Ikilisiaati

11 Wuu* nyɛdiaa numndo o mɛŋndaŋ choo.+ Kanifuule te palɛi bɔɔbɔɔ hiou pɛ, a cho ndu vɛlɛ saalɔŋ.+ 2 Ke wanaa ŋɔmmɛu ɔɔ a ŋɔmaa nyɛ ŋ nɔ wo.+ Kanifuule, a sina kpundɛ suu cho delɔɔ o lɛŋndeŋ choo wo le.

3 Te mɛŋndaŋ ma pɛ pɛ o yumbu yumboo niŋ, piɔɔ sia o lɛŋndeŋ choo. Nduyɛ te yɔmndo del pɛ ba tou wo ɔɔ ba luaŋ ndo, fondaŋ o del lo, loŋ o wa ihini ni.

4 Wana o wana sim pɛ hueiye mɛɛndaŋndo, o seŋ kulloŋ te. Nduyɛ wana o wana chal pɛ choo mɛɛndaŋndo, o kuu nyɛ o nyɛ le.+

5 Mɛɛ wana nɔla ma sina mɛɛ nyina Mɛlɛkaa tosa wallo a paala chɛlɛkpɛ cho wana folioo* o dembe wo le yɛ,+ lende koni wana nɔla ma chii walta Mɛlɛka tonyaa sina le ni, o tosa nyɛ o nyɛ fee wo.+

6 Saŋ kuluŋ numndo idii, nduyɛ pɛŋgi le haaa mi paaleŋ le del.+ Kanifuule, a sina i cho wulɔɔ ve le. Ko hei ɔɔ ipilɛi, ɔɔ muŋ kpou cho wulɔɔ ni, a sina le.

7 Nyɛ teŋgaa naŋ bɔɔ. Nduyɛ, i cho bɔɔ suɛi kɛndɛ le mi hɔlteŋ le che paaleŋ. 8 Te wanachioo viou pɛ yoomu le wɔsila bɔɔbɔɔ, o tuei muŋ yeela kpou.+ Kɛ o kɛsiŋ o kɔl maa palɛi nyɛpalaa cho wa i hɔbɛi. Nyɛ o nyɛ cho yɔŋnɔŋ okoŋ kɔɔli, nyɛ fondoo fuu.+

9 Feleŋguaa, la dɔɔnuŋ nyaale o feleŋgɔyɛi nyɛi niŋ, mi la wa a kɔl kɛndɛ teleŋ nya cho feleŋguaa wo. La tosa nyɛ kɔlta nyalaŋ la dimul nya le tosaa wo, okoŋ mi la kuɛ ba o ba hɔlte nyaleŋ le yɛɛ nya pɛ. Kɛ, la kɛsiŋ o kɔl maa nyɛ o nyɛ nya tosa pɛ, Mɛlɛka tonyaa cho nya yamɛi kilul* le ndu.+ 10 Lelaŋ, la soliŋ nyɛ o nyɛ huŋ a kpundɛlaŋ nya o lakɔl, nduyɛ mi la soliŋ sɔɔŋ wɔɔŋndoŋ o ŋdial. Kanifuule yoomu ifeleŋgɔyaa, nyɛ fondoo fuu o cho ni.+