Timoti Tasoo
3 Diomnda dimiŋ laŋ ndaŋ la cho tonya: Te waŋndo wa pɛ kindiŋndo le mbo simnuŋ wana chua chilaŋ o kundaa niŋndo,+ mɛɛ wali kɛndɔɔ pila o yeema koŋ ni. 2 Wana chua chilaŋ o kundaa niŋndo, tɔɔ wɔɔŋ nɔ mbo wa ndu choo le. O nɔ mbo nɔ lanɔɔ o pilɛ kpe, mbo wa wana tiu kɔl ndɔɔ ba, mbo wa wana taasi,+ mbo wa wana tosa sɔɔŋ kpɛ kpɛ wo, mbo wa wana chaa mialla biyɔɔ wo,+ nduyɛ mbo wa wana chaa pɛɛkoo wo.+ 3 O nɔ mbo wa wana hiu mamuɛi kolɔɔ le.+ O nɔ mbo wa wana kaalaa ŋkani le,+ o nɔ mbo wa wana lasɔŋgɔ le,+ kɛ o nɔ mbo chɔm sinapɛŋgoo.+ 4 O nɔ mbo wa wana chaa yuŋgu ndɔɔ biyɔɔ wo. Chuauwaa nduaa nɔ ma wa wanaa tuɛiyaa isɔɔ, nduyɛ ma wa wanaa biinuŋ bila.+ 5 (Kanifuule, te waŋndo chiee yuŋgu ndɔɔ biyɔɔ le, vɛɛ o nɔla yɛ mbo manda kunda wanaa laalaŋaa Mɛlɛkaa?) 6 O nɔ mbo wa wana yiŋ sɛnɛiyo* le,+ yɔŋii o luɛi yoŋgaa, okoŋ ma huŋ kilul ndu yamɛi maa Setana.* 7 Nduyɛ o nɔ mbo nɔ tɔɔ kɛndɔɔ wanaa cho wanaa laalaŋ te wa tɛɛŋ,+ yɔŋii o tambu tɔɔ, okoŋ mbo hau o yaŋɔɔle Setana* leŋ.
8 Buɛiyaa malalaŋnda bɛɛ nɔ ma biinuŋ bila. A nɔ ma wa wanaa sɔɔŋ le diiŋ diiŋ te. A nɔ ma yiŋnuŋ o mamuɛi niŋ te. A nɔ ma nɔ hɔlteŋ le nyɔɔŋ sɔlaa o kafalaŋ choo le.+ 9 A nɔ ma bii laalaŋ leKilisiɔŋndo kpiŋ, ndu cho yɛ sɔɔŋ viaŋnaŋ Mɛlɛkaŋ ni. Nduyɛ ma nɔ kɔl iyama walaŋndo.+
10 A nɔ ma tofa nda fɛlɛŋ le sinaa te a suliŋ pɛ le wallo. Okoŋ, te tɔɔ wɔɔŋ ve nda choo le,+ a tiuba ma wa buɛiyaa malalaŋnda.
11 Waŋ laanduaa bɛɛ nɔ ma biinuŋ bila. A nɔ ma wa chaanda tɔɔ tɛɛmbuuwo le.+ A nɔ ma wa wanaa tiu kɔlta ndalaŋ ba, nduyɛ ma wa sakpo o nyɛ o nyɛ niŋ.+
12 Buɛi malalaŋndo nɔ mbo nɔ lanɔɔ o pilɛ kpe. O nɔ mbo wa wana chaa yuŋgu ndɔɔ biyɔɔ wo, nduyɛ mbo bii chuauwaa nduaa nyɛkɛndɛi. 13 Te buɛiyaa malalaŋnda tosa pɛ wali nda nɔ le tosaa wo nyɛkɛndɛi, bɛɛleŋ pila nda sɔla ni. Nduyɛ a nɔla ma soo fɛɛsɛŋ a laalaŋ nda nɔ o Chiisu Kiliti niŋndo okɔɔ.
14 Mi che bɛɛ I nɔ o kɔl le hunɔɔ loŋ o teleŋ biŋgi bɛŋgu, kɛ I cho num sɔɔŋ muŋ poonyial o yau choo. 15 Okoŋ te I keleŋa hunɔɔ le, yauwo hoo cho num mala ma sina mɛɛ ŋ nɔ ma wa o yuŋgu Mɛlɛkaa niŋ yɛ.+ Nduyɛ Mɛlɛka cho yoomu wo, yuŋgoo hoo cho kunda ndɔɔ ni. Kundaa hoo cho yɛ suŋgbule saa tonyaa leŋ ni. 16 A tonya, suɛi wa hei i viaŋnaŋ a yɔŋgɔŋndo o Mɛlɛka lo okɔɔ ve, i cho suɛi kɔndɔfili bɛndu: ‘Mi Chiisu simnuŋ wanachioo,+ mi Mɛlɛka siiŋguu ndu wana sakpoo mɛɛ o miŋgi ndu o inyinaya.+ Mbo fula maalikɛiya o hɔl.+ Mi waŋnda dimi yooŋgoo a ndu okɔɔ o lekaa o lekaa niŋ.+ Mi waŋnda o chieeŋndo niŋ laalaŋ ndu,+ nduyɛ ma chɛl ndu a biiloo o choo choo niŋ.’