Lɛvitikɔɔ

5 “‘Te o yɔŋ pɛ mi waŋndo che waŋndo suɛi wɔɔŋnde tosaa, ɔɔ mbo sina a ndi okɔɔ, nduyɛ mbo tuei maa a yeema seiya le suɛi keŋ,+ kɛ mbo kɛɛ le seileŋ timbioo, mɛɛ wana koŋ tosa hakioo. Nduyɛ, a nɔ ma tusi ndu nyɛpalaa choo le haki koŋ.

2 “‘Ɔɔ te o yɔŋ pɛ mi waŋndo pilaŋ nyɛ o nyɛ nɔɔlɛi, o wa visi nɔɔlɛi vi wo, o wa chɔlu nɔɔlɛi, ɔɔ nyaa yoomaa balu kunda ma wa a nɔɔlɛi ya,+ wana koŋ bɛɛ simnuŋ o nɔɔlɛi. Nduyɛ o yɔŋ bɛɛ mbo sina a ndi okɔɔ le, hakioo o tosa ni. 3 Ɔɔ te o yɔŋ pɛ mi waŋndo ve o sina choo le mbo pilaŋ wana nɔɔlɛiyo,+ ɔɔ nyɛ o nyɛ tosa mbo simnuŋ o nɔɔlɛi Mɛlɛka o hɔl, okoŋ kɔɔli mbo huŋ sina a ndi okɔɔ, mɛɛ hakioo o tosa ni.

4 “‘Ɔɔ te o yɔŋ pɛ mi waŋndo ve o sina choo le mbo lau le mɛnaŋndo le nyɛ tosa, o wa suɛi kɛndɛ ɔɔ suɛi wɔɔŋ, mɛɛ o mɛɛ suɛi keŋ i wa, okoŋ mbo huŋ mɛɛlu sina maa lauwo o lau ni le mɛnaŋndo, mɛɛ o tosa hakioo.+

5 “‘Sɔɔŋ muŋ kinɛi, i pilɛ bɛɛ waŋndo tosa pɛ, o nɔ mbo huŋ chɔɔmuu+ haki o tosa wo. 6 O nɔ vɛlɛ mbo hiŋ a sala hakioo o ya Chɛhowa lo, le haki o tosa wo.+ Chɔlu laandoo o nɔ ni mbo hiŋ le sala hakioo, o wa saa fɔŋndɔ laandoo ɔɔ chuiŋ fɔŋndɔ laandoo. Okoŋ, mi wana soliaa lasalaa nyuna le malɔɔ hakioo le haki ndɔɔ.

7 “‘Te o nɔla saa yɔŋgoo le sala hakioo le, o nɔ mbo hiŋ a piiŋnda a ŋiɔɔŋ ɔɔ kaŋgbuaa fɔŋnduaa a ŋiɔɔŋ+ o ya Chɛhowa lo le haki ndɔɔ. O pilɛ le sala hakioo, nduyɛ o pilɔɔ le sala luamaa.+ 8 O nɔ mbo hiŋ a nda o wana soliaa lasalaa lo, mi wana soliaa lasalaa soli fɛlɛŋ o cho le sala hakioo wo sala. O nɔ mbo kelu ndu bololaŋ, kɛ o kialu kpali le. 9 O nɔ mbo fasaŋiaa kooma sala hakioo hoo ma tiŋ o kpeŋguŋ bandu luamaa lasalaa vellaa velle, okoŋ mbo hulu kooma tuaŋ kpou o bandu luamaa lasalaa bɛŋgu.+ Sala hakioo o cho ni. 10 O nɔ mbo soli o pilɔɔ sala luamaa, mɛɛ nɛila chɔmaalaŋ+ la cho le sala luamaa solioo yɛ. Nduyɛ mi wana soliaa lasalaa soli sala malɔɔ lahakioo le haki o tosa wo, okoŋ mbo sɔla malɔɔ hakioo.+

11 “‘Kɛ te o nɔla piiŋnda a ŋiɔɔŋ ɔɔ kaŋgbuaa fɔŋnduaa a ŋiɔɔŋ sɔla le, mɛɛ o nɔ mbo hiŋ a kpeyaŋ kɛndɛ kɛndɔɔ ɛfaa cha*+ le sala hakioo. O nɔ mbo muuliaŋ ndu a filaŋkiŋsɛŋ ɔɔ machuɛi le. Kanifuule, sala hakioo o cho ni. 12 O nɔ mbo hiŋ a ndu o wana soliaa lasalaa lo, nduyɛ mi wana soliaa lasalaa kɔndu ndu baa cha maa tamasi, mbo lom ndu o bandu nda luam salalaŋ le ya Chɛhowa wo choo. Sala hakioo o cho ni. 13 Hakilaŋ ndaŋ kinɛi, o kɛ kɛ o tosa pɛ, wana soliaa lasalaa cho sala malɔɔ lahakioo soli le haki o tosa wo, okoŋ mbo sɔla malɔɔ hakioo.+ Sala tɔ cho lo wo, wana soliaa lasalaa nɔ ndu ni,+ mɛɛ nda tosa a sala ŋkullo+ yɛ.’”

14 Mi Chɛhowa dimul vɛlɛ Muuse aa: 15 “Te o yɔŋ pɛ mi waŋndo ve o sina choo le mbo tosa hakioo a nyɛm diandaŋ ya Chɛhowa woŋ,+ o nɔ mbo chuu ya Chɛhowa saa piaandu kɛndɛ kɛndɔɔ o chɔluaa nduaa tɛɛŋ le sala hakioo.+ Baa ndɔɔ o kaniŋ humbuŋ siɛkɛlloŋ niŋ nɔ mbo wa mɛɛ nda tuu siɛkɛlloŋ o fondaŋ diandaa+ yɛ. 16 O nɔ mbo paawa* nyɛsɔlaa, mbo sulaŋ a haki o tosa a fondaŋ diandaa wo. Te o nɔ pɛ le paawaa 100, o handu 20 lechoo.+ O nɔ mbo ke wana soliaa lasalaa, okoŋ mi wana soliaa lasalaa nyuna le malɔɔ hakioo+ le ndu a saa piaandu o cho yɔŋgu le sala hakioo wo. Nduyɛ, mbo sɔla malɔɔ hakioo.+

17 “Te waŋndo tosa pɛ sɔɔŋ ya Chɛhowa dimi maa la nɔ mi la tosa le woŋ mbo luɛi o hakioo niŋ, o yɔŋ bɛɛ mbo ve o sina choo le, hakioo o tosa ni. Nduyɛ, a nɔ ma tusi ndu nyɛpalaa choo le haki koŋ.+ 18 O nɔ mbo yoo wana soliaa lasalaa saa piaandu kɛndɛ kɛndɔɔ o chɔluaa nduaa tɛɛŋ, mbo sulaŋ a sala hakioo.+ Nduyɛ, mi wana soliaa lasalaa nyuna le malɔɔ hakioo le ndu, le haki o tosa o ve o sina choo le wo. Okoŋ, mbo sɔla malɔɔ hakioo. 19 Sala hakioo o cho ni, kanifuule o tosa hakioo a ya Chɛhowa.”