Masaa Diiŋ Nduaa

20 A teleŋ koŋ, mi Hɛsikaya del a naa, nduyɛ ndoo lo niŋ chobe mbo vi.+ Mi wana suaa le Mɛlɛka wo Aisaya, po Amɔɔsi wo huŋ naa ndu chua. Mbo dimul ndu aa, “Nyɛ Chɛhowa dimi wo cho hoo ni: ‘Choŋguŋ yuŋgu numndo, kanifuule a nɔ le piɔmndo sɔlaa. A cho sioŋgɔɔ a naa hoo le.’”+ 2 Okoŋ, mbo muli hɔlla o kpeloo kɔɔli, mbo kandu piɛileŋ o Chɛhowa lo aa: 3 “Oo Chɛhowa, I nyɔɔlu num a yandii, loonuŋ a mɛɛ ya chɔm lo lechoo wo o numndo a kɔl nuu kpou yɛ, nduyɛ a mɛɛ ya tosa nyɛ cho o kɛndɔɔ wo num o hɔl lɛ.”+ Okoŋ, mi Hɛsikaya kandu chaŋndo tau tau.

4 Aisaya ndoo fuuluu wɔ o luŋ chiɛi lemasaa tɛɛŋ te, mi Chɛhowa suaa o ndu lo. Mbo dimul ndu aa:+ 5 “Miiŋgu pila ma kɔ dimul Hɛsikaya, wana cho wanaa niaa chilaŋ ndo aa, ‘Nyɛ Chɛhowa, Mɛlɛka Deeve finya num mama dimi wo cho hoo ni: “I tuei piɛile numndeŋ, nduyɛ I che mɛmɛma ŋ tusi waŋ.+ Lelaŋ, I cho tosa ma seŋgu.+ O palɛi i yaa bɛŋgu, a cho lakɔ o chiɛi Chɛhowa wo.+ 6 I cho yoomu* numndo chɔɔlu bɛndi le wɔsilaŋ 15, nduyɛ mi piŋi num a chioo hoo masaa le Asiiliaa o ba.+ I cho chioo hoo manda le diola nilaŋ a le diola Deeve buɛi ni laŋ.”’”+

7 Okoŋ mi Aisaya dimi aa: “La huŋ a kato nda toosiaa a fikiima vesɛiyaŋ ndo.” Ma huŋ a ndu ma huŋ sui o hindɔɔ, nduyɛ o pɔmpɔmbɔ, mbo siaŋgu kpɛlɛkɛ.+

8 Hɛsikaya ndoo nyuna niŋ Aisaya aa: “Tamaselii kuɛɛnɛ+ chɔm yɛ maa Chɛhowa cho ya siŋgi, nduyɛ maa o palɛi i yaa bɛŋgu, I cho lakɔ o chiɛi Chɛhowa wo?” 9 Mi Aisaya mulul ndu aa: “Tamaselii Chɛhowa cho soliŋ kpeku le chɔmndo maa nyɛ ndu Chɛhowa dimi wo cho peelɔŋndo cho hoo ni: Tosaa mi wunduma cho naa helaa* waŋ ma kuɛ lachi le nɛiyo tɔ, ɔɔ mi ma miiŋgu amakɔɔ le nɛiyo tɔ, o kuɛɛ ŋ yeema yɛ?”+ 10 Mi Hɛsikaya dimi aa: “I cho tɛtɛlɛ le mi wunduleŋ le hiou lachi le nɛiyo tɔ, mbo hiau miiŋgoo amakɔɔ le nɛiyo tɔ.” 11 Okoŋ mi Aisaya piɛi o Chɛhowa lo, nduyɛ mbo tosa mi wunduma wa o naa helaa Ehaasi wa waŋ ma miiŋgu amakɔɔ le nɛiyo tɔ, mi che bɛɛ maa kuɛ niŋ lachi.+

12 A teleŋ koŋ, mi masaa le Babilɔŋ, Bilodaki-baladaŋ, po Baladaŋ ndo yɔŋ Hɛsikaya yaulaŋ a kioo. Kanifuule, mbo tuɛi maa Hɛsikaya wa a naa.+ 13 Mi Hɛsikaya bii wanaa masaa vem nda nyɛkɛndɛi,* nduyɛ mbo chɔm nda nyɛ o nyɛ wa o chiɛi nda kɛsi nyɛm baa kalaŋ ndo niŋ.+ Mbo chɔm nda kaniŋ humboŋ, kooliiyoŋ, chuɛima baasam ndaŋ a chuɛima sɔvɛma cheleŋ, nyɛm ndɔŋ chɔuwoŋ, a nyɛ o nyɛ wa o fondaŋnda nda kɛsi nyɛm baa kalaŋ ndaŋ niŋ. Nyɛ o nyɛ ve o chiɛi lemasa Hɛsikaya wo niŋ a o masale ndɔleŋ bɛŋgu mbo kɛɛ nda ndu chɔm te.

14 Okoŋ kɔɔli, mi Aisaya, wana suaa le Mɛlɛka wo huŋ o Masaa Hɛsikaya lo, mbo nyuna ndu aa: “Kuɛɛnɛ puaa haa fula yɛ, nduyɛ yɛɛ nda dimi yɛ?” Mi Hɛsikaya muli aa: “Babilɔŋ pɔɔli nda fula ni.”+ 15 Mbo nyuna ndu vɛlɛ aa: “Yɛɛnɛ ŋ chɔm yɛ nda o numndo chiɛiniŋ?”* Mi Hɛsikaya muli aa: “Mi chɔm nda nyɛ o nyɛ o chiɛi ni lemasaa niŋ. Nyɛ o nyɛ lo o fondaŋnda naŋ kɛsi nyɛm baa kalaŋ ndaŋ mi kɛɛ nda chɔm te.”

16 Okoŋ mi Aisaya dimul Hɛsikaya aa: “Nyɛ Chɛhowa dimi wo cho hoo ni,+ 17 ‘Teleŋ cho fuuluu, nyɛ o nyɛ num a finyaa num aa mamaa kɛsi o chiɛi num lemasaa niŋ haaa a paale hauleŋ ndeŋ, a cho lakɔŋnɔŋ a muŋ Babilɔŋ.+ Nyɛ o nyɛ a cho mɛi le.’ Chɛhowa dimi lende ni. 18 ‘Nduyɛ puaa ŋ cho violɔɔ wa, a cho lakɔŋnɔŋ a apum+ ma kɔ wa wallo o chiɛi lemasaa niŋ le masaa Babilɔŋ.’”+

19 Okoŋ, mi Hɛsikaya dimul Aisaya aa: “Yooŋgu Chɛhowa wo hoo bɛnda.”+ Okoŋ mbo dimi vɛlɛ aa: “Te kɔl nyuloo a hɛnɛkɛyɛi* wa pɛ boondii ya cho yoomu ve,* mɛɛ o bɛnda bɔɔ.”+

20 Sɔɔŋ cheleŋ cho a Hɛsikaya okɔɔ woŋ, kpaaya ndɔɔ kpou, mɛɛ o toosiaa mɛŋma tiilaŋndaŋ+ yɛ, a mɛɛ o luei mɛŋndaŋ o chiee bɛndoo niŋ yɛ,+ ŋ cho o yau nda poonyiaa konaa a masaa keeku Chuda wa okɔɔ wo niŋ. 21 Okoŋ mi Hɛsikaya wu,*+ nduyɛ mi Manaasɛ+ po ndɔ miiŋgu o masaleŋ choo o foofo ndɔɔ.+