Saamiɛɛ Tasoo

16 O mɛɛlulaŋ kpɔŋ, mi Chɛhowa dimul Saamiɛɛ aa: “I kɛɛ Sɔɔ mi faŋa ndu o masaleŋ choo Isɔluɛi.+ Le vɛɛ kpɛ ŋ cho yɛ wa mɔnɛi biyɔɔ le ndu?+ Chua lee numndo ma pei chuɛiyaŋ leniŋ.+ I cho num viomɔɔ o Chɛɛse+ lo, wana waa Bɛtilɛhɛm, kanifuule I hɛli wana pilɛ o puaa nduaa tɛɛŋ le mbo wa masaa le ya.”+ 2 Kɛ mi Saamiɛɛ dimi aa: “Vɛɛ ya cho yɛ looku lakɔ? Te Sɔɔ tuei pɛ a hei okɔɔ, o cho ya diyɔɔ.”+ Mi Chɛhowa dimi aa: “Kɔ a nau fɔŋndɔɔ o ba ma dimi aa, ‘I hiŋ le salaa solioo o Chɛhowa lo.’ 3 Veelu Chɛɛse o sala koŋ, okoŋ mi chɔm num nyɛ ŋ nɔ le tosaa wo. Wana ya cho hɛli wo, ndu ŋ nɔ ni ma pɔya.”+

4 Mi Saamiɛɛ tosa nyɛ Chɛhowa dimul ndu wo. Mɛɛ o kuɛ Bɛtilɛhɛm,+ mi waŋ banaa chieeya cha ndu, ma nyiiya a siooŋnde. Okoŋ ma nyuna ndu aa: “Yɛɛnɛ yɔŋnuŋ yɛ?” 5 Mbo muli aa: “Nyɛ o nyɛ yɔŋnuŋ te. Salaa ya hiŋ solioo o Chɛhowa lo ni. La dindi nyapila, miŋ kuɛŋnuŋ naa ya cho salaa solioo wa.” Okoŋ, mbo dindi Chɛɛse nda puaa nduaa, nduyɛ mbo veelu nda naa o wa salaa solioo wa. 6 Mɛɛ nda luɛi mi Saamiɛɛ cha Ɛliaabi,+ mbo dimi aa: “Wana Chɛhowa pɔya wo kpeekpei cho hoo ni.” 7 Kɛ mi Chɛhowa dimul Saamiɛɛ aa: “Tofa mɛɛ ŋ cho ndu chɔɔ yɛ ɔɔ mɛɛ kpɛ o bandu yɛ le,+ kanifuule o cho ndu le ya hɛli le. O cho mɛɛ wanachioo cha yɛ le Mɛlɛka ndu cha le. Wanachioo ndu, nyɛ cho o kɔɔ wo o cha ni. Kɛ Chɛhowa ndu, o kɔllo niŋ di o cha ni.”+ 8 Okoŋ, mi Chɛɛse veelu Abinadabi+ mbo huŋ simi ndu Saamiɛɛ lachi. Kɛ mi Saamiɛɛ dimi aa: “O cho ndu le Chɛhowa hɛli le.” 9 Mi Chɛɛse huŋ simi vɛlɛ Siamaa,+ kɛ mi Saamiɛɛ dimul ndu aa: “O cho ndu le Chɛhowa hɛli le.” 10 Okoŋ, mi Chɛɛse tosa mi puaa nduaa a ŋɔmmɛu huŋ sim Saamiɛɛ lachi. Kɛ mi Saamiɛɛ dimul ndu aa: “Chɛhowa hɛli wana o wana o haa tɛɛŋ te.”

11 O mɛɛlulaŋ kpɔŋ, mi Saamiɛɛ nyuna Chɛɛse aa: “Baa puaa numnda kpou cho haa ni?” Mbo muli aa: “I nɔ po cheleŋ, pɔmbɔ nda lumndo.+ Kɛ ndu cho yondoo niŋ saa ikɛi.”+ Okoŋ mi Saamiɛɛ dimul ndu aa: “Viom waŋndo mbo kɔ veelu ndu. Kanifuule, mɛɛ mbo hiŋ malaŋ naŋ dia nyɛdiaa hoo.” 12 Okoŋ, mi Chɛɛse viam waŋndo ma kɔ huŋ a ndu. Deeve wa o diiyaa nyɛkɛndɛi, a hɔltaŋ ndu tafulaa. Nduyɛ naŋɔɔ pila ndoo naŋ ni.+ Mi Chɛhowa dimul Saamiɛɛ aa: “Chɔŋ ma pɔya ndu, ndu kpeekpei cho hoo ni!”+ 13 Okoŋ, mi Saamiɛɛ chua lee machuɛiyo,+ mbo pɔya Deeve bɛndaa nduaa o hɔl. Nduyɛ mi nyina Chɛhowa wo kandu Deeve kpaayaa kioo chɔŋ a paale leŋ kɔ kɛ.+ Okoŋ kɔɔli, mi Saamiɛɛ miiŋguŋ Luama.+

14 Mi nyina Chɛhowa wo faŋaŋ Sɔɔ choo,+ nduyɛ mi Chɛhowa tosa mi yiyaŋnda wɔɔŋndaŋ* la luɛi ndu o kɔl, mi la wa ndu paaliaŋndo.+ 15 Mi buɛiyaa Sɔɔ wa dimul ndu aa: “A cho chɔɔ maa Mɛlɛka tosa mi yiyaŋnda wɔɔŋndaŋ* la luɛi num o kɔl, nduyɛ mi la wa num paaliaŋndo. 16 Lelaŋ a yandii masanɔ naa, dimul buɛiyaa numnda le ma nuuvial num wana chaa towaa lɔɔ nyɛkɛndɛiyo.+ Teleŋ o teleŋ yiyaŋ wɔɔŋndo* wa num pɛ paaliaŋndo, o loolul num towaa okoŋ a sinaŋ nyɛkɛndɛi.” 17 Mi Sɔɔ dimul buɛiyaa nduaa aa: “A yandii, la nuuvial la wana chaa ndu lɔɔ nyɛkɛndɛiyo mi la chuu ya ndu.”

18 Mi buɛi ndɔɔ o pilɛ dimi aa: “I che niŋ po Chɛɛse wo, wana waa Bɛtilɛhɛm towaa lɔɔ nyɛkɛndɛi. O nɔ kɔl simulaa, nduyɛ kuubanɔ kpaaya bɛndoo o cho ni.+ O chaa suɛi, o naŋ,+ nduyɛ Chɛhowa cho latulu a ndu.”+ 19 Okoŋ, mi Sɔɔ viam buɛiyaa nduaa o Chɛɛse lo a yooŋgoo hoo aa: “Yɔŋ ya Deeve po num, o cho saa ikɛiyo.”+ 20 Okoŋ kɔɔli, mi Chɛɛse chua beediiyo* a muɛiyaŋ o bɔlɔ yau visioo niŋ, vɛlɛ a chuiŋ fɔŋndɔɔ. Mbo dovi sofɛlɔɔ o kɔɔ, mbo ke Deeve po ndɔ le mbo yoo Sɔɔ. 21 Mi Deeve kua o Sɔɔ lo, nduyɛ mbo kandu wallo le ndu.+ Mi Sɔɔ kaala Deeve kaalaa pila, mbo simnuŋ wana biilul ndu wolɔɔla ndɔla chɔulaŋ ndo. 22 Mi Sɔɔ yɔŋ yooŋgoo o Chɛɛse lo aa: “A yandii, I yeema mi Deeve wa niko nanuŋ mbo wa wallo le ya. Kanifuule, I kaala ndu bɔɔ.” 23 Teleŋ o teleŋ yiyaŋ wɔɔŋndo* ndoo hiŋ pɛ Sɔɔ o kɔl, Deeve chua towaa o loolul ndu, okoŋ Sɔɔ miiŋgu o ndupila niŋ, o sinaŋ nyɛkɛndɛi, nduyɛ yiyaŋ wɔɔŋ koŋ fula ndu o kɔl.+