Luomaŋnda
13 Ŋ nɔ miŋ diikuŋ wanaa cho naa masaleŋ choo wa.+ Te o cho mi Mɛlɛka chɛl te, masale kɛ kɛ tiuba mi le sim te.+ Mɛlɛka pila chɛl ni mi masɛi cho hau ve wa o fondaŋnda ndalaŋ.+ 2 Lelaŋ, te ŋ simul nda pɛ, mɛɛ kɛɛsiaa Mɛlɛkaa naŋ simul koŋ ni. Wanaa simul kɛɛsiaa hoo wa, Mɛlɛka cho nda yamɛi kilul. 3 O cho wanaa tosa sɔɔŋ kɛndɔŋ nda le nɔ siooŋnde le masaa waa le, kɛ wanaa tosa sɔɔŋ wɔɔŋndoŋ nda.+ Siooŋii nɔ mi i wa nya le masaa waa le. Te la tosa nyɛ cho o kɛndɔɔ wo pɛ,+ a cho nya saŋgala. 4 Kanifuule, wali Mɛlɛkaa nda cho tosaa ni le tɔnɔ nyaa. Kɛ te la tosa pɛ suɛi wɔɔŋnde, mɛɛ siooŋnde cho nya wa le nda. Le Mɛlɛka nda cho wallo ni. Nduyɛ a sɔla dioo a kpaayaa le wanaa tosa sɔɔŋ wɔɔŋndoŋ nda nyɛpalaa tusioo choo.
5 Lelaŋ, sabula kɛndɛlaŋ la cho le nda diikɔŋndo, o cho ko le siooŋii kɔl nda tuuwo le, kɛ le mi la nɔ kɔl iyama walaŋndo.+ 6 Le sabu koŋ nya mal paawaa* ni, kanifuule a cho wali Mɛlɛkaa tosaa lɔɔlɔɔ le nya. 7 La ke wana o wana nyɛ o nɔ le sɔlaa wo. Wana nyuna pɛ le paawaa, la mal paawaa.+ Wana nyuna pɛ le chuuŋgiaa, la yɔŋgu chuuŋgiaa. Wana yeema pɛ mi la nɔ siooŋii nduɛi, la nɔ siooŋnde le ndu.+ Wana yeema pɛ mi la nɔ bɛɛleŋ le ndu, la ke ndu bɛɛle o nɔ mbo sɔla leŋ.+
8 La nɔ kuee wana o wana le, mɛɛ le kaaliaŋndo vellaa velle.+ Kanifuule, wana kaala pɛ chaaŋ ndɔ wanachioo, mɛɛ o tosa nyɛ sawaa* dimi wo.+ 9 Sawaa dimi aa: “Wana suunda le,+ wana dii wanachioo le,+ wana yɔŋ levii le,+ a nɔ ma luɛi lehɔl o nyɛ pila le.”+ Sawalaŋ ndaŋ a la tɔlaŋ kpou, la cho la liimaa o nyɛ dimiŋ hoo wo niŋ aa: “Kaala wana nya chiɛɛliaŋ ndo* mɛɛ ŋ kaala numpila yɛ.”+ 10 Te a kaala wana nya chiɛɛliaŋ ndo pɛ, a tosal ndu dɛnɛ wɔɔŋ te.+ Lelaŋ, te a kaala pɛ, mɛɛ a tosa nyɛ sawaa dimi wo.+
11 La nɔ mi la tosa hei, kanifuule la sina maa teleŋndo fuuluu le mi la tendu o luaŋ.+ Pioŋɔɔ naa cho niŋ kpɛɛluŋ mbo hiau teleŋ naŋ simnuŋ wanaa laalaŋnda wo. 12 Nyumndaŋ ma cho niŋ chuwɔɔ, nduyɛ paaleŋ le cho niŋ siɔɔ. Lelaŋ, ŋ malnuŋ sɔɔŋ waŋnda tosa o nyumndaŋ niŋndoŋ,+ miŋ wounuŋ wolɔɔla chɔula cho le nyɛ teŋgaa laŋ.+ 13 Ŋ tosaŋ sɔɔŋ bɛnda woŋ ipala deŋ.+ Miŋ mal dunyaŋ bɛndoŋ, kolɔɔ bɛndoo, kaa ihini nɔɔlɛiyo, kaa kɔl vesɛiyo,*+ sɛɛŋgiaŋndaŋ, a paŋalaa.+ 14 Kɛ la tol tamasi Chiisu Kiliti wo kɔɔli nyɛkɛndɛi,+ mi la mal kɛɛsiaalaŋ tosaa le yeemaŋ nyaŋ ŋdialloŋ peeloo.+