Hibuluiya

3 Lelaŋ puaapiliaa, nya sɔla veeloo le kɔlaŋ choo choo wa,+ la yiyaŋ ndɔ a Chiisu okɔɔ. Ndu cho kiilanɔɔ a wana bɛndu wanaa soliaa lasala naŋ sina wo ni.+ 2 O wa sakpo a Mɛlɛka hɛli ndu wo,+ mɛɛ Muuse bɛɛ wa sakpo o chiɛi Mɛlɛkaa niŋ yɛ.+ 3 Nduyɛ o bɛnda mbo sɔla biiloo+ mbo hiou Muuse, kanifuule wana taŋgul chiɛiyo wo nɔ mbo sɔla bɛɛleŋ mbo hiou chiɛi o taŋgul lo. 4 Chiɛi o chiɛi, waŋndo taŋgul ndu ni. Kɛ wana toosiaa nyɔɔŋ kpou wo cho Mɛlɛka ni. 5 Wana wali sakpoo Muuse wa o chiɛi Mɛlɛkaa niŋ ni. Wali o wa tosaa wo wa ko maa lesei le sɔɔŋ muŋ nɔ le dimiŋndo o koŋ kɔɔli woŋ. 6 Kɛ Kiliti, o cho po Mɛlɛkaa wo wa sakpo+ o chiɛi finya ndɔ wo choo. Te o yɔŋ pɛ miŋ hiou lachi a suɛi ŋ ve a isiooŋ te, nduyɛ miŋ bii tiindaŋ naŋ kialu yoŋgaa a ndu okɔɔ wo kpiŋ haaa o mɛɛlulaŋ, mɛɛ naŋ cho chiɛi Mɛlɛkaa ni.+

7 Lelaŋ, mi nyina diandaa dimi aa:+ “Te la tuei pɛ hau Mɛlɛka diom, 8 la kinda kɔlta nyalaŋ maa finyaa nyaa mamaa le. Ma tosa mi duaunuŋ tumbe a nda tau teleŋ nda wa ya tɔɔndaŋndo o pollo niŋndo.+ 9 Le wɔsilaŋ 40 finyaa nyaa mamaa wa walta ya wa tosaa laŋ chɔɔ, kɛ a koŋ kpou, ma tɔɔndaŋ ya.+ 10 Le sabu koŋ ya dɔɔnuŋ tumbe a waŋnda haa ni, mi dimi aa: ‘Teleŋ o teleŋ a cho faŋaŋndo o nɛi tonyaa choo o kɔlta ndalaŋ niŋ, nduyɛ a sina wɔ nɛila nilaŋ te.’ 11 Le hei, mi mɛnaŋ po o kɔl ni tuuwo niŋ aa: ‘A cho luɛiyɔɔ o pɛŋgi nuu niŋ te.’”+

12 Lelaŋ puaapiliaa, la mandaŋ maa wana o wana wa nya tɛɛŋ mbo nɔ kɔl dɛnɛ wɔɔŋndo, okoŋ mbo mal laalaŋ o nɔ o Mɛlɛka cho yoomu wo niŋ te.+ 13 Mɛɛ naŋ cho wɔ yoomu o paale nda veelu aa “Hau” leŋ niŋ yɛ,+ la hiou lachi a dɛɛniaŋndo vellaa velle, yɔŋii wana wa nya tɛɛŋ mi kpaaya hakioo tiu ndu ba, mbo kinda kɔl ndɔɔ. 14 Le miŋ sɔla nyɛ Kiliti bɛɛ sɔla wo, mɛɛ miŋ hiou lachi a simndaŋ nyɛkɛndɛ yi o tiindaŋ naŋ nɔ o kandɔŋndo wo choo haaa o mɛɛlulaŋ.+ 15 I cho i dimiaŋ aa, “Te la tuei pɛ hau Mɛlɛka diom, la kinda kɔlta nyalaŋ maa finyaa nyaa mamaa le. Ma tosa mi duaunuŋ tumbe a nda tau.”+

16 Nɛɛ yaa ndaa tuei yɛ diom Mɛlɛkaa, kɛ ma tosa mbo duaunuŋ tumbe a nda tau? Baa o cho wanaa Muuse kɔ soli Ichipi wa kpou le?+ 17 A nɛɛ yaa Mɛlɛka ndoo dɔɔnuŋ yɛ tumbe le wɔsilaŋ 40?+ Baa o cho a wanaa ndaa tosa hakioo, nduyɛ ma wu o pollo niŋnda le?+ 18 A nɛɛ yaa Mɛlɛka ndoo mɛnaŋ yɛ maa a cho luɛiyɔɔ o pɛŋgi ndɔɔ niŋ te? O cho a wanaa kɛɛ ndu diomndo tueiyɔɔ wa le? 19 Lelaŋ, a luei o pɛŋgi Mɛlɛkaa niŋ te, kanifuule ndaa nɔ laalaŋ te.+