Polowaa
18 Wana o wana kɛɛ pɛ le acheleŋnda holnɔŋndo, mɛɛ yeemaŋ ndɔŋ ko o tual kɔɔli ni.
Nduyɛ, o kɛɛ taasi kpeekpeiyo.*
2 Diɔmndo nɔ iyeema le mbo bii nyɛ o nyɛ bila le.
Nduyɛ, nyɛ cho ndu o kɔl lo koni o yeema dimioo ni.+
3 Te wana tosa suɛi dɛnɛ wɔɔŋnde pɛ, a bii num biyɔɔ wɔɔŋndo.
Nduyɛ te wana tosa suɛi lasiɔmbuei pɛ, a sɔla bɛɛla tambɛilaŋ.+
4 Diomnda fula waŋndo o sondo laŋ, la cho ko maa sooŋ yiŋgilɛi mamɛŋndo.+
Naa taasioo fula wa cho ko maa pee pɔmbɔ cho hiouwɔɔ wo.
5 O bɛnda mi wana sim wana dɛnɛ wɔɔŋndo kɔɔli o suɛi niŋ,+
Ɔɔ ma kɛɛ le wana tɛɛmbuu isɔɔ le wo dioo kioo le.+
6 Mi sɔɔŋ diɔmndo dimi woŋ hiŋ a sɛɛŋgiaŋndaŋ,+
Nduyɛ mi sondo ndɔɔ tosa mi acheleŋnda yeema ndu lɔɔ.+
7 Diɔmndo, mi sondo ndɔɔ luei ndu o dɛnɛ palaa niŋ.+
Nduyɛ, mi diomnda fula ndu o sondo laŋ la luei yoomu ndɔɔ o yaŋɔɔleŋ niŋ.*
8 Wana balu a chaanda o sondo wo, diomnda ndɔlaŋ la cho ko maa dɔɔma,+
O wana mial chɔ chɔ mbo kuɛŋnuŋ o demboo niŋndo.+
9 Wana o wana cho wana siɛlɛi o wali ndɔɔ niŋ,
Wanayɛi wana tɛɛmbuu nyɔɔŋ ndo o cho ni.+
10 Diola Chɛhowa laŋ la cho ko maa chiɛi choo choo kala kalaa.+
Loŋ wana cho sakpo wo nyaanuŋ ni, nduyɛ mbo sɔla pioŋɔɔ.+
11 Wana sulaa, chiee ndɔ bɛndu cho o taŋgulaa o kala kala wo cho sul ndɔɔ ni.
O yiyaŋ ndɔɔ niŋ, o cho ko maa kpaki kala kala manda chioo wo.+
12 Wana heelaŋndo, o kpundɔɔ niŋ kɔl ndɔɔ yaa ndu ni.+
Nduyɛ, mɛɛ mi waŋndo wa fɛŋ wana tusiaŋ malaŋ o sɔla bɛɛleŋ.+
13 Wana o wana muli pɛ balioo mbo sina fɛŋ tonyaa a ndu okɔɔ le,
Mɛɛ diɔmndo o cho ni, nduyɛ mbo tolnuŋ lasiɔmbu.+
14 Waa a kɔl kɛndɛ mala wana o dialii nɛyɛi niŋ,+
Kɛ nɛɛnɛ nɔla yɛ mbo biunuŋ dialii nɛyɛi o kɔl tambɛiyo niŋ?+
15 Wana bii sɔɔŋ bila wo, ndu sɔla kɔl kaloo ni.+
Nduyɛ wana taasioo, ndu yaŋ nilaŋ ni le mbo sɔla kɔl kaloo.
16 Kɛndɛi waŋndo tosal waŋnda ve, mi i kumbul ndu nɛilaŋ,+
Nduyɛ mi keŋ tosa mbo komal wanaa sɔviaa bɔɔbɔɔ.
17 Wana tase chɔm suɛi yo, ndu ŋ kua le dioo kioo ni,+
Kɛ mɛɛ mi waŋndo o pilɔɔ huŋ timbi malaŋ ŋ cha tonyaa.+
18 Kooŋ wuuwo chii sɛɛŋgiaŋndaŋ ni,+
Nduyɛ miŋ piɔu wanaa kpaayaa bɛnduaa a ŋiɔɔŋ tɛɛŋ.
19 Wanayɛi numnde suɛi wɔɔŋnde tosallo, i kendu chuwɔɔ mbo hiau chiee bɛndu kala kalaa biyɔɔ a sɔŋgɔɔ.+
Nduyɛ mi sɛɛŋgiaŋndaŋ la piɔu waŋnda maa diola ŋchiliŋ kpaki kala kalaa.+
20 Sɔɔŋ kɛndɛŋ waŋndo dimi woŋ cho dembe ndɔɔ pei cha.+
Nduyɛ, mi nyɛ fula ndu o sondo wo tosa mbo hini kɔl.
21 Diɔɔmuleŋ le nɔ kpaayaa le diyɔɔ, a le chiindiaa.+
Wanaa kaala tombolaa wa nɔ ma chɛl fulamakɔɔli nda sɔla le nyɛ nda dimi wo.+
22 Te waŋndo sɔla pɛ lanɔ kɛndɔɔ, mɛɛ nyɛ kɛndɔɔ o sɔla ni.+
Nduyɛ mi Chɛhowa hini kɔl a ndu.+
23 Te wana bala fondoo wa suɛi pɛ, mbo nyɔɔlu.
Kɛ wana sulaa, a dialuŋ kala o muli ni.
24 Chaŋyaŋ ŋpum, miŋ tɛɛmbuu wana.+
Kɛ chaŋyɛi i pum bɛnda mbo hiau wana nya fula kala pilɔɔ wo.+