Maatiu
6 “La mandaŋ yɔŋii nya chɔm waŋnda o hɔl maa, la cho nyɛ cho o kɛndɔɔ wo tosaa le ma che nya.+ Te o cho koŋ te, la cho fanda sɔla Finya nya cho o choo choo niŋndo o ba le. 2 Te la wa wanaa bala fonduaa kɛndɛi tosallo* pɛ, la tosa mi waŋnda muli nya hɔlla kɔɔli mɛɛ wanaa mulu muluaŋnda tosa o chiɛila Chuuwa piɛi Mɛlɛka laŋ niŋ, a o nɛila bɛndulaŋ choo yɛ le. Kanifuule, ma tosa hei le mi waŋnda saŋgala nda. A tonya mi dimul nya, a chii fandaa o ndaa sɔla. 3 Kɛ te la wa kɛndɛi tosaa pɛ, la tosa mi ba nya miallo sina nyɛ ba nya kɛndɔɔ cho tosaa wo le. 4 Te la tosa ndi pɛ sɔɔsɔɔ, Finya nya cha hoo nyɛ o nyɛ fee wo cho nya fanda.+
5 “Nduyɛ te la wa piɛileŋ pɛ, la tosa mɛɛ wanaa mulu muluaŋnda tosa yɛ le.+ Kanifuule, te a wa pɛ piɛileŋ, o chiɛila Chuuwa piɛi Mɛlɛka laŋ niŋ, a o nɛila bɛndulaŋ choo nda sim ni le mi waŋnda che nda.+ A tonya mi dimul nya, a chii fandaa o ndaa sɔla. 6 Kɛ te la wa piɛileŋ pɛ, la luɛi o lumuila nyalaŋ niŋ nya kpeele. Nduyɛ te la kinda pɛ dioo, la piɛi o Finya nya lo o wanachiee chi le wo.+ Okoŋ, Finya nya cha hoo nyɛ o nyɛ fee wo cho nya fanda. 7 Te la wa piɛileŋ pɛ, la lambaŋ sondoo miŋgioo o nyɛ pilɔɔ choo mɛɛ wanaa laalaŋ o Mɛlɛka niŋ te wa tosa yɛ le. Kanifuule, a yiyaŋ maa te a soo pɛ tau tau, Mɛlɛka cho nda nilaŋ yaŋɔɔ. 8 Lelaŋ, la wa maa nda le. Kanifuule, Mɛlɛka Finya nya sina nyɛ nya hau ba wo+ tuupa bɛɛ mi la nyuna ndu.
9 “Te la wa piɛileŋ pɛ, la dimi aa:+
“‘Finya naa o choo choo niŋ, maa diola numndaŋ+ la wa la diandaa.*+ 10 Maa Masale numndeŋ+ le huŋ. Maa hɛnaŋ numndo+ tosaŋ o lɛŋndeŋ choo mɛɛ o cho o choo choo niŋ yɛ.+ 11 Ke naa nyɛdiaa naŋ dia paale hauleŋ ndo.+ 12 Mal naa haki le yɔŋnda naala wɔɔŋndaŋ, mɛɛ naa bɛɛ ŋ mal wanaa tosal naa sɔɔŋ wɔɔŋndoŋ nda haki yɛ.+ 13 Chɛl mi tɔɔndaŋndo tiu naa ba le.+ Manda naa yɔŋii wana dɛnɛ wɔɔŋndo tiu naa ba.’+
14 “Te la mal waŋnda haki le sɔɔŋ wɔɔŋ nda tosal nya woŋ pɛ, Mɛlɛka Finya nya cho o choo choo niŋndo bɛɛ cho nya malɔɔ haki.+ 15 Kɛ te la mel waŋnda haki le sɔɔŋ wɔɔŋ nda tosal nya woŋ te, Finya nya cho o choo choo niŋndo bɛɛ mel nya haki le hakila nyalaŋ te.+
16 “Te la wa sumndo biyɔɔ pɛ,+ la yii hɔlla mɛɛ wanaa mulu muluaŋnda tosa yɛ le. Kanifuule, ma tosa hɔlla a wɔɔŋ wɔɔŋ le mi waŋnda che maa a cho sumndo biyɔɔ.+ A tonya mi dimul nya, a chii fandaa o ndaa sɔla. 17 Kɛ nya nya, te la wa pɛ sumndo biyɔɔ, la pulu hɔlla, okoŋ mi la suiinuŋ chuɛiyaŋ o lebol. 18 O hei niŋ, wana o wana sina maa la cho sumndo biyɔɔ le, mɛɛ Finya nya o wana chi hoo le wo. Okoŋ, Finya nya, cha hoo nyɛ o nyɛ fee wo cho nya fanda.
19 “La pɛŋgi nyɛm sulaŋ chuuŋgiaa o lɛŋndeŋ choo,+ naa ŋ nɔla miŋ sɔwa ɔɔ mi kaaŋguaa de muŋ, te koŋ te mi viiya luɛi ma chiimbuu muŋ nda. 20 Kɛ la chuuŋgiaa nyɛm sulaŋ o choo choo niŋ.+ Loŋ ndu, ŋ sɔwa le, kaaŋguaa di muŋ te,+ nduyɛ viiyaa luei ma chiimbuu muŋ te. 21 Kanifuule, naa ŋ kɛsi nyɛm num sulaŋ nda, loŋ kɔl numndo wa ni.
22 “Hɔlteŋ le cho nyɛ teŋgaa le dialloŋ ni.+ Te a kɛsi pɛ hɔlte numndeŋ o nyɔɔ o pilɛ choo,* ŋ teŋgaa wakee dialuŋ numndoŋ kpou ŋ wa ni. 23 Kɛ te a kɛsi pɛ hɔlteŋ o nyɔɔŋ tau choo,+ dialuŋ numndoŋ kpou o nyumndaŋ niŋ ŋ wa ni. Te nyɛ teŋgaa cho num niŋndo simnuŋ pɛ nyumndaŋ, mɛɛ nuawɔ se nyumma kpiŋgbi bɛndu!
24 “Waŋndo ve buɛiyo le masaa a ŋiɔɔŋ te. Kanifuule, te hoo o kaala ni, o tul o pilɔɔ leyɛ.+ Te hoo o diikuŋ ni, o diikuŋ o pilɔɔ le. Lelaŋ, wana ve buɛiyo le Mɛlɛka, ma wa vɛlɛ buɛiyo le nyɛsɔlaa le.+
25 “Lelaŋ mi dimul nya: La pɛŋgi buulaŋndo+ le nyɛ nya dia wo, a nyɛ nya kol mi la wa yoomu wo, ɔɔ le nyɛ nya chuɛɛnuŋ ndo.+ Baa yoomoo cho o sɔvɛ mbo hiau nyɛdiaa a nyɛ chuɛɛnaŋndo poloŋ te?+ 26 La mɛɛndaŋndɔ youwa o choo choo niŋ nyɛkɛndɛi.+ A tosa wali ichiɛɛ, kɛlɛŋgaa ma kou, ɔɔ ma chuuŋgiaa nyɛdiaa o lakonda le. Kɛ a koŋ kpou, mi Finya nya o choo choo niŋ ke nda nyɛ nda dia wo. Baa la cho a sɔvɛ mbo hiau youwa poloŋ te? 27 Nɛɛnɛ cho yɛ nya tɛɛŋ mbo chɔɔlu yoomu ndɔɔ bɛndi* a buulaŋnda ndɔlaŋ?+ 28 Le yɛɛnɛ mi la buulaŋ le nyɛ chuɛɛnaŋndo? La yiyaŋndɔ a bil lapeeŋgoo yondoo niŋ mɛɛ o naŋ yɛ. O tosa wali le, nduyɛ o sondu lanyɛ le. 29 Kɛ mi dimul nya, mi che bɛɛ mi Sɔlɔmɔŋ+ ndoo sul sullo pila, kɛ chuɛɛnɔŋ ndɔɔ ndoo fuuluu naŋɔɔ maa bil lapeeŋgoo le. 30 Te Mɛlɛka nɛŋi pɛ billo yondoo niŋ nuaa, o cho hau puiyo, siɔdii a lom ndu wo, baa o nɔla mbo tosa nyɛ pilɛ koŋ kpe le nya le? Baa la nɔ laalaŋ bɔɔ le? 31 Lelaŋ, la buulaŋ+ mi la nyunaŋ aa, ‘O yɛɛnɛ naŋ cho yɛ dio?’ ɔɔ, ‘O yɛɛnɛ naŋ cho yɛ kolɔɔ?’ ɔɔ, ‘O yɛɛnɛ naŋ cho yɛ chuɛɛnɔŋ?’ te.+ 32 Kanifuule, nyɔɔŋ muŋ kpou wanaa laalaŋ o Mɛlɛka niŋ te wa cho fafalaa le sɔlaa ni. Finya nya cho o choo choo niŋndo sina maa la hauba le nyɔɔŋ muŋ kpou.
33 “La hiou lachi a Masale Mɛlɛkaleŋ vɛlɛ a sakpoyɛi nduɛi kɛsioo nyɛ tase. Okoŋ kɔɔli, nyɛm tɔɔŋ kpou o cho nya muŋ ke.+ 34 Lelaŋ, la buulaŋ le siɔdii le, kanifuule siɔdii nɔ buulaŋnda ndɔlaŋ.+ Lepaa o lepaa nɔ bahawɛila ndɔlaŋ.