Hibuluiya
4 Mɛlɛka chii naa buŋgɛi chuel maa ŋ nɔla miŋ luɛi o pɛŋgi ndɔɔ niŋ. Lelaŋ, ŋ nɔ miŋ wa yekeŋ yɔŋii wana o wana bumba le luɛiyɔɔ o pɛŋgi koŋ niŋ.+ 2 Kanifuule, yooŋgu kɛndɛ naŋ tueiyo,+ ndu koni nda bɛɛ tuei ni. Kɛ a bii nyɛ yooŋgu koŋ dimi wo le. Lelaŋ, o mala nda le, kanifuule laalaŋ ndaa ve o kala maa wanaa bii yooŋgu koŋ nda le. 3 Kɛ naŋ dɔu laalaŋndo o ndu niŋnda, ŋ luɛi o pɛŋgi ndɔɔ niŋ. Kanifuule, mbo dimi sindɛ aa: “Le hei, mi mɛnaŋ po o kɔl ni tuuwo niŋ aa, ‘A cho luɛiyɔɔ o pɛŋgi nuu niŋ te.’”+ Mbo dimi hei mi che bɛɛ ndoo chii niŋ wali ndɔɔ chɔŋ a teleŋ chieeŋndo kanduŋ ndo.+ 4 Kanifuule mbo dimi o fondaŋ pilɛ a paale ŋɔmmɛu leŋ okɔɔ aa: “Mi Mɛlɛka pɛŋgi o paale ŋɔmmɛu leŋ choo a wali kɛ kɛ o wa tosaa.”+ 5 Mbo dimi vɛlɛ o fondaŋ cheleŋ aa: “A cho luɛiyɔɔ o pɛŋgi nuu niŋ te.”+
6 Wanaa tasiaa tuei yooŋgu kɛndɔɔ wa luei o pɛŋgi ndɔɔ niŋ te, kanifuule a tuii Mɛlɛka diom te. Kɛ acheleŋnda nɔla wɔ ma luɛi o pɛŋgi ndɔɔ niŋ.+ 7 Mɛɛ wɔsila bɔɔbɔɔ la hiou, mi Mɛlɛka dimi o chondii Deeve poonyiaa ve niŋ, a mɛɛ i dimiŋ niŋ o yauwo hoo niŋ yɛ aa: “Te la tuei pɛ hau Mɛlɛka diom, la kinda kɔlta nyalaŋ te.” Okoŋ mbo hɛli paaleŋ ma veelu leŋ aa “Hau.”+ 8 Te Chɔɔsuaa+ ndoo kuɛ pɛ a nda o fondaŋ ndaa wa o pɛŋgioo niŋndo, mɛɛ Mɛlɛka ve lɛ isɔɔ a paale cheleŋ okɔɔ le. 9 Lelaŋ, paale pɛŋgiaaleŋ le cho wɔ le wanaa Mɛlɛkaa.+ 10 Wana o wana luɛi pɛ o pɛŋgi Mɛlɛkaa niŋ, mɛɛ ndu bɛɛ pɛŋgi a wali ndɔɔ mɛɛ Mɛlɛka pɛŋgi a wali ndɔɔ yɛ.+
11 La ŋ kindiŋ kpoke miŋ luɛinuŋ o pɛŋgi koŋ niŋ, yɔŋii wana o wana luɛi nilakalulaŋ maa nda.+ 12 Diom Mɛlɛkaa cho yoomu, nduyɛ kpaayaa pila o nɔ ni.+ O luɛi o hiou muɛi sondola tiɔɔŋnde.+ O nɔla mbo luɛi wanachioo niŋ mbo fuuluu o kɔllo, o boondoŋ, a o yooyoowaŋ niŋ di. O nɔla mbo sina yiyaŋndaŋ a tuula cho wanachioo o kɔllo niŋndaŋ. 13 Nyɛ o nyɛ Mɛlɛka toosiaa, o pilɛ bɛɛ cho mbo veŋnuŋ ndu le.+ Kɛ nyɔɔŋ kpou ŋ cho ndu o hɔl kpendekele, nduyɛ o nɔla mbo che muŋ walaŋ. Naa kpou cho hunɔɔ kona dɔɔnɔŋ o ndu lo.+
14 Chiisu, Po Mɛlɛkaa+ cho wana bɛndu wanaa soliaa lasala naa ni, nduyɛ o kuɛ niŋ o choo choo niŋ. Lelaŋ, ŋ hiounuŋ lachi a waŋnda dimullo a laalaŋ naŋ nɔ o ndu niŋndo okɔɔ.+ 15 Wana bɛndu wanaa soliaa lasala naŋ nɔ wo, mbo tuiinuŋ naa inyiɛɛ, kanifuule o sina maa ŋ nɔ kpaaya le.+ Ndu bɛɛ ma tɔɔndaŋ ndu o nɛi o nɛi niŋ mɛɛ nda cho naa tɔɔndaŋndo yɛ. Kɛ ndu ndoo nɔ haki le.+ 16 Lelaŋ, ŋ sɔɔŋguŋ kpeŋgbei* Mɛlɛka tosal waŋnda kɛndɛiyo ikɛi, nduyɛ miŋ piɛi ndu a kɔl naa kpou,+ le halikpeŋ mbo tuiinuŋ naa inyiɛɛ. Okoŋ, mbo tosal naa kɛndɛi nduɛi bɛnduei, le mbo mala naa a teleŋ bɛnda wo.