Ikilisiaati

8 Nɛɛnɛ cho yɛ maa wana taasioo? Nɛɛnɛ sina yɛ mɛɛ wana soli bahawɛiyo yɛ?* Mi taasioo tosa mi hɔlla wa waŋndo wakee, nduyɛ a chi ndu suumaa o lahɔl te.

2 Mi dimi aa: “Diikuŋ nyɛ masaa dimi wo,+ kanifuule a chua buŋgɛi Mɛlɛka lachi.+ 3 Lau le faŋaŋndo ndu o hɔl te.+ Luei balaŋ o suɛi wɔɔŋii kɛ kɛ niŋ te.+ Masaa tiuba mbo tosa nyɛ o nyɛ nɛŋi ndu kɔl. 4 Kanifuule nyɛ o dimi wo, mɛɛ mbo tosaŋ.+ Nɛɛnɛ nɔla yɛ ma nyuna ndu aa: ‘Yɛɛnɛ ŋ cho yɛ hoo tosaa?’”

5 Wana o wana bii sawaa pɛ, a tusi ndu nyɛpalaa choo le.+ Wana nɔ taasioo wo cho sina mɛɛ o bii sɔɔŋ yɛ, a teleŋ kpeekpei o bii muŋ ndo.+ 6 Suɛi kɛ kɛ nɔ mɛɛ wana bii ndi yɛ, a teleŋ wana bii ndi wo.+ Kanifuule, bahawɛila waŋnda chieeya la cho tau. 7 Wana o wana sina nyɛ cho yɔŋnɔŋ o chilaŋ niŋndo le. Le sabu koŋ, nɛɛnɛ nɔla yɛ mbo chɔm nyɛ nɔ le yɔŋnɔŋndo wo?

8 Wana o wana nɔ kpaaya hueiyii yoomɛi choo le, kɛlɛŋgaa niŋ te mbo kuuna yoomoo. Lende koni wana o wana nɔ kpaaya piɔmndo choo le ni.+ Mɛɛ wana o wana nɔla mbo hɛluŋ fulamakɔɔlila chɔuwo le yɛ, lende koni dɛnɛ wɔɔŋndo chɛl mi wanaa tosa sɔɔŋ wɔɔŋndoŋ nda hɛluŋ fulamakɔɔlila ndɔlaŋ te ni.*

9 Sɔɔŋ muŋ kpou I che muŋ niŋ, nduyɛ mi yiyaŋ a nyɛ o nyɛ cho yɔŋnɔŋndo o chieeŋndo hoo choo, a teleŋ waŋnda chieeya wa o masaleŋ choo, nduyɛ mi acheleŋnda wa nda saŋgaa o ba bɛŋgu wo.+ 10 Mi cha ma kumbu wanaa dɛnɛ wɔɔŋaa vi wa, a ndaa luɛi o fondaŋ diandaa ma fula wa. Kɛ haupa ma puɛɛnuŋ a nda okɔɔ o chiee bɛndu ndaa tosa sɔɔŋ muŋ ndo niŋ.+ Hei bɛɛ, nyɛ fondoo fuu i cho ni.

11 Te a keleŋa wanaa dɛnɛ wɔɔŋnda nyɛpalaa tusi choo le sɔɔŋ wɔɔŋ nda tosa woŋ te,+ waŋnda sɔla yoomuaŋ le sɔɔŋ wɔɔŋndo tosaa.+ 12 Mi che bɛɛ naapum mi wana dɛnɛ wɔɔŋndo tosa yɔŋ wɔɔŋndo bɛmbɔɔ kɛmɛ nduyɛ mbo viou yoomu, kɛ I sina maa wanaa nɔ siooŋii Mɛlɛka tonyaa wa, sɔɔŋ cho lakɔ nyɛkɛndɛi a nda. Kanifuule, a nɔ siooŋnde le ndu.+ 13 Kɛ sɔɔŋ cho wa ŋ kɛndɛ a wana dɛnɛ wɔɔŋndo le,+ kɛlɛŋgaa niŋ te mbo tiuba le palɛi nduɛi cho maa lewundu ve bɛndioo.+ Kanifuule, o nɔ isiooŋ le Mɛlɛka le.

14 Suɛi fonduii* yɔŋnuŋ vɛlɛ o lɛŋndeŋ choo ve cho hei ni: A cho wanaa cho sakpo wa biyɔɔ naŋ chaa dɛnɛ wɔɔŋndo nda tosa ni.+ Nduyɛ, ma wa wanaa dɛnɛ wɔɔŋnda biyɔɔ naŋ chaa sɔɔŋ kɛndɔŋ nda cho tosaa ni.+ Mi dimi maa hei bɛɛ nyɛ fondoo fuu i cho ni.

15 Le hei, mi dimul acheleŋnda maa a dɔɔnuŋ nyaale.+ Kanifuule nyɛ bɛnda le wanachioo kinɛiyo cho ni, dioo mbo kol, nduyɛ mbo dɔɔnuŋ nyaale. Hei o cho wa tosaa ni, palɛi o cho wa wali kala kalaa tosaa o yoomu ndɔɔ niŋndo,+ i Mɛlɛka tonyaa ke ndu o chieeŋndo choo ve.

16 Mi handu kɔllo le taasioo sɔlaa, okoŋ mi che walta kɛ kɛ cho tosaŋndo o lɛŋndeŋ choo.+ Nduyɛ ipala ni, ichɔl ni, yaa nɔla pɛŋ mi lɔl te. 17 Mɛɛ ya yiyaŋ a walta Mɛlɛka tonyaa okɔɔ kpou, mi saaluŋ maa waŋnda chieeya nɔla ma bii sɔɔŋ cho yɔŋnɔŋndo o chieeŋndo choo woŋ bila le.+ Mɛɛ mɛɛ waŋnda chieeya kindiŋ, a nɔla ma bii ndi bila le. O yɔŋ bɛɛ ma yiyaŋ maa a nɔ taasioo tau le ndi sinaa, a nɔla ma bii ndi bila kpeekpei le.+