Maatiu

13 O paale leŋ choo, mi Chiisu faŋaŋ o chiɛi o wa wo, mbo kɔ chal o pee mɛŋma ihɛllo ikɛi. 2 Mi waŋnda faŋga bɛndoo huŋ balu ndu. Le hei, mbo luɛi o dɛndɔɔ niŋ mbo chal. Mi faŋgaa sim o kɔŋgɔ.+ 3 Okoŋ, mbo pɛɛku nda sɔɔŋ bɔɔbɔɔ o talelaŋ niŋ.+ Mbo dimi aa: “Po pilɛ chɛŋ ni mbo kua yɛiye saŋɔɔ.+ 4 Mɛɛ o wa ndi saŋɔɔ, mi kulloŋ ŋpum deli o nɛi kɔllo, okoŋ mi youwa huŋ chɔuviaa muŋ.+ 5 Mi ŋpum deli o lɛŋnde bandilaleŋ choo naa puulu bɔɔ ve le wa, okoŋ miŋ keleŋa wulɔɔ.+ 6 Kɛ mɛɛ paaleŋ le fula mi le luaa muŋ, miŋ nyamala, nduyɛ miŋ vesa, kanifuule muŋ tul ŋpuundu le. 7 Mi ŋpum deli o yɔɔŋ tɛɛŋ. Mi yɔɔŋ hindu, miŋ kaya kayaŋ muŋ.+ 8 Kɛ mi ŋpum deli o lɛŋnde kɛndɛleŋ choo, miŋ chuulu. Yasaa opum kulloŋ hiouwɔɔ 100, opum hiouwɔɔ 60, opum yɛ hiouwɔɔ 30.+ 9 Num o num nɔ pɛ nila tuɛiyaa isɔɔ, mɛɛ yaŋ nilaŋ.”+

10 Mi buɛiyaa nduaa huŋ naa ndu chua ma nyuna ndu aa: “Le yɛɛnɛ ŋ pɛɛku yɛ waŋnda o talelaŋ niŋ?”+ 11 Mbo mulul nda aa: “Sɔɔŋ viaŋnaŋ cho a Masale Mɛlɛkaleŋ o choo choo niŋ okɔɔ woŋ, nya sɔla dioo ni le mi la bii muŋ bila.+ Kɛ nda sɔla di koŋ te. 12 Kanifuule, wana o wana nɔ, o cho chɔɔlu sɔla tau, nduyɛ mbo kui ndu o ba. Kɛ wana o wana nɔ le, hali o pɔmbɔ o nɔ wo bɛɛ, a cho ndu ndu poonda o ba.+ 13 Le saboo hoo ya pɛɛku nda o talelaŋ niŋ ni. Kanifuule, ma tofa kɛ a chi le, ma yaŋ nilaŋ kɛ a tui le, kɛlɛŋgaa niŋ te ma sina muŋ pɛŋgu.+ 14 O hei niŋ, mi nyɛ Aisaya, wana ndoo suaa le Mɛlɛka wo dimi wo peeluŋ o nda niŋ. Mbo dimi aa: ‘La tuɛi niŋ, kɛ la bii niŋ bila kposoŋ te. La tofa niŋ, kɛ la chi niŋ te.+ 15 Sabu koŋ cho ni maa, waŋnda haa kinda kɔlta ndalaŋ. A baŋul nila ndalaŋ yɔŋii nda tuei, nduyɛ ma kinda hɔltaŋ yɔŋii nda chɔ. Le hei, nyɛ cho nda kuee le tosaa wo, a bii ndu bila le. Nduyɛ ma kɛɛ miiŋgoo ya o ibuŋ le mi siŋgi nda.’+

16 “Kɛ nya nya, kɔl kɛndɔɔ cho le nya, kanifuule la cho sɔɔŋ muŋ chɔɔ, nduyɛ mi la wa muŋ tueiyɔɔ.+ 17 A tonya mi dimul nya, wanaa ndaa suaa le Mɛlɛka wa a wanaa wa sakpo wa, a bɔɔbɔɔ ndaa yeema le sɔɔŋ nya cho muŋ chɔɔ woŋ chɔɔ, kɛ a chi muŋ te.+ Nduyɛ ndaa yeema le muŋ tueiyɔɔ, kɛ a tui muŋ te.

18 “La yaŋ nilaŋ o tɛɛsiaa tale po saŋ yɛiye wo.+ 19 Wana tuei pɛ yooŋgoo a Masale Mɛlɛkaleŋ okɔɔ kɛ mbo bii ndu bila le, wana koŋ cho ko maa kuluŋ deli o nɛi kɔllo woŋ.+ Te wana dɛnɛ wɔɔŋndo+ hiŋ pɛ, o poonda yooŋgu o tuei yo. 20 Ŋ deli o lɛŋnde bandilaleŋ choo woŋ sim le wana tuei yooŋgoo a Masale Mɛlɛkaleŋ okɔɔ, nduyɛ mbo chɛl ndu a kɔl kɛndɛ wo.+ 21 Kɛ le mɛɛ yooŋgu o tuei yo luei ŋpuundu le yɛ, mbo hiau lachi le teleŋ biŋgi. Kɛ mɛɛ nyɛpalaa ɔɔ tɔɔndaŋndo komal ndu, mbo mal laalaŋ ndɔɔ. 22 Kuluŋ deli o yɔɔŋ tɛɛŋ ndoŋ sim le wana tuei yooŋgoo a Masale Mɛlɛkaleŋ okɔɔ wo, kɛ mi buulaŋnda chieeŋndo hoo+ a yeemɛi sullo kaya kayaŋ yooŋgu o tuei yo. Okoŋ mbo foofi.+ 23 Kɛ kuluŋ deli o lɛŋnde kɛndɛleŋ choo woŋ sim le wana tuei yooŋgoo a Masale Mɛlɛkaleŋ okɔɔ, nduyɛ mbo bii ndu bila wo. Yasaa opum mbo kuam kulloŋ hiouwɔɔ 100, opum hiouwɔɔ 60, opum yɛ hiouwɔɔ 30.”+

24 Mi Chiisu dimul vɛlɛ waŋnda tale cheleŋ aa: “Masale Mɛlɛkaleŋ o choo choo niŋ le cho ko maa po kɔ saŋ yɛyii kɛndɛi o chiɛi nduɛi niŋndo. 25 Mɛɛ waŋnda wa o luaŋ, mi yaamɔɔnɔɔ huŋ saŋ kuluŋ bil wɔɔŋ pum o witiiyoŋ tɛɛŋ. 26 Okoŋ, mɛɛ kuluŋ kɛndɛŋ muŋ vil nduyɛ miŋ chuulu, mi bil wɔɔŋ koŋ bɛɛ fula. 27 Mi buɛiyaa wana ichiɔɔ nyuna ndu aa, ‘Fallo, baa o cho kuluŋ kɛndɔŋ te num oo saŋ o chiɛi numnde niŋ te? Mɛɛ kuɛɛ bil wɔɔŋndo hoo ndu fula yɛ?’ 28 Mbo mulul nda aa, ‘Yaamɔɔnɔɔ tosa hei ni.’+ Mi buɛiyaa nduaa nyuna ndu aa, ‘A yeema miŋ kɔ suiŋgi ndu?’ 29 Mbo dimi aa, ‘Ɛ ɛ, yɔŋii nya lo ndu suiŋgioo, mi la suiŋgi kuluŋ kɛndɔŋ. 30 La mal muŋ miŋ hindu latulu haaa a teleŋ kuauwaa. Okoŋ, I cho wanaa kuauwaa dimul ma faŋa fɛlɛŋ bil koŋ, ma yiu ndu kpɔŋndaŋ, ma lom ndu. Okoŋ kɔɔli, a wou kuluŋ kɛndɔŋ o konda nuu niŋ.’”+

31 Mbo dimul nda tale cheleŋ aa: “Masale Mɛlɛkaleŋ o choo choo niŋ le cho ko maa kulii mɔsitaa waŋndo tɔl o kpele ndɔɔ niŋnde.+ 32 Kulle hei hiou mɛsɛla a kulloŋ kpou. Kɛ mɛɛ i hindu, mi i simnuŋ yɔm bɛndu hiou yɔmnde kpou o fondaŋ koŋ ndo. Nduyɛ, mi youwa huŋ taŋgul waaŋnde o lɛuwuŋ ndɔŋ.”

33 Mbo dimul nda tale cheleŋ aa: “Masale Mɛlɛkaleŋ o choo choo niŋ le cho ko maa yiisii* wana lanɔɔ chua mbo muuliaŋ a kpeyaŋndo kiloo 10 wo. Okoŋ, mi yiisii koŋ tosa mi kpeyaŋndo hindu pɔfuu.”+

34 Sɔɔŋ muŋ kpou o talelaŋ niŋ Chiisu dimul waŋnda muŋ ni. A tonya, ndoo suu o nda lo mbo kɛɛ nda taloo dimul te,+ 35 le halikpeŋ mi nyɛ wana ndoo suaa le Mɛlɛka wo dimi wo peeluŋ. Mbo dimi aa: “I cho isɔɔ o talelaŋ niŋ. Sɔɔŋ wana o wana sina wɔ bɛɛ paandu le woŋ chɔŋ a kandɔŋ chieeŋndo,+ I cho nda muŋ dimul.”

36 Mɛɛ Chiisu tosa mi faŋgaa puusiaŋ, mbo kua chiɛiniŋ. Mi buɛiyaa nduaa kua naa ndu chua, ma dimul ndu aa: “Tɛɛsiallɔ naa tale ŋ dimi a bil wɔɔŋ nda saŋ o chiɛi niŋndo okɔɔ.” 37 Mbo dimul nda aa: “Wana saŋ yɛiyii kɛndɛi yo cho Po wanachioo ni. 38 Chieeŋndo cho chiɛi ni.+ Yɛiyii kɛndɛi hei cho chuauwaa cho le Masale Mɛlɛkaleŋ nda ni. Kɛ bil wɔɔŋndo cho chuauwaa wana dɛnɛ wɔɔŋndo ni.+ 39 Wana saŋ bil wɔɔŋndo wo cho wana dɛnɛ wɔɔŋndo ni. Teleŋ kuauwaa cho yɛ mɛɛlula chieeŋndo* ni. Wanaa kuauwaa cho maalikɛiya ni. 40 Lelaŋ, mɛɛ nda faŋa nuaa bil wɔɔŋndo ma luam ndu yɛ, lende koni i cho hunɔɔ yɔŋnɔŋ o mɛɛlula chieeŋndo* hoo ni.+ 41 Po wanachioo cho hunɔɔ maalikɛiyaa nduaa viomɔɔ, okoŋ ma faŋa nyɛ o nyɛ tosa mi waŋnda del, nduyɛ ma sooluu wanaa tosa sɔɔŋ wɔɔŋndoŋ nda o Masale Mɛlɛkaleŋ bɛŋgu, 42 ma wou nda o yiŋnde tondoleŋ niŋ.+ Loŋ nda cho wa koŋullo a chiŋndoŋ sɔmndo ni. 43 A boondii keŋ, wanaa cho sakpo wa cho wa diondɔɔ maa lepala+ o Masale Finya nda leŋ niŋ. Num o num nɔ pɛ nila tuɛiyaa isɔɔ, mɛɛ yaŋ nilaŋ.

44 “Masale Mɛlɛkaleŋ o choo choo niŋ le cho ko maa nyɛm baa kala bɛnduŋ poo saaluŋ ŋ tuwaa lɛŋ yondoo niŋndoŋ. Mɛɛ o che muŋ, mbo chɔɔlu muŋ vioŋɔɔ. Okoŋ, mbo miiŋgu a nyaaloo mbo kɔ pisi nyɛ o nyɛ ndoo nɔ mbo piandu fondaŋ koŋ.+

45 “Masale Mɛlɛkaleŋ o choo choo niŋ le cho vɛlɛ ko maa po yulanɔ wa pouta baa kala kalalaŋ nuuviaa wo. 46 Mɛɛ o saaluŋ pou baa kala bɛndoo o pilɛ, mbo pisi nyɛ o nyɛ ndoo nɔ mbo piandu ndu.+

47 “Masale Mɛlɛkaleŋ o choo choo niŋ le cho vɛlɛ ko mɛɛ yala yɔɔyaa nda wuu o peelo mbo bii suwaa suu o suu wo cho yɛ. 48 Mɛɛ o pɛ cha, mi wanaa yɔɔyaa naŋ ndu o kɔŋgɔ. Okoŋ, ma chal ma hɛli suwaa kɛndiaa,+ ma duau nda o kambɛilaŋ niŋ. Kɛ a niŋ le dio le wa,+ ma viau kaŋ. 49 Lende koni i cho hunɔɔ yɔŋnɔŋ o mɛɛlula chieeŋndo hoo* ni. Maalikɛiya cho hunɔɔ wanaa wɔɔŋnda hɛli wanaa cho sakpo wa tɛɛŋ, 50 okoŋ ma wou nda o yiŋnde tondoleŋ niŋ. Loŋ nda cho wa koŋullo a chiŋndoŋ sɔmndo ni.

51 “La bii pa sɔɔŋ muŋ kpou bila?” Ma muli aa: “Ei.” 52 Okoŋ mbo dimul nda aa: “Te lende i cho ni, mɛɛ wana o wana pɛɛku waŋnda, te o sɔla pɛ pɛɛkoo a Masale Mɛlɛkaleŋ okɔɔ, wana koŋ cho wa maa yuŋgu lebollo, o soli nyɛm baa kalaŋ sɛnɛiyoŋ a ŋ paandoŋ o chiɛi ndɔ nyɛm baa kalaŋ niŋndo.”

53 Mɛɛ Chiisu chii waŋnda talelaŋ ndaŋ dimul, mbo faŋaŋ loŋ. 54 Mɛɛ o kuɛ o ndu lo,+ mbo kandu waŋnda pɛɛkoo o chiɛi Chuuwa piɛi Mɛlɛka wo niŋ. Mi kɔndɔfillo bii waŋnda tau ma dimi aa: “Kuɛɛnɛ poo hoo sɔla yɛ taasioo hoo a kpaayaa le walta kɔndɔfiltaŋ ndaŋ tosaa?+ 55 O cho po kaapinda* wo le cho hoo le?+ Kala ndɔ le cho Meele le? Pɔmbuaa nduaa le cho Chemisi, Choosɛ, Saimɔŋ, a Chuda le?+ 56 O cho naa yemaa nduaa le cho nanuŋ te? Kuɛɛnɛ ndu fula yɛ niŋ a taasioo hoo vɛlɛ a kpaaya o nɔ hoo wo?”+ 57 Le hei kpeekpei nda kɛɛ laalaŋndo o ndu niŋ ni.+ Kɛ mi Chiisu dimul nda aa: “Mi waŋnda kpou ke wana suaa le Mɛlɛka wo bɛɛleŋ. Kɛ o ndu lo chiee a o yuŋgu ndɔɔ niŋ, a ke ndu lebɛɛ le.”+ 58 Le mɛɛ nda kɛɛ laalaŋndo dɔwɔɔ o ndu niŋ yɛ, o tosa walta kɔndɔfilta bɔɔ loŋ te.