Walta Kiilaa

12 A boondii keŋ, mi masaa Hɛlɔɔ kandu wanaa pum o kunda wanaa laalaŋnda tɛɛŋ nyɛpalaa tusioo choo.+ 2 Mbo tosa ma dii Chemisi, bɛndoo Chɔŋ+ a muɛi faŋnde.+ 3 Mɛɛ o che maa Chuuwa naŋ kɔl le keŋ, mbo tosa vɛlɛ ma bii Pitɛ. (Hei yɔŋnuŋ a teleŋ Bɔŋaŋ Beedii Nɔ Yiisii* Leniŋ te Wo.)+ 4 Mɛɛ nda bii ndu, ma duau ndu o chiɛi manyumndo niŋ.+ Ma hɛli puaa chɔuwa kundalaŋ la hiɔɔlu le ndu waa hɔlteŋ. Kunda faŋaŋ ko, o cheleŋ huŋ. Kunda kɛ kɛ ndoo nɔ puaa a hiɔɔlu. Ndoo yeema mi ndoo soli ndu* waŋnda o hɔl, te Bɔŋaŋ Hiouwɔɔ Choo Wo ndoo chuu pɛ. 5 Pitɛ wa o chiɛi manyumndo niŋ, kɛ mi kunda wanaa laalaŋnda wa Mɛlɛka piɛiyo kpeekpei le ndu.+

6 Diimandɔ Hɛlɔɔ ndoo nɔ le Pitɛ solioo wo, ichɔl koŋ, Pitɛ wa o luaŋ. O wa o yiyaa o yɔlɔŋ sala tiɔɔŋ, nduyɛ ma baa muŋ puaa chɔuwa a ŋiɔɔŋ. Wanaa mɛŋgɛlaa wa vɛlɛ o dio, ma wa chiɛi manyumndo hɔlteŋ. 7 Kɛ o lepilɛ niŋ kpe, mi maalikɛinɔ Chɛhowa* wo luɛi loŋ,+ mi paŋgeloo tiu o chiɛi manyumndo niŋ silɔ. Mbo hiiluu Pitɛ choŋgoo mbo tindi ndu. Mbo dimi aa: “Chɔŋ chɔ chɔ!” Mi yɔlɔŋ tiimbuŋ ndu o laba.+ 8 Mi maalikɛinɔɔ dimul ndu aa: “Wounuŋ nyɛla numndaŋ a kɔwɛila* numndaŋ.” Mbo tosa lende. Mi maalikɛinɔɔ dimul ndu o mɛɛlulaŋ aa: “Wounuŋ doma num lechoo wo, ma tol la kɔɔli.” 9 Mbo tual ndu kɔɔli ma fula o bɛɛ, kɛ o sina maa chieeŋ te hei wa yɔŋnɔŋndo le. O wa yiyaŋndo maa yilaŋnde o wa chɔɔ ni. 10 Ma hiau puaa chɔuwa kunda tasoo a o diiŋ ndɔɔ, ma fuuluu o dio ŋchiliŋndo le fulaa o bɛɛ. Mi dioo kumbiŋ a ba ndɔ. Mɛɛ nda fula o bɛɛ, ma bii kɔlaŋ o nɛi. Kɛ o lepilɛ niŋ kpe, mi maalikɛinɔɔ lo ndu o hɔl pɛ. 11 Mɛɛ Pitɛ sina nyɛ wa yɔŋnɔŋndo wo, mbo dimi aa: “I sina niŋ kɛsɛ maa Chɛhowa* vem maalikɛinɔ ndɔɔ ni le ya piŋioo Hɛlɔɔ o ba, a nyɛ o nyɛ Chuuwa ndaa tuu maa o cho ya yɔŋnɔŋ.”+

12 Mɛɛ o sina lende, mbo kua o chiɛi Meele wo, kalaa Chɔŋ, o ndaa veelu vɛlɛ aa Maki wo.+ Wanaa laalaŋnda a tiŋ wa a chuuŋgiaŋ loŋ, ma wa piɛileŋ. 13 Mɛɛ Pitɛ lɔɔ dioo, mi buɛi laandu pilɛ diolaŋ aa Luoda huŋ le sinaa wana cho dioo lɔɔ wo. 14 Mɛɛ o tuei diom Pitɛ wo, o lo nyaaloo dɔɔnɔŋndo, o kumbi lɛ dioo le. Kɛ mbo miiŋgu chiɛiniŋ a kiltaŋ mbo dimi maa Pitɛ cho isisi o dio. 15 Ma dimul ndu aa: “Seemaa ŋ cho ni.” Kɛ mbo lambaŋ nda dimullo maa ndu ni. Ma kandu dimioo aa: “Maalikɛinɔɔ* ni.” 16 Kɛ Pitɛ wa hiouwɔɔ lachi a dioo lɔɔ. Mɛɛ nda kumbi dioo ma cha ndu, mi kɔndɔfillo bii nda. 17 Mbo kpaa nda a ba le ma mei. Mbo tɛɛsial nda vɛ vɛ mɛɛ Chɛhowa* soli ndu o chiɛi manyumndo niŋ yɛ. Okoŋ mbo dimul nda aa: “La doonuŋ Chemisi+ a puaapiliaa sɔɔŋ muŋ kona.” Mbo fulaŋ, mbo kuaŋnuŋ o fondaŋ cheleŋ.

18 Mɛɛ paaleŋ le sɛ, mi sɛɛŋgiaŋ bɛndoo del puaa chɔuwa tɛɛŋ le nyɛ yɔŋnuŋ a Pitɛ wo. 19 Mi Hɛlɔɔ viam waŋnda le ndu nuuviaa, kɛ a chi ndu le. Mɛɛ o nyuuniaa puaa chɔuwaa wa chiɛi manyumndo hɔlteŋ nda, mbo dimi le ma tusi nda nyɛpalaa choo.+ Okoŋ kɔɔli, mi Hɛlɔɔ faŋaŋ Chudiaa mbo kua Sisaliaa mbo kɔ wa loŋ le teleŋ tiŋ.

20 Mbo tambu kɔllo tau a waŋnda Taaya a Saidɔŋ. Le hei, mi waŋnda o chiooŋ muŋ niŋ huŋ naa ndu chua a yiyaŋ pilɔɔ kpe. Ma hiau buɛi wa nyɛm masaa hɔlteŋ ndo kɔɔli diolaŋ aa Bilasitɔɔ, le ma kɔ nyɔɔlu ndu mi kɔl nyuloo miiŋgu nda tɛɛŋ. Kanifuule, o lɛŋnde Hɛlɔɔ leŋ niŋ nyɛdiaa ndoo fula ni le lɛŋnde ndaleŋ. 21 Mɛɛ waŋnda chuuŋgiaŋ paale pilɛ, mi Hɛlɔɔ pila doviŋ doviŋ lemasaa mbo chal o kpeŋgbei lemasaa choo, mbo kandu suɛi o nda lo. 22 Mi wanaa ndaa chuuŋgiaŋnda kandu dimioo choo choo aa: “O cho wanachiee le soo hoo le, mɛlɛka soo ni!” 23 O lepilɛ niŋ kpe, mi maalikɛinɔ Chɛhowa* wo duau ndu naa choo, mi chaa luɛi ndu o ŋdial, okoŋ mbo wu.

24 Kɛ mi diom Chɛhowa* wo hiau lachi a pɛŋgɛlaŋndo. Nduyɛ mi wanaa bɔɔbɔɔ simnuŋ wanaa laalaŋnda.+

25 Mɛɛ Banabaa+ nda Sɔɔ chii wali nda ke nda le puaapiliaa o Chulusalɛm niŋ malaa wo tosa,+ ma miiŋgu latulu a Chɔŋ,+ o ndaa veelu vɛlɛ aa Maki wo.