Kɔliŋtiaŋ Tasoo

1 Ya Pɔɔl, I sɔla veeloo o hɛnaŋ Mɛlɛkaa niŋ le mi simnuŋ kiilanɔɔ+ le Chiisu Kiliti. I cho latulu a puaapilɛnɔ naa Sɔsitini. 2 Nya cho o kundaa niŋ Kɔliŋ nda+ ya cho yauwo hoo poonyiallo ni. Nya Mɛlɛka tosa mi la wa wanaa diandaa, nduyɛ mi la wa o diompilɔɔ niŋ a Chiisu Kiliti wa,+ a nya wanaa cho diola Masanɔɔ naa Chiisu Kiliti laŋ+ veeloo ba o ba fee wa:

3 Maa Mɛlɛka Finya naa nda Masanɔɔ Chiisu Kiliti tosal nya kɛndɛi ndɛi bɛnduei, nduyɛ ma ke nya kɔl nyuloo fɔ!

4 I cho lɔɔlɔɔ Mɛlɛka balikaa mello le kɛndɛi nduɛi bɛnduii o tosal nya o Chiisu Kiliti niŋnde. 5 Le mɛɛ nya cho diompilɛ a Chiisu yɛ, o tosa mi la sɔla nyɛ o nyɛ fee. O ke nya taasioo le suɛi, nduyɛ mbo chɔɔlu nya kɔl kaloo le yooŋgu ndɔɔ dimioo.+ 6 Yooŋgu naŋ dimul nya a Kiliti okɔɔ wo+ kindi laalaŋ nyaa poŋ. 7 Lelaŋ, teleŋ nya cho wɔ chumndo le boondii Mɛlɛka chɔm niŋ Masanɔɔ Chiisu Kiliti ve, nyɛ o nyɛ cho nya lepɛŋ te.+ 8 O cho vɛlɛ laalaŋ nyaa kindi poŋ haaa o mɛɛlulaŋ, yɔŋii tɔɔyaŋ kɛ kɛ wa nya choo o paale Masanɔ naa Chiisu Kiliti cho hunɔɔ leŋ choo.+ 9 Wana lo o lediom ndo Mɛlɛka cho ni.+ Ndu veelu nya ni le waa o chaŋyɛi niŋ a Po ndɔɔ, Masanɔ naa Chiisu Kiliti.

10 Puaapiliaa, I cho nya nyɔɔloo o diola Masanɔ naa Chiisu Kiliti laŋ niŋ, le mi la wa diompilɛ o nyɛ nya dimi wo niŋ, nduyɛ piɔuwaŋ wa nya tɛɛŋ te.+ La wa diompilɛ o yiyaŋnda nyalaŋ niŋ.+ 11 Puaapiliaa niaa, waŋnda apum o yuŋgu Kulooye wo niŋ dimul la maa sɛɛŋgiaŋndaŋ la cho nya tɛɛŋ. 12 Nyɛ ya yiyaŋndo cho ni maa, apum cho dimioo nya tɛɛŋ aa: “Ya le Pɔɔl ya cho ni,” “Ya le Apɔlɔɔ ya cho ni,”+ “Ya le Sifaasi* ya cho ni,” “Ya le Kiliti ya cho ni.” 13 Baa la yeema mi la piɔu Kiliti tɛɛŋ? Baa Pɔɔl vi o yɔmndo choo le nya ni? Baa o diola Pɔɔl laŋ niŋ nya sɔla yiŋɔɔ ni? 14 I mel Mɛlɛka balika le mɛɛ ya yiŋ wana o wana nya tɛɛŋ te yɛ, mɛɛ Kilisipɔɔ+ nda Kayɔɔ.+ 15 Lelaŋ, wana o wana nɔla mbo dimi maa o diola nilaŋ niŋ te o sɔla yiŋɔɔ le. 16 Nduyɛ mi yiŋ vɛlɛ yuŋgu Sɛtifanaa wo.+ Kɛ I loonuŋ lɛ le, te mi yiŋ wana cheleŋ o haa kɔɔli. 17 O cho le waŋnda yiŋɔɔ le Kiliti vem ya le, kɛ le yooŋgu kɛndɔɔ dimioo.+ Nduyɛ o vim ya le mi dimi ndu maa wana sinaa dɛnɛ le, yɔŋii piɔm Kiliti sɔla o yɔm imɔnɔɔ* choo wo simnuŋ suɛi fondo fuu.

18 Kanifuule, yooŋgu cho a yɔm imɔnɔɔ* okɔɔ wo, diɔmnde o cho le wanaa cho tambei sɔla wa ni.+ Kɛ le naŋ cho pioŋɔɔ sɔla wa, yooŋgoo hoo chɔm kpaaya Mɛlɛkaa ni.+ 19 I cho i poonyiaa aa: “I cho tosa mi sɔɔŋ taasiŋ wanaa taasiaa tambu, nduyɛ mi kpeeŋa kɔl kalu wanaa sinaa dɛniaa bɛnduaa ikɛi.”+ 20 Kuɛɛnɛ wanaa taasiaa cho yɛ? Kuɛɛnɛ wanaa sinaa dɛniaa bɛnduaa cho yɛ? Kuɛɛnɛ wanaa chaa sɔɔŋ a sondo wa cho yɛ o chieeŋndo hoo niŋ? Mɛlɛka chɔm maa diɔmii fonduei fuu kɔl kalu chieeŋndo hoo cho ni. 21 Le mɛɛ waŋnda o chieeŋndo hoo niŋ tiindaŋ kɔl kalu ndaa yɛ, a sina Mɛlɛka le.+ Kɛ mi Mɛlɛka chɔm kɔl kalu ndɔɔ,+ mbo piŋi wanaa laalaŋ yooŋgu wa dimiŋndo wo. Hei waŋnda o chieeŋndo niŋ che ni maa idiɔm.+

22 Tamasilaŋ Chuuwa hɛnaŋ chɔɔ ni.+ Kilikiiya nda, kɔl kaloo nda cho kɔɔli ni. 23 Kɛ naa, a diyɔɔ nda dii Kiliti o yɔmndo choo wo okɔɔ naŋ dimul waŋnda ni. Chuuwa che ndi maa pou wana kei boŋ ma del lo. Wanaa cho ŋChuu le wa nda che ndi maa suɛi idiɔm.+ 24 Kɛ Chuuwa a Kilikiiyaa Mɛlɛka hɛli wa, nda chua Kiliti maa ndu cho kpaaya Mɛlɛkaa a kɔl kalu Mɛlɛkaa ni.+ 25 Kanifuule, sɔɔŋ Mɛlɛkaŋ waŋnda chua maa sɔɔŋ ŋdiɔm, nduyɛ maa ŋ nɔ kpaaya le woŋ, sɔɔŋ muŋ nɔ kɔl kaloo a kpaayaa mbo hiau nda poloŋ.+

26 Lelaŋ puaapiliaa, la loonuŋndɔ mɛɛ nya wa yɛ teleŋ Mɛlɛka hɛli nya wo. Nya pumnda ve wanaa taasi o nɛi iwana chieeyaa niŋ te.+ La ve wanaa kpaaya le, kɛlɛŋgaa niŋ te mi la fula o yuŋgu pɛlnuŋ ladio wo choo.+ 27 Kɛ mi Mɛlɛka hɛli sɔɔŋ waŋnda che maa sɔɔŋ ŋdiɔm ndoŋ, le mbo tusi wanaa kɔl kaluaa siɔmbulaŋ. Nduyɛ, mbo hɛli wanaa nɔ kpaaya le wa, le mbo tusi wanaa nɔ kpaayaa wa siɔmbulaŋ.+ 28 Mbo hɛli nyɛm cho ŋ sɔvɛ waŋnda o hɔl te woŋ, nyɛm nda che chɔdɔ woŋ, nyɛm cho nyɛ o nyɛ nda o hɔl te woŋ, le mbo tɛɛmbuu nyɛm nda che ŋ sɔvɛ woŋ.+ 29 Mɛlɛka tosa hei yɔŋii wana o wana kiolu yoŋgaa ndu o hɔl. 30 Mɛlɛka tosa ni mi la wa o diompilɔɔ niŋ a Chiisu Kiliti. Ndu chɔm taasi Mɛlɛkaa a sakpoyɛi nduɛi ni.+ O ndu niŋ waŋnda simnuŋ wanaa diandaa ni,+ nduyɛ o sala baŋaa niŋ waŋnda sɔla baŋaŋndo ni.+ 31 Lelaŋ, i cho i poonyiaa aa: “Wana wa pɛ yoŋgaa kiolɔɔ, o kiolu yoŋgaa o Chɛhowa* niŋ.”+