Sɔɔŋ Chɔɔmaŋndoŋ

7 Okoŋ, mi cha maalikɛiya a hiɔɔlu isisi o kpeŋguŋ hiɔɔloŋ o lɛŋndeŋ choo. Ma hau nɛila hiɔɔlula hueiye hɔŋ o lɛŋndeŋ choo laŋ, yɔŋii i hɔŋ o lɛŋndeŋ choo, o mɛŋndaŋ choo, a o yɔm kɛ kɛ choo. 2 Mi cha maalikɛinɔ cheleŋ fulaa ba paaleŋ le chaŋ ndo. Nyɛ Mɛlɛka ke ndu le tamasioo handɔɔ wo wa ndu o ba. Mbo deŋi choo choo kpeleŋ o maalikɛiyaa hiɔɔluaa nda ke dioo le lɛŋndeŋ a mɛŋndaŋ tɛɛmbuuwo wa lo. 3 Mbo dimi aa: “La tɛɛmbuu wɔ lɛŋndeŋ, mɛŋndaŋ, a yɔmnde le, haaa miŋ chii buɛiyaa Mɛlɛka naa tamasioo+ handɔɔ o ŋtendu.”+

4 Mi tuɛi mɛɛ wanaa nda handu haa tamasioo wa a wa bolle pilɛ yɛ. A wa 144,000.+ Waŋnda haa ndaa fula o lekaa o lekaa o Isɔluɛi niŋ.+

5 Kaale Chuda leŋ, waŋnda 12,000 nda handu tamasioo ni.

Kaale Lubɛŋ ndeŋ, waŋnda 12,000.

Kaale Kaadi leŋ, waŋnda 12,000.

6 Kaale Asiɛɛ leŋ, waŋnda 12,000.

Kaale Nafitalii leŋ, waŋnda 12,000.

Kaale Manaasɛ leŋ,+ waŋnda 12,000.

7 Kaale Simiɔŋ ndeŋ, waŋnda 12,000.

Kaale Livai leŋ, waŋnda 12,000.

Kaale Isaka leŋ, waŋnda 12,000.

8 Kaale Sɛbulɔŋ ndeŋ, waŋnda 12,000.

Kaale Choosɛ leŋ, waŋnda 12,000.

Kaale Bɛŋjamiŋ ndeŋ, waŋnda 12,000 nda handu tamasioo ni.

9 Okoŋ kɔɔli, mi cha waŋnda faŋga bɛndu bɛndoo. Wana o wana ndoo nɔla nda chɔm te. Ndaa fula o lelɛŋ o lelɛŋ niŋ, a lekaa o lekaa, a waŋnda suu o suu, a isɔɔ o isɔɔ maŋgalaa.+ A wa isisi kpeŋgbei* lemasaa a Saa Fɔŋndɔɔ lachi, a doviaŋ o nyɛla humbulaŋ niŋ.+ Nduyɛ, siɔɔla waulaŋ la wa nda o laba.+ 10 A wa dimioo choo choo kpeleŋ aa: “Mɛlɛka naa cho ichali o kpeŋgbei lemasaa choo wo,+ a Saa Fɔŋndɔɔ, nda piŋi naa ni.”+

11 Maalikɛiyaa wa o kpeŋgbei lemasaa a balaa wa, a bɛnduaa,+ a nyaa yoomaa hiɔɔluaa, nda kpou ma baŋ wulaŋ kpeŋgbei lemasaa lachi ma piɛi Mɛlɛka. 12 A wa dimioo aa: “Amiina!* Maa Mɛlɛka naa sɔla saŋgalaa, a biiloo, a taasioo, a balikaa, a bɛɛleŋ, a kpaayaa, a yoomuaŋ le fɛɛŋ a fɛɛŋ!+ Amiina.”

13 Okoŋ, mi bɛndoo o pilɛ nyuna ya aa: “Wanaa cho haa a doviaŋ o nyɛla humbulaŋ niŋnda,+ wanaa suu kuɛɛ nda cho yɛ? Nduyɛ kuɛɛ nda fula yɛ?” 14 Mi mulul ndu o foofo loŋ aa: “Masanɔ nuu, num sina ni.” Mbo dimul la aa: “Waŋnda haa fula o nyɛpalaa bɛndoo niŋ ni.+ Nduyɛ, ma tuaa nyɛla ndalaŋ, ma siiŋguu laŋ la humbu fo fo o kooma Saa Fɔŋndɔɔ niŋ.+ 15 Le sabu koŋ nda cho isisi kpeŋgbei lemasa Mɛlɛkaa lachi ni, ma wa ndu saŋgalaa idii a ichɔl o chiɛi ndɔɔ niŋ. Nduyɛ, wana cho ichali o kpeŋgbei lemasaa choo wo+ cho nda tɛndii ndɔɔ pɛŋgɛla choo.+ 16 Fɛɛŋ bɛɛ yima nɛi lɛ nda le, kolɔɔ bii lɛ nda le, paale loo lɛ nda le, kɛlɛŋgaa mi haŋgullo pala nda.+ 17 Kanifuule, Saa Fɔŋndɔɔ,+ o cho o kpeŋgbei lemasaa ikɛiyo cho nda manda,+ okoŋ mbo kuɛ a nda o sooŋnda* mɛŋma yɔŋgu yoomoo waŋ.+ Nduyɛ, Mɛlɛka cho nda mamɛmɛ o mamɛmɛ wɔɔsuu o hɔl fo.”+