Maatiu
4 Mi nyina Mɛlɛkaa tosa mi Chiisu kua o pollo niŋ le mi Setana*+ tɔɔndaŋ ndu.+ 2 Mɛɛ o bii sumndo le palɛi 40 a nyumndaŋ 40, mi yiaaŋ ma nɛi ndu. 3 Mi Setana*+ huŋ naa ndu chua, mbo dimul ndu aa: “Te po Mɛlɛkaa ŋ cho ni, mɛɛ dimullɔ poutaŋ ndaŋ mi la simnuŋ nyɛdiaa.”* 4 Kɛ mi Chiisu dimi aa: “I cho i poonyiaa aa: ‘O cho ko nyɛdiaa le tosa mi wana wa yoomu le. Kɛ diom o diom Chɛhowa* dimi pɛ, o tosa mi wana wa yoomu.’”+
5 Okoŋ, mi Setana* kua a ndu o chiee diandaa* niŋ,+ mbo heelu ndu o chiɛi Mɛlɛkaa tullo.+ 6 Mbo dimul ndu aa: “Te po Mɛlɛkaa ŋ cho ni, mɛɛ chicha wɔ lɛŋ. Kanifuule, i cho i poonyiaa aa: ‘Mɛlɛka cho maalikɛiyaa nduaa viomɔɔ,’ nduyɛ ‘A cho balaŋ hau ma saala num, pelei bɛɛ a loo o pouwo le.’”+ 7 Mi Chiisu dimul ndu aa: “I cho vɛlɛ i poonyiaa aa: ‘Wana tɔɔndaŋ Chɛhowa* Mɛlɛka numndo le.’”+
8 Mi Setana* heelu ndu vɛlɛ o pembii vilɛi vilɛiye choo. Mbo chɔm ndu masɛi o chieeŋndo choo kpou a sulta cho leniŋ ndaŋ.+ 9 Mbo dimul ndu aa: “Te a baŋ pɛ wulaŋ kinɛi ma piɛi ya, muŋ kpou I ke num.” 10 Mi Chiisu dimul ndu aa: “Hiou ma kuɛ, Setana! I cho i poonyiaa aa: ‘Chɛhowa* Mɛlɛka numndo ŋ nɔ ni ma piɛi.+ Nduyɛ ndu pilɛ kpe ŋ nɔ ni ma biilu.’”+ 11 Okoŋ, mi Setana* faŋaŋ ndu kɔɔli+ mbo kuaŋnuŋ. Mɛɛ o kuɛŋnuŋ, mi maalikɛiya huŋ mala Chiisu.+
12 Mɛɛ Chiisu tuei maa a bii Chɔŋ,+ mbo kuaŋnuŋ Kalili.+ 13 Mɛɛ o faŋaŋ Naasaluɛi, mbo kɔ chal Kepaaniɔm.+ Chioo hoo wa o mɛŋma ibuŋgaŋ ikɛi o tanda Sɛbulɔŋ ndo niŋ a tanda Nafitalii yo. 14 Hei yɔŋnuŋ le mi nyɛ Aisaya, wana ndoo suaa le Mɛlɛka wo dimi wo peeluŋ. Mbo dimi aa: 15 “Oo nya waŋnda Kalili, nya o tanda Sɛbulɔŋ ndo niŋ, a nya o tanda Nafitalii yo niŋ. Nya cho haa Chɔɔdaŋ leeloo, o nɛi kuɛ o mɛŋma ibuŋgaŋ 16 mi la wa o nyumndaŋ niŋnda, la cho nyɛ teŋgaa bɛndoo chɔ. Nya cho haa ichali o nyumndaŋ niŋ mi piɔmndo wa nya bɛlu bɛluuwo wa, nyɛ teŋgaa+ cho nya teŋga choo.”+ 17 Chɔŋ a boondii keŋ, mi Chiisu kandu waŋnda dimullo aa: “La wookuŋ, kanifuule Masale Mɛlɛkaleŋ o choo choo niŋ le cho niŋ kpɛɛluŋ.”+
18 Mɛɛ Chiisu wa Pioo Kalili diomɔɔ, mbo komal puaa nda ŋiɔɔŋ. Saimɔŋ, mi ndaa veelu ndu vɛlɛ aa Pitɛ,+ nda Andulu pɔmbɔ ndɔ. A wa yalaa wuuwo o peelo, kanifuule wanaa yɔɔyaa nda wa ni.+ 19 Mbo dimul nda aa: “La tol la kɔɔli. I cho nya siiŋguu wanaa yɔɔyaa ŋwaŋnda chiee.”+ 20 O lepilɛ niŋ kpe, ma mal yalala ndalaŋ, ma tual ndu kɔɔli.+ 21 Mɛɛ o kuɛ tiŋ lachi, mbo cha vɛlɛ puaa nda ŋiɔɔŋ. Chemisi, po Sɛbidi wo, nda Chɔŋ pɔmbɔ ndɔ.+ A wa yalala ndalaŋ sondi sondioo o dɛndɔɔ niŋ nda Sɛbidi finya nda waa, okoŋ mbo veelu nda.+ 22 O lepilɛ niŋ kpe, ma mɛi finya nda a dɛndɔɔ, ma tual ndu kɔɔli.
23 Mi Chiisu balu o tanda Kalili wo niŋ kpou.+ O wa keiyo waŋnda pɛɛkoo o chiɛila Chuuwa piɛi Mɛlɛka laŋ niŋ,+ a nda yooŋgu kɛndɔɔ dimullo a Masale Mɛlɛkaleŋ okɔɔ. O wa wanaa wa a naala suu o suu wa siŋgioo.+ 24 Mi tɔɔ ndɔɔ tiu o lɛŋnde Siiliaa leŋ niŋ kpou. Mi waŋnda huŋ a wanaa wa saŋgaa a naala suu o suu wa naa ndu chua.+ A nyinaa wɔɔŋnda wa kɔɔli wa,+ a ndaa nɔ naala wouvɛilaŋ nda,+ a wanaa bɛvɛiya, okoŋ mbo siŋgi nda. 25 Le hei, mi faŋga bɛndu bɛndoo chaŋ Kalili, Dɛkapɔlii,* Chulusalɛm, Chudiaa, vɛlɛ a pioo Chɔɔdaŋ leeloo, ma tual ndu kɔɔli.