Luomaŋnda

4 Yɛɛ naŋ nɔ yɛ miŋ dimi a Ebilaham finya naa mamaa okɔɔ? 2 Le tamaseliiyo, te Ebilaham ndoo simnuŋ pɛ wana sakpoo le walta o tosa laŋ, o wa sɔla nyɛ ndoo kialu yoŋgaa wo, kɛ o cho Mɛlɛka o hɔl te. 3 Yɛɛnɛ Yau Mɛlɛkaa dimi yɛ? Mbo dimi aa: “Mi Ebilaham duau laalaŋndo o Chɛhowa* niŋ. Le hei, mbo chua ndu maa wana sakpoo o cho ni.”+ 4 Te waŋndo tosa pɛ wallo ma paawa* ndu, o cho ikɛndɛ le nda tosal ndu le. Kɛ nyɛ o nɔ le sɔlaa wo o sɔla ni. 5 Te waŋndo tosa wali le, kɛ mbo dɔu laalaŋndo o Mɛlɛka niŋ, Mɛlɛka cho laalaŋ wana koŋ chua maa o cho sakpo,+ mɛɛ o chua wana dɛnɛ wɔɔŋndo maa o cho sakpo yɛ koni. 6 Nyɛ Deeve dimi a kɔl kɛndɛ wana Mɛlɛka chua maa o cho sakpo wo, mi che bɛɛ o tosa wali le ndu sɔla le wo cho hoo ni: 7 “Kɔl kɛndɔɔ cho le wanaa sɔla malɔɔ hakioo le yɔŋnda ndala wɔɔŋndaŋ nda. 8 Kɔl kɛndɔɔ cho le wana Chɛhowa* chɔm hoo hakila ndɔlaŋ te wo.”+

9 Baa wanaa sɔla hivi chiɛi kɔɔlioo wa koni tuɛi kɔl kɛndɔɔ hoo yeela ni, ɔɔ wanaa sɔla hivi chiɛi kɔɔli le wa bɛɛ tuɛi ndu yeela?+ Kanifuule, ŋ dimi aa: “Laalaŋ Ebilaham ndoo nɔ wo tosa ni ma chua ndu maa wana sakpoo o cho ni.”+ 10 Boondii kuɛɛ o simnuŋ yɛ niko wana sakpoo? Boondii o sɔla hivi chiɛi kɔɔlioo ve, ɔɔ boondii ndoo sɔla wɔ hivi chiɛi kɔɔli le ve? Boondii ndoo sɔla wɔ hivi chiɛi kɔɔli le ve. 11 Okoŋ kɔɔli, mbo sɔla tamasioo,+ ndu cho hivi chiɛi kɔɔlioo ni. Ndu chɔm ni maa laalaŋ ndɔɔ tosa ni mbo simnuŋ wana sakpoo Mɛlɛka o hɔl, boondii ndoo sɔla wɔ hivi chiɛi kɔɔli le ve. Hei yɔŋnuŋ le mbo simnuŋ finyaa le wanaa dɔu laalaŋndo o Mɛlɛka niŋ,+ kɛ a sɔla hivi chiɛi kɔɔli le wa, le mi nda bɛɛ simnuŋ wanaa sakpuaa. 12 Mbo simnuŋ vɛlɛ finyaa le wanaa sɔla hivi chiɛi kɔɔlioo wa. O cho ko le nda le, kɛ le wanaa tol tamasi ndɔɔ kɔɔli le laalaŋndo chɔmndo wa,+ teleŋ ndoo sɔla wɔ hivi chiɛi kɔɔli le wo.

13 Diomnde Mɛlɛka mɛi le Ebilaham lɛŋndeŋ kioo mi le wa nyɛ ndɔ wo, o cho le mɛɛ ndu nda chuauwaa nduaa mamaa* wa sawaa* biyɔɔ yɛ le.+ Kɛ le mɛɛ o wa wana sakpoo le laalaŋ ndɔɔ yɛ.+ 14 Te ndoo wa pɛ maa le sawaa tolɔɔ kɔɔli waŋnda wa nyɛ Mɛlɛka mɛi lediom ndo sɔla ni, mɛɛ laalaŋndo a nyɛ Mɛlɛka mɛi lediom le Ebilaham ndo wa simnɔŋ nyɛ fondoo fuu. 15 O kpeekpei niŋ, wana tɛɛmbuu pɛ Sawaa, a tusi num nyɛpalaa choo.+ Kɛ naa sawa cho le, sawa tɛɛmbaa ve le.+

16 Lelaŋ, laalaŋndo tosa ni miŋ sɔla nyɛ Mɛlɛka mɛi lediom le naa kioo wo, kanifuule fondo fuu o ke naa ndu ni.+ Chuauwaa mamaa Ebilaham nda* kpou cho ndu sɔla.+ O cho ko a cho Sawaa tolɔɔ kɔɔli wa le, kɛ a nɔ vɛlɛ laalaŋndo maa Ebilaham nda, o cho finyaa le naa kpou wo.+ 17 (A mɛɛ Yau Mɛlɛkaa dimi yɛ aa: “I siiŋguu num finyaa le kaala bɔɔbɔɔ.”)+ Mi Ebilaham chɔm laalaŋndo hoo Mɛlɛka miŋgi wanaa vi wa yoomu wo o hɔl. Mɛlɛka koŋ suaa a sɔɔŋ yɔŋnuŋ ndɔ le woŋ okɔɔ ni maa ŋ chuu niŋ yɔŋnɔŋ. 18 Ebilaham ndoo nɔ lɛ tiindaŋ le chua violɔɔ le. Kɛ ndoo laalaŋ maa o cho hunɔɔ simnɔŋ finyaa le kaala bɔɔbɔɔ. Kanifuule mi Mɛlɛka dimi aa: “Nuaa chuauwaa numnda* cho hunɔɔ wa ni.”+ 19 Mbo yiyaŋ a dialuŋ ndɔŋ okɔɔ maa ŋ vilɛi ko ŋ wa niŋ ni (kanifuule o wa niŋ le wɔsilaŋ 100).+ Mbo sina vɛlɛ maa Sela bɛɛ ndoo hiou niŋ boondii vialɛi.+ Kɛ o vi ŋdial o laalaŋ ndɔɔ niŋ te. 20 Le mɛɛ Mɛlɛka ndoo mɛi lediom yɛ, le pilɛ bɛɛ o kiisaŋ ɔɔ mbo dii laalaŋ ndɔɔ le. Kɛ mi laalaŋ ndɔɔ kindi ndu poŋ, nduyɛ mbo saŋgala Mɛlɛka. 21 Ndoo nɔ tiindaŋndo kɛsɛ maa Mɛlɛka nɔla mbo tosa nyɛ o mɛi lediom le tosaa wo.+ 22 Lelaŋ, “mi Mɛlɛka chua ndu maa wana sakpoo o cho ni.”+

23 Kɛ diomndaŋ ndaŋ “mi Mɛlɛka chua ndu maa,” a poonyiaa laŋ le ndupilɛ suee le.+ 24 Le naa nda poonyiaa laŋ vɛlɛ ni. Naa bɛɛ Mɛlɛka cho naa chua maa wanaa sakpuaa, kanifuule ŋ laalaŋ maa mbo miŋgi Masanɔ naa Chiisu yoomu.+ 25 Mi Mɛlɛka chɛl le mi waŋnda dii Chiisu le hakila naalaŋ,+ nduyɛ mbo miŋgi ndu yoomu le mbo siiŋguu naa wanaa sakpuaa.+