Maki

10 Mi Chiisu faŋaŋ loŋ, mbo kua o pɛŋgulaŋ o tanda Chudiaa wo niŋ, Chɔɔdaŋ leeloo. Mi faŋga bɛndoo huŋ chuuŋgiaŋ o fondaŋ o wa wo. Mbo kandu nda pɛɛkoo a mɛɛ ndoo tosa paandu yɛ.+ 2 Okoŋ, mi Falisiiya huŋ le ndu tɔɔndaŋndo. Ma nyuna ndu te o bɛnda pɛ le mi poo kɛɛ laa ndɔ.+ 3 Mbo nyuna nda aa: “Yɛɛ Muuse ndoo dimullɛ nya?” 4 Ma muli aa: “Mi Muuse chɛl maa poo tiuba mbo poonyiaa yau kɛyaŋndo le laa ndɔ kiɔɔ.”+ 5 Kɛ mi Chiisu dimul nda aa: “Le nila kalula nyalaŋ+ Muuse poonyiaa sawaa hoo ni.+ 6 Chɔŋ o kandɔŋndo, ‘mi Mɛlɛka toosiaa wana pɔnɔɔ a wana lanɔɔ.+ 7 Le saboo hoo poo mɛi finya ndɔ a kala ndɔ ni,+ 8 okoŋ ma simnuŋ dialle i pilɛ.’+ O hei niŋ, a cho lɛ wanaa ŋiɔɔŋ te, kɛ dialle i pilɛ. 9 Lelaŋ, nyɛ Mɛlɛka mɔɔsa pɛ, wana o wana nɔ mbo piɔu ndu tɛɛŋ te.”+ 10 Mɛɛ nda wa vɛlɛ chiɛiniŋ, mi buɛiyaa nduaa kandu ndu nyunaa a hei okɔɔ. 11 Mbo dimul nda aa: “Wana o wana kɛɛ laa ndɔ pɛ mbo chua lanɔ cheleŋ, mɛɛ wana koŋ suunda.+ 12 Nduyɛ te o yɔŋ pɛ mi wana lanɔɔ kɛɛ pɔnɔ ndɔ, mbo kɔ chal o nɔ cheleŋ, mɛɛ o suunda.”+

13 Mi waŋnda kandu hunɔɔ a chuaambuaa pɔmbuaa naa Chiisu chua, le mbo handu nda balaŋ choo. Kɛ mi buɛiyaa nduaa kuuna nda.+ 14 Mɛɛ Chiisu che hei, mbo tambu kɔl. Mbo dimul nda aa: “La mal chuaambuaa pɔmbuaa a huŋ o ya lo. La kuuna nda le, kanifuule le haa ndoo Masale Mɛlɛkaleŋ le cho ni.+ 15 A tonya mi dimul nya, wana o wana chɛl Masale Mɛlɛkaleŋ maa chuaambɔ pɔmbɔɔ le, o luei leniŋ te.”+ 16 Okoŋ mbo chua chuaambuaa, mbo handu nda balaŋ choo, nduyɛ mbo duau nda sala.+

17 Mɛɛ o wa kɔlaŋ, mi po pilɛ nyaanuŋ naa ndu chua mbo kɔ beŋ ndu wulaŋ. Mbo nyuna ndu aa: “Wana Pɛɛkaa Kɛndɔɔ, yɛɛnɛ ya nɔ yɛ mi tosa le mi sɔla yoomu fafɛɛŋndo?”+ 18 Mi Chiisu dimul ndu aa: “Le yɛɛnɛ ŋ veelu yɛ ya aa wana kɛndɔɔ? Wana o wana cho o kɛndɛ le, mɛɛ Mɛlɛka ndupilɛ kpe.+ 19 A sina sawalaŋ ndaŋ, lende le? ‘Wana dii wanachioo le,+ wana suunda le,+ wana yɔŋ levii le,+ wana tɛnda seile lakafa le,+ wana chue nyɛ pila a lediɔɔmu le,+ ke finya num a kala num bɛɛleŋ.’”+ 20 Mi poo dimul ndu aa: “Wana Pɛɛkaa, I wa wɔ o pɔmbɔ mi kandu laŋ kpou biyɔɔ.” 21 Mi Chiisu nua ndu chiŋ. Nduyɛ le mɛɛ ndoo nɔ kaalaa le ndu yɛ, mbo dimul ndu aa: “Nyɔɔ o pilɛ lo wɔ num le tosaa ni. Kɔ pisi nyɛm ŋ nɔ woŋ ma ke wanaa bala fonduaa kaniŋ muŋ. A cho sullo sɔla o Mɛlɛka lo. Okoŋ a hiŋ, a tol la kɔɔli.”+ 22 Kɛ mbo tambu kɔl le nyɛ o tuei hoo wo. Okoŋ mbo kuaŋnuŋ, kanifuule ndoo nɔ nyɔɔŋ tau.+

23 Mɛɛ Chiisu mɛɛndaŋ, mbo dimul buɛiyaa nduaa aa: “I cho ikala le mi wanaa nɔ kanioŋ* tau wa luɛi o Masale Mɛlɛkaleŋ niŋ.”+ 24 Kɛ mi kɔndɔfillo bii buɛiyaa nduaa le nyɛ o dimi hoo wo. Mi Chiisu dimul nda aa: “Chaaŋaa niaa,* i cho bɔɔ ikala le luɛiyɔɔ o Masale Mɛlɛkaleŋ niŋ! 25 I cho bɛɛŋ bɛɛŋ le mi nyɔɔmiɔɔ kei o tɛɛŋgu lesiɛndioo niŋ, mbo hiau wana sulaa luɛiyɔɔ o Masale Mɛlɛkaleŋ niŋ.”+ 26 Mi kɔndɔfillo chɔɔlu nda biyɔɔ. Ma nyuna ndu* aa: “Mɛɛ mi nɛɛnɛ kpeekpei sɔla yɛ niŋ pioŋɔɔ?”+ 27 Mi Chiisu tofa nda o lahɔl mbo dimul nda aa: “I cho i kala le wanachioo. Kɛ Mɛlɛka ndu nyɛ o nyɛ kindu a ndu le.”+ 28 Mi Pitɛ kandu ndu dimullo aa: “Ŋ mal nyɛ o nyɛ miŋ tual num kɔɔli.”+ 29 Mi Chiisu dimi aa: “A tonya mi dimul nya, wana o wana mɛi pɛ chiɛi ndɔɔ, ɔɔ bɛndaa nduaa, ɔɔ pɔmbuaa nduaa, ɔɔ yemaa nduaa, ɔɔ kala ndɔ, ɔɔ finya ndɔ, ɔɔ chuauwaa nduaa, ɔɔ yondola ndɔlaŋ le mɛɛ o cho buɛi nuu a le sabu yooŋgu kɛndɔɔ yɛ,+ 30 o cho hunɔɔ sɔla mbo hiou bɛmbɔɔ 100 o teleŋndo hoo niŋ. Chiɛilaŋ, bɛnduaa, pɔmbuaa, yemaa, kalla, finyaa, chuauwa, a yondolaŋ, kɛ a tɔɔndaŋndaŋ kɔɔli.+ Okoŋ, mbo huŋ sɔla yoomu fafɛɛŋndo o chilaŋ* niŋ. 31 A bɔɔbɔɔ cho wanaa tasiaa wa cho simnɔŋ wanaa mɛɛlaa, mi a mɛɛlaa simnuŋ wanaa tasiaa.”+

32 Chiisu nda buɛiyaa nduaa wa o nɛi tɛɛŋ le helɔɔ Chulusalɛm, mbo wa nda kɔlaŋ lachi. Mi kɔndɔfillo bii nda. Kɛ mi siooŋnde kandu wanaa wa nda tolɔɔ kɔɔli wa biyɔɔ. Okoŋ, mbo sei vɛlɛ a kiilaa nduaa 12 nda. Mbo kandu nda dimullo a sɔɔŋ nɔ le ndu yɔŋnɔŋndo woŋ okɔɔ.+ Mbo dimi aa: 33 “Ŋ cho helɔɔ Chulusalɛm, nduyɛ loŋ nda cho Po wanachioo malɔɔ masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda o ba ni, ma kilul ndu yamɛi le ma dii ndu. A cho ndu malɔɔ wanaa cho ŋChuu le wa o ba, 34 ma mam ndu, ma tufu ndu lɔluaŋ choo, ma lɔɔ ndu, okoŋ ma dii ndu. Kɛ o paale yaa ndɔleŋ choo, mbo miiŋgu yoomu.”+

35 Mi Chemisi nda Chɔŋ, puaa Sɛbidi wa,+ huŋ naa Chiisu chua ma dimul ndu aa: “Wana Pɛɛkaa, nyɛ o nyɛ naŋ nyuna num pɛ, ŋ yeema num ma tosal naa ndu.”+ 36 Mbo nyuna nda aa: “Yɛɛnɛ nya yeema yɛ mi tosal nya?” 37 Ma muli aa: “Chɛl naa miŋ chal num ikɛi o Masale numndeŋ niŋ. Hoo o ba num kɛndɔɔ choo, o pilɔɔ o ba num miallo choo.”+ 38 Kɛ mi Chiisu dimul nda aa: “La sina pɛŋ nyɛ nya cho hoo nyunaa le ndu wo le. La nɔla pa mi la kol o taala ya cho kolɔɔ wo niŋ ɔɔ mi la yiŋ mɛɛ ya yiŋ yɛ?”+ 39 Ma muli aa: “Ŋ nɔla.” Okoŋ mi Chiisu dimul nda aa: “La nɔla mi la kol o taala ya cho kolɔɔ wo niŋ, nduyɛ mi la yiŋ yiŋɔɔ ya yiŋ ndo.+ 40 Kɛ te o wa le challe o ba ni kɛndɔɔ choo ɔɔ o ba ni miallo choo pɛ, o cho ya le yɔŋgu wana fonda koŋ te. Kɛ le wanaa sɔla hɛlioo wa fonda koŋ cho ni.”

41 Mɛɛ kiilaa apiliaa tuei a ndi okɔɔ, ma tuulu kɔl a Chemisi nda Chɔŋ.+ 42 Kɛ mi Chiisu veelu nda, mbo dimul nda aa: “La sina maa wanaa cho masaa o chieeŋndo niŋnda, mɛɛ nda yeema yɛ nda bii waŋnda ni. Nduyɛ kindilaa pila nda kindila wanaa nda cho masaleŋ choo wa ni.+ 43 Kɛ o cho lende le i nɔ mi i wa nya tɛɛŋ te. Wana o wana yeema pɛ mbo wa wana bɛndoo nya tɛɛŋ, o nɔ mbo wa buɛiyo le nya.+ 44 Nduyɛ wana o wana yeema pɛ mbo wa wana tasoo nya tɛɛŋ, o nɔ mbo wa chiɔɔ le nya kpou. 45 Po wanachioo bɛɛ, o hiŋ le mi wana tosal ndu wali le. Kɛ le mbo tosal waŋnda wallo,+ nduyɛ mbo yɔŋgu yoomu ndɔɔ le wanaa bɔɔbɔɔ baŋaa.”+

46 Ma fuuluu Chɛluiko. Mɛɛ Chiisu nda buɛiyaa nduaa a waŋnda faŋga bɛndoo wa faŋaŋndo Chɛluiko, po sumɛi ndoo piɛi waŋnda nyɔɔŋ ndo wa ichali o nɛiyo daŋgala. Diola ndɔlaŋ aa Batimayɔɔ (po Timayɔɔ wo).+ 47 Mɛɛ o tuei maa Chiisu fula Naasaluɛi yo cho hiouwɔɔ ni, mbo kandu deŋioo choo choo aa: “Chiisu, Po Deeve wo,+ tuiinuŋ ya inyiɛɛ fɔ!”+ 48 Kɛ mi wanaa bɔɔbɔɔ wa ndu kpaa, ma wa ndu dimullo le mbo pɛŋgi bɔɔluuwo. Kɛ mbo chɔɔlu deŋi choo choo aa: “Chiisu, Po Deeve wo, tuiinuŋ ya inyiɛɛ fɔ!” 49 Mi Chiisu sim mbo dimi aa: “La veelu ndu o huŋ.” Okoŋ ma veelu ndu. Ma dimul ndu aa: “Tambu kɔl te! Chɔŋ ma sim, o cho num veeloo.” 50 Mbo viau doma wa ndu lekɔɔ wo, mbo chaŋ nya, mbo kua sakpo naa Chiisu chua. 51 Mi Chiisu nyuna ndu aa: “O yɛɛnɛ ŋ yeema yɛ mi tosal num?” Mi po sumɛiyo dimul ndu aa: “Luaboni,* I yeema ma tosa mi che vɛlɛ.” 52 Mi Chiisu dimul ndu aa: “Kɔ. Laalaŋ numndo siŋgi num.”+ O lepilɛ niŋ kpe, mbo cha,+ okoŋ mbo kandu ndu tolɔɔ kɔɔli.