Aisaya
32 Masaa+ cho wa o masaleŋ choo o nɛi sakpoo choo,+
Nduyɛ mi puaa masaa wa o masaleŋ choo o nɛi sandaa choo.
2 O kɛ kɛ wa niŋ ko maa naa viaŋnaŋnda a teleŋ hueiyii bɛnduei wa hɔŋndo wo,
Vɛlɛ a fondaŋ viaŋnaŋndo teleŋ hueiyii fuku fukuei wa hɔŋndo wo.
Mɛɛ peela pɔmbɔlaŋ la wa nuaa o lɛŋnde vesɛileŋ niŋ yɛ, lende nda wa niŋ ni.+
A wa niŋ ko vɛlɛ mɛɛ lɛŋnde vesɛileŋ le wa nuaa mi pou bɛndoo wa loŋ a wunduleŋ yɛ.
3 Okoŋ wanaa tiuba ma che wa, hɔlta ndalaŋ la cho lɛ wa yifidii le,
Nduyɛ wanaa nɔla ma tuei ya cho nilaŋ yaŋɔɔ nyɛkɛndɛi.
4 Wanaa lau o sɔɔŋ tosaa niŋnda cho yiyaŋ a nyɛ nda pɛɛku wo,
Nduyɛ wanaa kuuwɛiya cho isɔɔ nyɛkɛndɛ walaŋ.+
5 Wanaa kindu kɔl te wa sɔla lɛ niŋ veeloo aa wanaa tosa kɛndɛi ya le,
Nduyɛ wana bii sawa le wo sɔla lɛ niŋ veelɔŋ maa wana lebɛɛ le.
6 Wana kindu kɔl te wo cho wa sɔɔŋ ŋdiɔmndoŋ dimioo,
Nduyɛ mbo wa sɔɔŋ wɔɔŋndoŋ tuunɔŋndo o kɔl,+
Le sɔɔŋ wɔɔŋndoŋ dimioo a Chɛhowa okɔɔ, okoŋ mbo dɛɛniaa acheleŋnda le ma mal ndu piɛiyo.*
Mbo tosa wana yiaaŋ ma cho nɛiyo wo sɔla nyɛ le dio le,
Nduyɛ wana cho a bolola vesɛilaŋ ndo sɔla nyɛ o nyɛ le kolɔɔ le.
7 Sɔɔŋ wɔɔŋndoŋ wana bii sawa le wo tuunuŋ o kɔl ni.+
Mbo dɛɛniaa acheleŋnda le sɔɔŋ lasiɔmboŋ tosaa,
Mbo tɛɛmbuu wana cho o nyɛpalaa niŋndo a choolaŋ,+
O yɔŋ bɛɛ mi wana bala fondoo dimi tonyaa.
8 Mi wana ikɛndɔɔ tuunuŋ sɔɔŋ kɛndɔŋ o kɔl le tosaa,
Nduyɛ sɔɔŋ kɛndɔŋ o kindiŋ le tosaa lɔɔlɔɔ ni.
9 “Nya waŋ laanduaa buulaŋ haa le wa, la chɔŋ mi la yaŋ nilaŋ o diom nuu!
Nya chuaa laanduaa saalaŋ haa isɔɔ le wa,+ la yaŋ nilaŋ o nyɛ ya cho dimioo wo!
10 Te wɔsioo o pilɛ chuu pɛ a palɛi i tiŋ lechoo, nya saalaŋ haa isɔɔ le wa cho kandɔɔ nyiiyaa,
Kanifuule te a chii pɛ kilepiiyaŋ keenduu, kɔmnde kɛ kɛ cho lɛ lo le.+
11 Nya waŋ laanduaa buulaŋ haa le wa, la nyiiya kpa kpa!
Nya wanaa saalaŋ haa isɔɔ le wa, la nyiiya!
La yuŋga nyapila,
Mi la wounuŋ nyɛla labɛkilaŋ o chaŋ.+
12 La lɔɔ mɛɛma nyaŋ mi la chaŋ chaŋ imɔnɔɔ,
Le kpelela nyala kɛndɛ kɛndɛlaŋ a le kilepiima nyama kuam lɔpi lɔpi waŋ.
13 Kanifuule, yiɔɔŋ cho kumbɔɔ lɛŋnde wanaa niaa kpou.
A tonya, ŋ cho chiee kɔl kɛndɔɔ kumbɔɔ,+
Nduyɛ miŋ kumbu vɛlɛ chiɛila kɔl kɛndɛlaŋ kpou.
14 A mal bandu cho o taŋgulaa o kala kala wo.
Chiee bɔɔluu bɛndoo wa o piaa leniŋ cha wo bɛɛ, a mal ndu.+
Ofɛɛ+ a bandu mɛŋgɛlaa simnuŋ bembelaŋ lefafɛɛŋ.
O simnuŋ fondaŋ sofɛliaa pisul lo,
A fondaŋ chɔluaa kua diolaŋ ndo.+
15 O cho wa lende haaa mi Mɛlɛka ke naa nyina ndɔɔ,+
Okoŋ mi lɛŋnde polteŋ le simnuŋ yɔmii kuamɛi,
Nduyɛ yɔmii kuamɛi hei wa niŋ ko maa bundɛ.+
16 Okoŋ sandei cho wa o pollo niŋ,
Nduyɛ mi sakpoyɛi wa o yɔmii kuamɛi niŋ.+
17 Fulamakɔɔli sakpoyɛi kpeekpeiye huŋ niŋndo cho kɔl nyuloo ni,+
Nduyɛ, kɔmnde sakpoyɛi kpeekpeiye cho vɛlɛ waa o yoomu kɔl nyuloo niŋ a hɛnɛkɛyɛi le fɛɛŋ a fɛɛŋ ni.+
18 Wanaa niaa cho wa ichali o fondaŋ kɔl nyuloo,
Fondaŋnda pɛŋgiaala nda waŋnuŋ hɛnɛkɛ, nduyɛ ma nɔ yoomu kɔl nyuloo laŋ.+
19 Kɛ looŋ kpuŋgbaŋ cho bundɔɔ tɛɛmbuu,
Nduyɛ miŋ miŋgi chiee bɛndoo lɛŋ tɛlɛlɛ.