Timoti Tasoo
5 Te a wa pɛ suɛi o bɛndu yuuwo lo,+ suaa o ndu lo a kalaŋ te. Kɛ soo o ndu lo mɛɛ ŋ suaa o finya numndo yɛ, ma soo o feleŋguaa lo mɛɛ ŋ suaa o bɛndaa numnda ɔɔ pɔmbuaa numnda lo yɛ. 2 Soo o wɛɛŋaa yuuwa lo mɛɛ ŋ suaa o kala numndo yɛ, nduyɛ ma soo o chuaa laanduaa lo o nɛi diandaa niŋ mɛɛ ŋ suaa o yemaa numnda lo yɛ.
3 Ke waŋ laanduaa vii piaanduaa ma wa kpeele wa* bɛɛleŋ.+ 4 Kɛ te wana pɔnɔ ndɔ vi wo nɔ pɛ chuauwa ɔɔ chuauwaa mamaa, chuauwaa kaŋ nɔ fɛlɛŋ ma pɛɛku le sɔɔŋ chɔm maa a cho a yɔŋgaŋ o Mɛlɛka lo woŋ tosaa o nda lo chiɛiniŋ.+ Nduyɛ a nɔ ma ke wanaa velu nda wa, finyaa ndaa mamaa, a mamaa ndaa nyɛ nda nɔ kuee ma sɔla wo.+ Nyɛ bɛnda Mɛlɛka o hɔl le tosaa wo cho koŋ ni.+ 5 Wana pɔnɔ ndɔ vi, mbo mɛi ndu bala fondo wo, Mɛlɛka o tiindaŋ ni.+ Le paaleŋ a nyumndaŋ o cho hiouwɔɔ lachi a ndu nyɔɔloo o piɛileŋ niŋ.+ 6 Kɛ wana lanɔ vii hoo pɔnɔɔ, mbo wa kindiŋndo le yeemɛi nduɛi idialle* peeloo kinɛiyo, o wa bɛɛ yoomu, maa wana vilɛi ko o wa ni. 7 Lelaŋ, hiou lachi a nda silalaŋ* ndaŋ kioo, okoŋ wana o wana bii nda tɔɔyaŋ te. 8 Wana o wana kɛɛ pɛ le wanaa nduaa nyɛm nda hauba woŋ kioo, taama taama wanaa cho o yuŋgu ndɔɔ niŋnda, mɛɛ o mal laalaŋ o nɔ o Mɛlɛka niŋndo. Nduyɛ, wana koŋ o wɔu o hiou wana laalaŋ o Mɛlɛka niŋ te wo.+
9 Tuupa ma poonyiaa diola waŋndo o yau wanaa piaandaa ndaa vi wa choo, wana koŋ nɔ mbo fuuluu wɔsilaŋ 60. Nduyɛ mɛɛ mi ndoo wa maa pɔnɔɔ o pilɛ kpe o wa o ba o nɔɔ niŋ ni. 10 A nɔ ma sina ndu le walta kɛndɛlaŋ tosaa,+ mɛɛ chuauwa mandaa cho nuaa yɛ,+ mialla yiyaa,+ wanaa laalaŋnda* peloŋ pulɔɔ,+ wanaa cho o nyɛpalaa niŋnda malaa,+ a yɔŋgɔŋndo le wali o wali kɛndɛ tosaa.
11 Kɛ poonyiaa diola waŋ laanduaa feleŋguaa piaandaa ndaa vi wa le. Kanifuule, te yeemɛi bii nda pɛ le challe o nɔɔ, a mulul Kiliti kɔɔ. 12 Te i yɔŋnuŋ yɛ lende pɛ, Mɛlɛka kilul nda yamɛi le kiɔɔ loo o buŋgɛi nda chua ve choo. 13 Nduyɛ, waŋ laanduaa waa nuaa chɛl le nyɛ o nyɛ tosa le, mɛɛ balɔɔ o chiɛila pilalaŋ niŋ, ma kei choŋgulaŋ a sondolaŋ wouwo o sɔɔŋ pilaŋ niŋ.+ Nduyɛ sɔɔŋ nda nɔ ma dimi kposoŋ te woŋ, a muŋ okɔɔ nda suaa ni. 14 Lelaŋ, I yeema mi waŋ laanduaa feleŋguaa piaandaa ndaa vi wa chal o nɔlaŋ,+ ma velu chuauwa,+ nduyɛ ma manda yuŋgula ndalaŋ. Okoŋ, yaamɔɔwa sɔla fondaa le sɔɔŋ wɔɔŋndoŋ dimioo a nda okɔɔ le. 15 Nduyɛ, apum mal niŋ pɛŋ nɛi tonyaa, ma tual Setana kɔɔli. 16 Te wana lanɔ laalaŋ kɛ kɛ nɔ pɛ wanayaŋ piaandaa ndaa vi woŋ, wana lanɔ koŋ nɔ ni mbo mala nda yɔŋii kalaŋndo wa kundaa choo. Okoŋ, kundaa tiuba mbo mala wanaa vii piaanduaa ma wa kpeele wa.*+
17 Ke bɛnduaa cho nya chilaŋ chuaa tɛɛŋnda nyɛkɛndɛiya+ bɛɛle yiŋgoloŋndeŋ,+ taama taama a cho wallo tosaa o kala kala le suɛi Mɛlɛkɛi dimioo a waŋnda pɛɛkoo wa.+ 18 Kanifuule, Yau Mɛlɛkaa dimi aa: “Te nau towaa wa pɛ num witiiyoŋ nɛilullo, yii ndu sondoo le.”+ Mbo dimi vɛlɛ aa: “Wana wallo nɔ mbo sɔla paawa* ndɔɔ.”+ 19 Te waŋndo dimi pɛ suɛi wɔɔŋnde a bɛndoo okɔɔ, tosal bɛndu koŋ nyɛ o nyɛ le. Mɛɛ dɔɔ mi seiya a ŋiɔɔŋ ɔɔ a yaa wa a suɛi kalɛi okɔɔ.+ 20 Sila+ wana cho hiouwɔɔ lachi a hakioo tosaa wo+ waŋnda o hɔl kpendekele. Koŋ tosa mi waŋnda a tuaa yɔŋ siooŋnde. 21 I cho num silaa hoo yɔŋgoo Mɛlɛka o hɔl, Chiisu Kiliti a maalikɛiyaa Mɛlɛka hɛli wa, le ma bii sawalaŋ ndaŋ. O laŋ biyɔɔ niŋ, sim wana kɔɔli ɔɔ ma hɛli wana o wana le.+
22 Keleŋa waŋndo balaŋ handɔɔ choo le ndu suei yulɔɔ le. Nduyɛ, wou laba o yɔŋ wɔɔŋ acheleŋnda niŋ te.+ Kɛsi numpila o diandaa o kaala numndaŋ niŋ.
23 Kol lɛ mamɛŋ te,* kɛ wa muɛiyaŋ kolɔɔ nyɛɛmbɔ le dembe nɛi num ndo, a naala paaliaŋ num lɔɔlɔɔ laŋ.
24 Waŋnda apum, mi hakila ndalaŋ la chɔɔmuŋ kpendekele, okoŋ ma kilul nda yamɛi. Kɛ apum, hakila ndalaŋ o chilaŋ niŋ la chɔɔmuŋ kpendekele ni.+ 25 O nɛi pilɛ koŋ choo, walta kɛndɛlaŋ bɛɛ chɔɔmɔŋndo la chɔɔmuŋ kpendekele ni.+ Nduyɛ walta kɛndɛla wana chi bɛɛ le laŋ, la lo la viaŋaa le.+