Koloniko Diiŋ Ndɔɔ

26 Yusaya+ wa wɔsilaŋ 16 mi waŋnda Chuda kpou chua ndu, ma siiŋguu ndu masaa o foofo Amasaya finya ndɔ wo.+ 2 Mɛɛ nda kumbu masaa* naa nda kumbu finyaa nduaa mamaa wa,+ mbo miŋgi Ɛlati+ biyɔɔ, mbo miŋgi ndu taŋgul, mbo miŋgi ndu Chuda choo. 3 Yusaya+ wa wɔsilaŋ 16 mbo simnuŋ masaa, nduyɛ mbo chii wɔsilaŋ 52 o masaleŋ choo Chulusalɛm. Kala ndɔ ndoo nɔ diolaŋ ni aa Chɛkolaya, wana waa Chulusalɛm.+ 4 Mbo hiau lachi a nyɛ bɛnda Chɛhowa o hɔl lo tosaa, mɛɛ Amasaya finya ndɔ tosa yɛ.+ 5 Mbo hiau lachi a Mɛlɛka piɛiyo o palɛi Sɛkalaya ve niŋ. Nduyɛ, Sɛkalaya pɛɛku ndu le mbo nɔ siooŋii Mɛlɛka tonyaa ni. Mi Chɛhowa, Mɛlɛka tonyaa duau ndu sala boondii o wa ndu piɛiyo ve.+

6 Mbo kɔ chiŋalaŋ Filitiaŋnda a sɔŋgɔɔ,+ nduyɛ mbo yam Kaati,+ Chabina,+ a Asidɔɔ.+ Okoŋ, mbo taŋgul chieeŋ bɛndoŋ o tanda Asidɔɔ wo niŋ a o tanda Filitiaŋnda niŋ. 7 Mi Mɛlɛka tonyaa hiau lachi a ndu malaa le Filitiaŋnda, Aluabuiyaa+ wa ichali Kɔbaa wa, vɛlɛ a waŋnda Mɛyunim yomɔɔ. 8 Mi Amɔnaitiiya+ kandu Yusaya paawaa* malɔɔ o ba. Mi tɔɔ ndɔɔ kua a tiuwo haaa Ichipi, kanifuule mbo simnuŋ wana kpaaya bɛndu bɛndu. 9 Okoŋ kɔɔli, mi Yusaya taŋgul chiɛila choo choo laŋ+ Chulusalɛm o Dio Kpakioo o Sɔŋgioo,+ Dio Kpakioo o Kpoloŋndo,+ vɛlɛ a Suŋgbuleŋ, nduyɛ mbo kindi laŋ poŋ. 10 Okoŋ kɔɔli, mbo taŋgul chiɛila choo choo laŋ+ o pollo niŋ, nduyɛ mbo tuau sooŋnda mamɛŋndaŋ tau (kanifuule ndoo nɔ chɔluaa tau tau). Mbo taŋgul vɛlɛ chiɛila choo choo laŋ o tanda Siɛfila wo niŋ a o lɛŋnde dɛŋgbɛleŋ niŋ. Le mɛɛ ndoo kaala wali yondoo yɛ, ndoo nɔ wanaa ndaa tosa wallo o chiɔɔŋ ndɔŋ niŋnda, a wanaa ndaa tosa wallo o kpelela ndɔla makilepiilaŋ o pemboŋ choo a o Kamɛɛ niŋnda.

11 Okoŋ kɔɔli, mi Yusaya sɔla puaa chɔuwaa wa a bɛɛndiaŋ le chɔuwo wa. Nduyɛ, mi ndaa kuɛ o chɔuwo a kɔɔnaa a kundalaŋ. Chɛyɛɛ wana ndɔ poonyiaa+ nda Maasɛya wana ndɔ malaa chɔm nda ni,+ nduyɛ ma poonyiaa nda diolaŋ o lepula, o nɛi chɔmaa Hananaya wo bɛŋgu. Hananaya wa waŋndo o pilɛ o laŋgbaa kalaa masaa tɛɛŋ. 12 Wanaa wa yuŋgula leboltaŋ nduyɛ ma wa puaa chɔuwaa kpaayaa bɛnduaa haa bolle wa, a wa kpou kpou 2,600. 13 Puaa chɔuwaa wa nda o ba bɛŋgu nduyɛ ma wa a bɛɛndiaŋ le chɔuwo wa, a wa 307,500. Ndaa nɔ kpaayaa le masaa tooloo mbo sɔŋga a yaamɔɔwaa nduaa.+ 14 Mi Yusaya bɛɛndiaa puaa nduaa chɔuwa kpou, okoŋ mbo ke nda boola chɔulaŋ, baltaŋ,+ mɔsiltaŋ, domala ŋchiliŋndaŋ,+ chiŋuaŋ, a pouta faandalaŋ.+ 15 Okoŋ kɔɔli, mbo tosa mi puaa chaa maasiila chɔulaŋ toosiaa wa toosial ndu maasiila chɔulaŋ o Chulusalɛm niŋ. Okoŋ, mbo kɛsi laŋ o chiɛila choo choo laŋ choo+ a o sɔŋgila kpakioo. Nduyɛ, laa tiuba mi la wuu chiŋuaŋ vɛlɛ a pouta bɛndulaŋ. Le hei, mi tɔɔ ndɔɔ tiu ba o ba fee. Kanifuule mbo sɔla malaa tau, nduyɛ mbo simnuŋ wana kpaaya bɛndu.

16 Kɛ dimioo nuaa mi Yusaya sɔla kpaayaa, mbo luɛi yoŋgaa, nduyɛ mi hei chuu ndu kpundɔɔ. Mbo tosa hakioo a Chɛhowa Mɛlɛka ndɔɔ, mɛɛ o luɛi o chiɛi Chɛhowa wo niŋ le nyɛm chuŋ kɛndɔŋ lomɔɔ o bandu luamaa nyɛm chuŋ kɛndɔɔ choo.+ 17 O lepilɛ niŋ kpe, mi Asaluaya wana soliaa lasalaa, a wanaa soliaa lasalaa cheleŋ le Chɛhowa ŋwaŋ 80 chɔm kɔl simulaa ma luɛi ndu kɔɔli. 18 Okoŋ ma kuel Masaa Yusaya, ma dimul ndu aa: “O bɛnda kposoŋ le ma lom nyɛm chuŋ kɛndɔŋ o Chɛhowa lo le!+ Wanaa soliaa lasalaa kinɛi nɔ ni ma lom nyɛm chuŋ kɛndɔŋ, kanifuule nda fula o pulale Elɔŋ ndeŋ choo ni,+ nduyɛ nda sɔla dindioo le hei tosaa ni. Fula o chiɛi Mɛlɛkaa niŋ, kanifuule a kɛɛ le ndu diikɔŋndo. Nduyɛ, Chɛhowa Mɛlɛka cho num lebɛɛ ke le hei le.”

19 Kɛ tɛŋgɛ leyiŋndo wa niŋ Yusaya o ba le nyɛm chuŋ kɛndɔŋ lomɔɔ. Le hei, mbo duaunuŋ tumbe o kala kala.+ Teleŋ o wa tumboo dɔɔnɔŋndo a wanaa soliaa lasalaa wo, mi lɛlɔŋ+ choŋ ndu o itendu wanaa soliaa lasalaa o hɔl o chiɛi Chɛhowa wo niŋ, naa o wa bandu luamaa nyɛm chuŋ kɛndɔɔ ikɛi ya. 20 Mɛɛ Asaluaya masa wanaa soliaa lasalaa, a wanaa soliaa lasalaa tuaa kpou tofa ndu, ma cha ndu lɛlɔŋ ŋ tiuwaa o itendu! Le hei, ma soli ndu o bɛɛ chɔ chɔ, nduyɛ mi ndupila bɛɛ keleŋa fula, kanifuule mi Chɛhowa duau ndu lɛlɔŋ choo.

21 Lɛlɔŋ lo Masaa Yusaya choo haaa mbo sɔla piɔmndo. Nduyɛ le mɛɛ o wa a lɛlɔŋ yɛ, ma soli ndu o chiɛi Chɛhowa wo niŋ, ma kɛsi ndu o fondaŋ yololiɔɔ.+ Chotam po ndɔ wa chiɛi lemasaa hɔlteŋ ni, mbo wa waŋnda sɔɔŋ dimioo tɛɛŋ o lɛŋndeŋ niŋ.+

22 Sɔɔŋ cheleŋ cho a Yusaya okɔɔ chɔŋ o kandɔŋndo haaa o mɛɛlulaŋ ndoŋ, Aisaya wana suaa le Mɛlɛka wo,+ po Amɔɔsi wo poonyiaa muŋ ni. 23 Okoŋ mi Yusaya wu,* ma kumbu ndu naa nda kumbu finyaa nduaa mamaa wa, kɛ o yondo wa le masaa waa wo niŋ. Kanifuule ma dimi aa: “Wana ŋlɛlɔɔ o cho ni.” Nduyɛ, mi Chotam po ndɔ+ miiŋgu o masaleŋ choo o foofo ndɔɔ.