wa wana waa nuaa. 18 Wana o wana wa pɛ chiɔɔ le Kiliti o nɛiyo hoo choo, wana koŋ cho simnɔŋ wana kɛndɛ Mɛlɛka a waŋnda chieeya o hɔl.
19 Lelaŋ, ŋ tosaŋ sɔɔŋ huŋ a kɔl nyuloo woŋ,+ a sɔɔŋ naŋ lueinaŋ yoomuaŋ vellaa velle woŋ.+ 20 La tɛɛmbuu wali Mɛlɛkaa le nyɛdiaa le.+ Tonya, nyɛdiaa kɛ kɛ fee naŋ le dioo. Kɛ o bɛnda ma de nyɛdiaa tosa mi waŋndo o pilɔɔ boŋ o Mɛlɛka piɛiyo niŋndo le.+ 21 O bɛnda ma de visioŋ, ɔɔ ma kol muɛiyaŋ, ɔɔ ma tosa nyɛ o nyɛ tosa mi puaapilɛnɔ numndo boŋ o Mɛlɛka piɛiyo niŋndo le.+ 22 Lelaŋ, laalaŋ ŋ nɔ wo, o wa nya tɛɛŋ nya Mɛlɛka. A cho wa a kɔl kɛndɛ te kɔl iyama numndo kilul num iyama le tosaa nyɛ ŋ yiyaŋ maa o cho o kɛndɛ wo le. 23 Kɛ te waŋndo kiisaŋ pɛ a nyɛdiaa mbo de ndu, mɛɛ kɔl iyama ndɔɔ chii ndu yamɛi kilul. Kanifuule, o di ndu a laalaŋ te. Nyɛ o nyɛ naŋ tosa pɛ mbo tolnuŋ o laalaŋndo choo le, mɛɛ hakioo o cho ni.