Kɔliŋtiaŋ Diiŋ Ndɔɔ
11 Mi che bɛɛ mi wa maa diɔm, kɛ I yeema mi la biunuŋ ya. Nduyɛ lekɛndɛi la cho ya biuwɔŋndo! 2 I buulaŋ le nya tau mɛɛ Mɛlɛka buulaŋ le nya yɛ. Ŋ chɛlaŋ naa Kiliti le mi la chal ndu o ba o nɔɔ niŋ. Lelaŋ, I yeema mi la lo maa yufuaanɔ haaa mi paale leŋ le fuuluu, okoŋ mi la chal ndu o ba o nɔɔ niŋ.+ 3 Kɛ siooŋnde cho ya maa a chal le nya bolle hiŋ ma faŋa nya o nɛi Kiliti wo choo,+ mɛɛ kɛuwo hui Ifi yɛ.+ 4 Kanifuule, te waŋndo hiŋ pɛ mbo dimul nya yooŋgoo a Chiisu cheleŋ okɔɔ, mbo pɛɛku nya yiyaŋnda cheleŋ, ɔɔ mbo dimul nya yooŋgu cheleŋ o yooŋgu naŋ dimul nya wo kɔɔli,+ haupa mi la laalaŋ wana koŋ. 5 Kiilaa nyaa chuaŋnuŋ kaŋ maa a cho a sɔvɛ ma hiau chaanda wa, nyɛ o nyɛ cho ma tosa mi kɛɛ ndu tosa le.+ 6 O yɔŋ bɛɛ maa I chiee isɔɔ le,+ kɛ dɛnɛ sinaa cho ya lepɛŋ te. Ŋ chɔm nya hei kpendekele o nyɛ o nyɛ niŋ.
7 Yooŋgu kɛndɛ ya dimul nya a Mɛlɛka okɔɔ wo, I bii nya nyɛ o nyɛ o ba le ndu le.+ Mi tusiŋ toolo le mi la sɔla bɛɛleŋ. Baa suɛi wɔɔŋnde ya tosa keŋ ni? 8 Teleŋ ya wa wallo le nya wo, kundala cheleŋndaŋ la wa ya nyɔɔŋ kioo mi bii. I wa ko maa chiimbuuwo ya wa nda ni.+ 9 Teleŋ ya wa nya tɛɛŋ mi bahawɛiyo komal la wo, I siiluu wana o wana kalaŋ nuu le. Puaapiliaa fula Masidooniaa wa chuu ya nyɛm ya hauba woŋ ni.+ Lelaŋ, I siiluu nya kalaŋ nuu o nɛi o nɛi niŋ te, nduyɛ I siiluu lɛ niŋ bɛɛ wana kalaŋ nuu le.+ 10 Te I cho wɔ pɛ buɛi Kiliti wo, nyɛ o nyɛ kuuna ya yoŋgaa kiolɔɔ a hei okɔɔ+ o buŋgɛi Akeya ve niŋ kpou le. 11 Le sabu yɛɛ ya kɛɛ yɛ nya kalaŋ nuu siiluuwo? Mbo wa maa I kaala nya le? Mɛlɛka bɛɛ sina maa I kaala nya.
12 Nyɛ ya cho tosaa wo, I cho hiouwɔɔ lachi a ndu tosaa.+ O hei niŋ, wanaa dimi maa kiilaa nda cho maa naa ni wa, a sɔla niŋ fonda o fonda nda kelu yoŋgaa le. 13 Kiilaa lachoowaa a wanaa huiyaa wanaa waa lende cho ni. Ma chɔm o lahɔl maa kiilaa Kiliti wa nda cho ni.+ 14 Hei bii wana kɔndɔfili le, kanifuule Setana pila bɛɛ cho hiouwɔɔ lachi a chɔmndo maa maalikɛinɔ nyɛ teŋgaa o cho ni.+ 15 Lelaŋ, te buɛiyaa nduaa wa pɛ hiouwɔɔ lachi a chɔmndo maa wanaa cho sakpo wa nda cho ni, keŋ bii wana kɔndɔfili le. Kɛ mɛɛlula ndalaŋ la wa niŋ mɛɛ walta ndalaŋ la cho yɛ.+
16 I chɔɔlu wɔ dimi: Wana o wana yiyaŋ naa maa diɔmndo le ya cho le. Kɛ te la yiyaŋ pɛ maa diɔmndo ya cho ni, mɛɛ la chɛl la a diɔmii nii keŋ, le halikpeŋ mi ya bɛɛ kelu yoŋgaa nyɛ pɔmbɔ. 17 I ya cho hei dimi ve ndi, o cho tamasi Masanɔɔ le ya cho tolɔɔ kɔɔli le, kɛ maa diɔm ya cho yoŋgaa kiolɔɔ ni. 18 Le mɛɛ wanaa bɔɔbɔɔ cho yoŋgaa kiolɔɔ o nɛi iwana chieeyaa niŋ yɛ, lelaŋ ya bɛɛ cho yoŋgaa kiolɔɔ ni. 19 Nya cho haa wanaa “kɔl kaluaa” wa, mi la chɛl diɔmnda. 20 Mi la chɛl mi waŋnda bii nya maa ŋchɛ, ma poondiaa nyɛm nya nɔ woŋ, ma kuundiaŋ nya choo, nduyɛ ma lɔɔ nya kpaŋndoŋ.
21 Siɔmbulaŋ la cho naa le hei dimioo, kanifuule hei cho tosa mi waŋnda apum yiyaŋ maa, ŋ cho kpaaya naa soliŋ kpeku nyɛkɛndɛi le.
Te acheleŋnda nɔ isiooŋ le nyɛ tosa le, mɛɛ ya bɛɛ nɔ isiooŋ te. I cho suɛi maa diɔm. 22 Baa Hibuluiya nda cho ni? Ya bɛɛ Hibuluinɔɔ ya cho ni.+ Baa Isɔluɛiya nda cho ni? Ya bɛɛ Isɔluɛinɔɔ ya cho ni. Baa chuauwaa mamaa Ebilaham nda* nda cho ni? Ya bɛɛ chua mama Ebilaham ndo* ya cho ni.+ 23 Baa buɛiyaa Kiliti wa nda cho ni? Hei ndi maa wana seemɛi ya cho ndi muli ni. Ya bɛɛ buɛi ndɔɔ ya cho ni, nduyɛ I hiou nda o nɛi koŋ choo. I tosa niŋ wallo tau mbo hiau nda.+ A dɔu ya niŋ o chiɛi manyumndo niŋ teleŋnda bɔɔbɔɔ.+ A lɔɔ ya niŋ teleŋnda bɔɔbɔɔ. Nduyɛ teleŋnda bɔɔbɔɔ piɔmndo bindu binduu ya niŋ.+ 24 Lɔɔ 39 Chuuwa luaa waŋnda wo, bɛmbɔɔ le ŋuɛɛnu kpulukuu nda lɔɔ ya ni.+ 25 A lɔɔ ya niŋ a sionduei bɛmbɔɔ le yaa.+ A vii vii ya niŋ a poutaŋ le pilɛ+. Dɛndɔɔ kɔɔlu niŋ a ya bɛmbɔɔ le yaa.+ Nduyɛ I chii niŋ paaleŋ a nyumndaŋ o mɛŋndaŋ choo. 26 I kela niŋ tau. I kei niŋ o kpundɛla bɔɔbɔɔ niŋ. I wa niŋ le lo o peelo, I kei niŋ viiya tɛɛŋ, Chuuwa+ a wanaa cho ŋChuu le wa kindiŋ niŋ le ya diyɔɔ.+ Chiee ni,+ yondo ni, o mamɛŋ choo ni, puaapiliaa lachoowaa tɛɛŋ ni, yoomu nuu wa o kpundɔɔ niŋ. 27 I yɔkpa niŋ tau. I lɔl niŋ lahɔl teleŋnda bɔɔbɔɔ.+ Yiaaŋ a kolɔɔ biyaa saaŋgiaa ya niŋ tau.+ Teleŋnda bɔɔbɔɔ yaa sɔla nyɛdiaa le.+ Lepum, mi yaa balu o hueiye niŋ. Lepum yɛ, mi fɛlioo ndoo bii ya.
28 O fulawɔ o sɔɔŋ keeku ya muŋ choo woŋ kɔɔli, nyɛ cho ya kindilaa lepaa o lepaa wo cho kɔl landɛi ya nɔ le kundala wanaa laalaŋnda wo ni.+ 29 Wana pilɛ bɛɛ vi pɛ ŋdial, mɔnɛi wa ya bɔɔ. Wana pilɛ bɛɛ mal pɛ laalaŋ ndɔɔ, kɔllo pila tambu ya ni.
30 Te I nɔ pɛ mi kelu yoŋgaa, mɛɛ I cho ndu kiolɔɔ a nyɛm chɔm maa I vi ŋdial lo. 31 Mɛlɛka, o cho Finyaa le Masanɔɔ Chiisu wo, o nɔ mbo sɔla saŋgalaa le fɛɛŋ a fɛɛŋndo, ndu sina maa I cho lachoo dimi le. 32 Teleŋ ya wa Damasikɔɔ wo, mi masa wa masa bɛndoo Aluɛtasi o ba bɛŋgu wo kɛsi puaa chɔuwa o diola kpaki chioo, le ma bii ya. 33 Kɛ mi puaapiliaa chua ya o kambɛiyo niŋ, ma keeku ya o tɛɛŋgii kpakioo ma tusi ya lekɔɔli.+ Okoŋ mi hialuŋ ndu.