Kɔliŋtiaŋ Tasoo

16 A kaniŋ* nya cho chuuŋgiaa le wanaa laalaŋnda* woŋ okɔɔ,+ la tosa mɛɛ ya dimul kundalaŋ o Kaleesiaa niŋ yɛ. 2 O paale tasele kɛ kɛ choo o lɔɔ bɛŋgu, wana o wana nɔ mbo kɛsi nyɛ pɔmbɔ ikɛi mɛɛ o nɔla sɔlaa yɛ. Okoŋ te I hiŋ pɛ, kaniŋ ve lɛ chuuŋgiaa le. 3 Te I hiŋ pɛ loŋ, I cho wanaa nya hɛli o yaula nya poonyiaa laŋ niŋnda viomɔɔ+ ma kuɛ a chuuŋgiaa nyaa Chulusalɛm. 4 Te o bɛnda pɛ le mi yapila kuɛ, ŋ kuɛ latulu naa ndaa.

5 Kɛ te I fula pɛ Masidooniaa,+ I cho nya hunɔɔ yilɔɔ, kanifuule a loŋ ya tuu le keilaŋ ni. 6 Naapum I cho viouwɔɔ naa nya chua ɔɔ mi hivi wɔɔleŋ a nya latulu, le halikpeŋ mi la liila ya tiŋ naa ya cho wa kɔlaŋ nda. 7 O laŋ, I yeema mi kei nya yilɔɔ o hiounɔŋ niŋ te, kanifuule te Chɛhowa* chɛl pɛ, I cho yiyaŋndo le mi viou loŋ tiŋ naa nyaa.+ 8 Kɛ I cho wɔ wa Ɛfisɔɔ nanuŋ+ haaa mi Bɔŋaŋ Pɛŋtikɔɔsi wo fuuluu, 9 kanifuule dio bɛndoo kumbiŋ le ya,+ le waltaŋ tosaa. Kɛ yaamɔɔwa cho tau.

10 Te Timoti+ hiŋ pɛ loŋ, la chaa ndu biyɔɔ. Nduyɛ o wa a isiooŋ nya tɛɛŋ te, kanifuule wali Chɛhowa* wo o cho tosaa ni+ maa ya. 11 Lelaŋ, wana o wana chua ndu chɔdɔ le. La liila ndu tiŋ mbo komal la o kɔl nyulu niŋ, kanifuule ŋ cho ndu chumndo naa puaapiliaa.

12 Apɔlɔɔ+ puaapilɛnɔ naa ndu, mi dɛɛniaa ndu le mbo liila puaapiliaa te a wa nya hunɔɔ yilɔɔ pɛ. Ndoo kɛsiaa le lakɔ suŋ suŋ te. Kɛ te o sɔla pɛ ba, o cho hunɔɔ.

13 La wa lahɔl.+ La sim yi o laalaŋ nyaa choo.+ La hiou lachi a kɔl simulaa nɔɔ,+ nduyɛ mi la wa a dialuŋ kala.+ 14 Nyɛ o nyɛ nya wa pɛ tosaa, la tosa ndu a kaalaa.+

15 Puaapiliaa, nyɛ ya nɔ le nya dimullo wo cho hoo ni: La sina maa Sɛtifanaa nda yuŋgu ndɔɔ fɛlɛŋ simnuŋ wanaa laalaŋnda o Akeya niŋ. Nduyɛ ma yɔŋguŋ le wanaa laalaŋnda* wallo tosallo. 16 Maa la hiou lachi a wanaa waa lende, vɛlɛ a wanaa nda cho wallo tosaa latulu kalaŋ nda tusiŋndo o ba bɛŋgu.+ 17 Kɛ I naŋ kɔl tau le mɛɛ Sɛtifanaa,+ Fɔtunatɔɔsi, a Akaikɔɔ hiŋ ya ikɛi yɛ. Kanifuule, mala nyaa nɔ le ya kioo wo koni nda mala ya ni. 18 A dɛɛniaa ya kɔllo, nduyɛ ma dɛɛniaa nya kɔltaŋ. Lelaŋ, la chɔm balika melaa le wanaa waa lende.

19 Kundalaŋ o Eesiaa niŋ la yil nya. Akuila nda Pilisika, a kunda chuuŋgiaŋ o nda lo chiɛiniŋ ndo+ bɛɛ yil nya a kɔllo kpou. 20 Puaapiliaa kpou yil nya. La yilaŋ vellaa velle o kaalaa niŋ.

21 Ya Pɔɔl cho niŋ yilɔɔ hoo poonyiaa ni. I yil nya lapi.

22 Wana o wana nɔ kaalaa le Masanɔɔ le, sendioo cho ndu choo. Oo Masanɔɔ, yandii huŋ fɔ! 23 Maa kɛndɛi bɛnduii Masanɔɔ Chiisu ve wa latulu a nya fɔ! 24 Nya wanaa cho o diompilɔɔ niŋ a Chiisu Kiliti wa kpou, I kaala nya tau.