Hibuluiya

7 Masaa le Salɛm, a wana soliaa lasalaa le Mɛlɛka Bɛndoo Mɛkisidɛɛki wa ni. Mɛɛ Ebilaham wa chɔnɔŋndo naa nda wa masaa diuwo o chɔuwo wa, mi Mɛkisidɛɛki komal ndu, mbo duau ndu Ebilaham sala.+ 2 Nyɛ o nyɛ Ebilaham bii o chɔuwo, mbo ke ndu o tɔ ndɔɔ o kunda kɛ kɛ choo. O tasoo, Mɛkisidɛɛki tɛɛsiaa ndɔɔ cho ni, “Masa Cho Sakpo Wo.” Ndu cho vɛlɛ Masaa Salɛm ni. Koŋ cho ni, “Masa Kɔl Nyuloo.” 3 Wana o wana sina finya ndɔ, kala ndɔ, kɛlɛŋgaa finyaa nduaa mamaa le. Wana o wana sina vɛlɛ teleŋ yoomu ndɔɔ kanduŋ ndo, ɔɔ teleŋ o mɛɛlu wo le. O nɛiyo hoo choo, o cho ko maa Po Mɛlɛkaa. Kanifuule, wana soliaa lasalaa o cho le fɛɛŋ a fɛɛŋ ni.+

4 Nuawɔ se mɛɛ o wa wana bɛndu yɛ! Le saboo hoo Ebilaham finya naa mamaa ke ndu nyɛm kɛndɛ kɛndɛŋ o bii o chɔuwo woŋ, o tɔ ndɔɔ ni.+ 5 A mɛɛ Sawaa* dimi yɛ, wanaa fula o pulale Livai leŋ+ choo ma wa wanaa soliaa lasalaa wa, Isɔluɛiya nɔ kuee ma ke nda nyɛ o nyɛ nda nɔ o tɔ ndɔɔ,+ mi che bɛɛ chuauwaa Ebilaham nda* nda bɛɛ cho ni. 6 Kɛ mi wana fula hoo o pulale Livai leŋ choo le wo bii Ebilaham nyɔɔŋ muŋ* o ba, nduyɛ mbo duau Ebilaham Mɛlɛka chuel hoo buŋgaŋ ndo sala.+ 7 Wana o wana sina maa wana duau waŋndo sala wo, ndu hiou a wana o dɔu sala wo. 8 Mɛɛ o hei niŋ, Livaiyaa waŋnda ke haa nyɛ o nyɛ o tɔ ndɔɔ wa, waŋnda chieeya nda cho ni, nduyɛ ma vi. Kɛ wana cho hoo maa Mɛkisidɛɛki wo ndu, Yau Mɛlɛkaa dimi maa o cho yoomu.+ 9 Ŋ dimi vɛlɛ maa Livai bɛɛ, o waŋnda wa o tɔ ndɔɔ kioo wo, mi ndu bɛɛ yɔŋgu o tɔ ndɔɔ sanaa o Ebilaham niŋ. 10 Mi che bɛɛ Livai ndoo viluŋ ndɔ teleŋ Mɛkisidɛɛki komal Ebilaham ndo le, kɛ o wa niŋ Ebilaham o ipulu.+

11 Kɛɛsiaa wa o Sawa Mɛlɛka ke Isɔluɛiya wo niŋ le mi wanaa soliaa lasalaa fula o pulale Livai leŋ choo.+ Te ndoo wa pɛ maa wanaa soliaa lasalaa haa nɔla ma faŋa yɔŋnda wɔɔŋndaŋ, naŋ yeema lɛ niŋ pa wana soliaa lasalaa maa Mɛkisidɛɛki?+ Ndoo ve letuu le miŋ nɔ wana soliaa lasalaa maa Elɔŋ te? 12 Te wali wanaa soliaa lasalaa siŋgaŋ pɛ, mɛɛ Sawaa bɛɛ nɔ mbo siŋgaŋ.+ 13 Wana nda dimi sɔɔŋ muŋ a ndu okɔɔ wo, o pulale cheleŋ choo pɔ o fula ni. Wana o wana ve o pulale leŋ choo le wali soliaa lasala tosa o bandu luamaa lasalaa choo le.+ 14 I cho kpendekele maa o pulale Chuda leŋ choo Masanɔ naa fula ni.+ Kɛ Muuse dimi naa maa wanaa soliaa lasalaa cho fula o pulale Chuda leŋ choo le.

15 Mɛɛ wana soliaa lasala cheleŋ hiŋ,+ o cho maa Mɛkisidɛɛki wo, miŋ chɔɔlu suɛi kalɛi sina walaŋ.+ 16 O cho le kaale o fula choo leŋ te o simnuŋ wana soliaa lasalaa, a mɛɛ sawaa dimi yɛ le. Kɛ le mɛɛ o nɔ kpaaya ke ndu yoomu vi le wo yɛ.+ 17 I cho i dimiaŋ o Yau Mɛlɛkaa niŋ a ndu okɔɔ aa: “Wana soliaa lasalaa ŋ cho ni maa Mɛkisidɛɛki le fɛɛŋ a fɛɛŋ.”+

18 O hei niŋ, mi Mɛlɛka kpeeŋa sawa tase koŋ, kanifuule ndoo nɔ kpaaya le, nduyɛ ndoo nɔla mbo mala ŋwaŋnda chiee le.+ 19 Sawaa nɔla mbo faŋa hakioo feu mɛɛ Mɛlɛka ndoo yeema yɛ le.+ Kɛ mi Mɛlɛka ke naa tiindaŋ sɔviɔɔ,+ o mala naa miŋ sɔɔŋguu ndu ikɛi kpɛɛluŋ ndo.+ 20 Nduyɛ, Mɛlɛka mɛnaŋ fɛlɛŋ malaŋ hei yɔŋnuŋ. 21 (Mi waŋnda apum simnuŋ wanaa soliaa lasalaa, Mɛlɛka mɛnaŋ te. Kɛ Chiisu ndu, simnɔŋ o simnuŋ wana soliaa lasalaa wo, mi Mɛlɛka mɛnaŋ. Mbo dimi aa: “Ya Chɛhowa,* I mɛnaŋ po, nduyɛ I feŋaŋ o diom nuu choo le. Wana soliaa lasalaa ŋ cho ni le fɛɛŋ a fɛɛŋ.”)+ 22 Mi Chiisu simnuŋ suŋgbuleŋ le kpema hiou wa o sɔvɛ wo.+ 23 Mi wanaa bɔɔbɔɔ simnuŋ wanaa soliaa lasalaa,+ kanifuule piɔmndo chɛl le mi wanaa wa o foofo koŋ nda hiou lachi le. 24 Kɛ le mɛɛ o cho wa yoomu le fɛɛŋ a fɛɛŋ yɛ,+ wana o wana miiŋgu niŋ o foofo ndɔ soliaa lasalaa le. 25 Le saboo hoo, o nɔla mbo piŋi wanaa huŋ naa Mɛlɛka chua sanaa o ndu niŋnda. Kanifuule, o cho wa yoomu le mbo nyɔɔlu le nda teleŋ o teleŋ.+

26 I cho suɛi kɛndɛ le miŋ nɔ wana bɛndu wanaa soliaa lasala waa nuaa. Kanifuule, o cho o yɔŋgaŋ o Mɛlɛka lo, o nɔ haki le, tɔɔyaŋ cho ndu choo le,+ o cho maa wanaa lahakiaa le, nduyɛ mi Mɛlɛka heelu ndu o choo choo niŋ tema.+ 27 Kɛ ndu cho maa wanaa bɛnduaa soliaa lasalaa kaŋ te. O heu ba le salalaŋ solioo lepaa o lepaa le+ hakila ndɔlaŋ a hakila waŋnda a tuaa le.+ Kanifuule, le pilɛ kpe o tosa keŋ ni teleŋ o yɔŋgu yoomu ndɔɔ wo.+ 28 Wanaa bɛnduaa soliaa lasala Sawaa yulu iso wa, wanaa lahakiaa nda cho ni.+ Kɛ mɛɛ Mɛlɛka ke naa Sawaa, mbo mɛnaŋ+ maa o cho Po ndɔɔ yulɔɔ iso, le mbo wa wana bɛndu wanaa soliaa lasalaa. Mbo simnuŋ wana walaŋndo+ le fɛɛŋ a fɛɛŋ.