Ɛsodɔɔ

29 “Nyɛ ŋ nɔ ma tosa le nda dindioo ma wa wanaa soliaa lasalaa le ya wo cho hoo ni: Chua nau piaandu fɔŋndɔɔ o pilɛ, saa konduaa nɔ sɔŋ te wa a ŋiɔɔŋ,+ 2 beedii nɔ yiisii* leniŋ te wo, beedii tiu tiu nda toosiaa maa ikela ma muuliaŋ a chuɛiyaŋ ndo, a beedii fɛɛdɛɛ nɔ yiisii leniŋ te wo, o nda sui chuɛiyaŋ ndo.+ A nɔ ma toosiaa laŋ a kpeyaŋ ŋwitii kɛndɛ kɛndɔɔ. 3 Wou laŋ o kambɛiyo niŋ, ma chua nauwo vɛlɛ a saa konduaa ŋiɔɔŋnda, ma hiŋ a nyɔɔŋ muŋ ya lachi.+

4 “A nɔ ma hiŋ a Elɔŋ nda puaa nduaa o tɛndii bɔŋaŋndo sondoo,+ ma pulu nda.*+ 5 Okoŋ ma chua doma vilɛiyo,+ doma bala biŋgioo, doma biŋgioo,* a nyɛ wana soliaa lasalaa handuŋ o takpa wo, ma wou Elɔŋ. Nduyɛ ma chua yaule womulaa leŋ ma yii ndu o chaŋ poŋ.+ 6 A nɔ ma wou ndu mɔsillo, okoŋ ma handu pondale chɔm maa o cho o yɔŋgaŋ o ya Mɛlɛka lo leŋ o mɔsillo choo.+ 7 Nduyɛ ma chua chuɛiyaŋ le pɔyaa,+ ma tala ndu o lebol le ndu pɔyaa.+

8 “Okoŋ kɔɔli, ma hiŋ a puaa nduaa, ma wou nda domala vilɛilaŋ.+ 9 Chua kolala ŋpɛŋgɛlaŋ, ma yii Elɔŋ nda puaa nduaa o chaŋ, nduyɛ ma wou nda mɔsiltaŋ o lebol. O yuŋgu ndaa choo wanaa soliaa lasalaa cho wa ni. Nduyɛ, sawaa hoo cho wa le fɛɛŋ a fɛɛŋ.+ Mɛɛ nuaa nya nɔ ni mi la siiŋguu Elɔŋ nda puaa nduaa wanaa soliaa lasalaa.*+

10 “Okoŋ kɔɔli, ma hiŋ a nau towaa o tɛndii bɔŋaŋndo lachi, mi Elɔŋ nda puaa nduaa handu ndu balaŋ o lebol.+ 11 La nɔ mi la dii nau koŋ ya Chɛhowa lachi o tɛndii bɔŋaŋndo sondoo.+ 12 Wou suei o kooma nau koŋ niŋ, ma sui maŋ o leela bandu luamaa lasalaa.+ Nduyɛ ma chua ma tuaŋ, ma tala maŋ o bandu luamaa lasalaa bɛŋgu.+ 13 Okoŋ, ma chua chuɛima holnuŋ puloŋ ndaŋ kpou,+ ma cho o yemnde waŋ, kɔl keluŋ muuŋ ndoŋ, vɛlɛ a chuɛima holnuŋ muŋ ndaŋ, ma lom nyɔɔŋ muŋ kpou o bandu luamaa lasalaa choo.+ 14 Kɛ chɔlu koŋ kpou, chɔŋ a yau ndɔɔ kɔ bii a poola ndɔlaŋ, la nɔ mi la soli o dɔɔŋgɔɔ niŋ mi la kɔ lom. Kanifuule, sala hakioo o cho ni.

15 “Okoŋ kɔɔli, ma chua saa o pilɛ mi Elɔŋ nda puaa nduaa handu ndu balaŋ o lebol.+ 16 Dii saa koŋ, ma chua kooma nduaŋ, ma fasaŋiaa maŋ o kpeŋguŋ bandu luamaa lasalaa kpou.+ 17 La siɔŋ saa koŋ, mi la tɔɔ puluŋ ndɔŋ+ a lɔlula ndɔlaŋ, okoŋ mi la miŋgi buŋgaŋ muŋ hɛɛnduu kpɛ kpɛ a bolle ndɔleŋ. 18 La nɔ mi la lom saa koŋ kpou o bandu luamaa lasalaa choo. Sala luamaa o cho le ya Chɛhowa ni. Sala nda luam o ya Chɛhowa lo le mi chuŋ kɛndɔɔ komal la wo o cho ni.+

19 “A nɔ ma chua vɛlɛ saa kondoo o pilɔɔ, mi Elɔŋ nda puaa nduaa handu ndu balaŋ o lebol.+ 20 Dii saa koŋ, ma chua kooma nduaŋ ma tiŋ, ma sui maŋ o nile tumnde ba kɛndɛle Elɔŋ ndeŋ. Nduyɛ ma tosa vɛlɛ nyɛ pilɛ koŋ kpe a puaa nduaa. Okoŋ kɔɔli, ma suu nda vɛlɛ kooma maŋ o sooŋ ndaŋ bɛnduŋ ba kɛndɔŋ, a o sooŋ ndaŋ bɛnduŋ peluŋ ba kɛndɔŋ. Nduyɛ, ma fasaŋiaa ma tuaŋ o kpeŋguŋ bandu luamaa lasalaa kpou. 21 Chua kooma cho o bandu luamaa lasalaa choo waŋ ma tiŋ, a chuɛiyaŋ le pɔyaa ma tiŋ,+ ma fasaŋiaa maŋ Elɔŋ choo a nyɛla cho ndu lekɔɔ laŋ, nduyɛ ma tosa vɛlɛ nyɛ pilɛ koŋ kpe a puaa nduaa, le halikpeŋ mi ndu a puaa nduaa wa a diandaa, vɛlɛ a nyɛla cho nda lekɔɔ laŋ.+

22 “A nɔ ma chua chuɛima saa, puiile ndɔleŋ, chuɛima kumbu puluŋ ndɔŋ a yemii nduɛi yaŋ, kɔl keluŋ muuŋ ndoŋ a chuɛima nduaŋ,+ vɛlɛ a lɔlu ba kɛndɔɔ. Kanifuule, sala cho le waŋnda siiŋguuwo wanaa soliaa lasalaa wo o cho ni.+ 23 Chua vɛlɛ beedii tiu tiu wo kpuŋgbɛi i pilɛ, beedii nda toosiaa a chuɛiyaŋ maa ikela wo kpuŋgbɛi i pilɛ, a beedii fɛɛdɛɛ nɔ yiisii leniŋ te wo o pilɛ o kambɛiyo niŋ ya Chɛhowa lachi, 24 okoŋ ma handu Elɔŋ nda puaa nduaa o laba, nduyɛ ma keeliaa laŋ maa sala keeliaa ya Chɛhowa lachi. 25 Okoŋ kɔɔli, ma bii nda muŋ o laba ma handu o sala luamaa choo, ma lom muŋ o bandu luamaa lasalaa choo, le mi chuŋ kɛndɔɔ komal ya Chɛhowa. Sala nda lom le ya Chɛhowa wo o cho ni.

26 “Nduyɛ ma chua mɛɛma saa kondo nda soli salaa le Elɔŋ siiŋguuwo wana soliaa lasalaa wo,+ ma keeliaa maŋ maa sala keeliaa Chɛhowa lachi, okoŋ kɔɔli mi ma wa le num. 27 Saa nya dii le Elɔŋ nda puaa nduaa siiŋguuwo wanaa soliaa lasalaa wo,+ la chua mɛɛma nduaŋ a lɔlu ndɔ nya keeliaa Mɛlɛka o hɔl lo, mi la kɛsi ikɛi. 28 Le Elɔŋ nda puaa nduaa nyɛm diandaŋ muŋ cho wa ni. Nduyɛ, hei nɔ mi i wa sawaa le Isɔluɛiya le fɛɛŋ a fɛɛŋ. Nyɛm diandaŋ muŋ Isɔluɛiya nɔ ni ma ke ya Chɛhowa,+ te a wa pɛ salala ndala kɔl nyulu laŋ solioo.+

29 “Te puaa Elɔŋ nda sɔla pɛ pɔyaa ma simnuŋ wanaa soliaa lasalaa o foofo ndɔɔ, a nɔla ma wounuŋ+ nyɛla ndɔla diandaa laŋ.+ 30 Wana soliaa lasala cho miiŋgu o foofo ndɔɔ o puaa nduaa tɛɛŋ, nduyɛ mbo hiŋ le wallo o tɛndii bɔŋaŋndo niŋ o fondaŋ diandaa wo, o nɔ mbo wounuŋ nyɛla laŋ le palɛi i ŋɔmmɛu.+

31 “La nɔ mi la chua visiŋ saa nda dii le Elɔŋ nda puaa nduaa siiŋguuwo wanaa soliaa lasalaa woŋ, mi la yau muŋ o fondaŋ diandaa.+ 32 Elɔŋ nda puaa nduaa nɔ ma de visiŋ muŋ,+ a beedii cho o kɛsiaa o kambɛiyo niŋ o tɛndii bɔŋaŋndo sondoo wo. 33 Nyɛm nda soli sala malɔɔ lahakioo le nda siiŋguuwo wanaa soliaa lasalaa* a le nda dindioo woŋ, a nɔ ma de muŋ. Kɛ nduyɛ, wana o wana cheleŋ* nɔ mbo de muŋ te. Kanifuule, nyɛm cho ŋ diandaa woŋ ŋ cho ni.+ 34 Te visiŋ saa nda dii le Elɔŋ nda puaa nduaa siiŋguuwo wanaa soliaa lasalaa woŋ a beediiyo lo pɛ haaa diimandɔɔ, a nɔ ma de muŋ te. Kɛ nduyɛ, a nɔ ma lom muŋ,+ kanifuule nyɛm cho ŋ diandaa woŋ ŋ cho ni.

35 “Hei nya nɔ mi la tosal Elɔŋ nda puaa nduaa ni, a mɛɛ ya dimul nya yɛ. La nɔ mi la chua palɛi i ŋɔmmɛu le nda siiŋguuwo wanaa soliaa lasalaa.*+ 36 Lepaa o lepaa, la nɔ mi la soli nau towaa salaa, le malɔɔ lahakioo. Nduyɛ, la nɔ mi la soli salaa hoo le bandu luamaa lasalaa dindioo, le hakila nyalaŋ kumbɔɔ. Nduyɛ mi la tala chuɛiyaŋ o bandu luamaa lasalaa choo, le mbo wa o diandaa.+ 37 Le palɛi i ŋɔmmɛu, la nɔ mi la wa sala malɔɔ lahakioo solioo le bandu luamaa lasalaa. Nduyɛ la nɔ mi la dindi ndu, mbo simnuŋ bandu luamaa lasala hiou diondɔɔ kpou wo.+ Wana o wana tosa wallo o bandu luamaa lasalaa pɛ, o nɔ mbo wa o diandaa.

38 “Nyɛm nya nɔ mi la soli salaa o bandu luamaa lasalaa choo woŋ cho muŋ ni: Lepaa o lepaa, la nɔ mi la soli saa a ŋiɔɔŋ sala a chii niŋ wɔsioo o pilɛ wa.+ 39 La soli saa fɔŋndɔɔ o pilɛ salaa idiiyo, mi la soli o pilɔɔ salaa a paale delaaleŋ.+ 40 Te la wa pɛ saa fɔŋndɔ tasoo salaa solioo, la chua kpeyaŋ kɛndɛ kɛndɔɔ ɛfaa cha,* mi la muuliaŋ ndu a chuɛima ɔlifiiyaŋ hiŋndo piɔuwo le hiɔɔlu,* vɛlɛ a muɛiyaŋ hiŋndo piɔuwo le hiɔɔlu le sala mamuɛiyo. 41 Nyɛm nya soliŋ kpeku le sala ŋkullo a sala mamuɛiyo solioo idiiyo woŋ, muŋ koni nya nɔ ni mi la soliŋ kpeku le saa fɔŋndɔ diiŋ ndɔɔ salaa solioo o yiŋ a paale delaaleŋ, le mi chuŋ kɛndɛ koŋ komal ya Chɛhowa. 42 Nya ni, chuauwaa nyaa mamaa ni, la nɔ mi la wa sala luamaa hoo solioo le teleŋ o teleŋ o tɛndii bɔŋaŋndo sondoo ya Chɛhowa lachi, naa ya cho chɔɔmɔŋ o nya lo, nduyɛ mi soo o nya lo wa.+

43 “Loŋ ya cho Isɔluɛiya chɔɔmɔŋ ni, nduyɛ mi kpaaya nuu tosa mi fonda koŋ o simnuŋ o diandaa.+ 44 I cho tɛndii bɔŋaŋndo a bandu luamaa lasalaa dindi, nduyɛ mi dindi Elɔŋ nda puaa nduaa,+ le halikpeŋ ma wa wanaa soliaa lasalaa le ya. 45 I cho wa waŋnda Isɔluɛi tɛɛŋ, nduyɛ mi wa Mɛlɛka ndaa.+ 46 Okoŋ, ma sina kɛsɛ maa ya cho Chɛhowa Mɛlɛka ndaa ni. Ya soli nda o lɛŋnde Ichipileŋ niŋ ni le mi wa nda tɛɛŋ.+ Ya cho Chɛhowa Mɛlɛka ndaa ni.