Chɔɔchiaa

4 Kɛ mɛɛ Ihudi vi, mi Isɔluɛiya tosa vɛlɛ nyɛ bɛnda Chɛhowa o hɔl te wo.+ 2 Le hei, mi Chɛhowa pisi nda Chabiŋ o ba, masaa le Kenaŋ,+ o wa o masaleŋ choo Hasɔɔ wo. Wana wa puaa chɔuwaa nduaa bolleŋ ndo wa Sisɛlua ni. Nduyɛ, Halɔsiɛti-hakoyim+ o wa ichali ni. 3 Mi Isɔluɛiya chaŋ o Chɛhowa lo le malaa.+ Kanifuule, Chabiŋ ndoo nɔ nyɛm nyaanaŋ chiliŋuŋ sɛɛmbiaa suaa naŋndoŋ 900.+ Nduyɛ le wɔsilaŋ 20, o wa Isɔluɛiya nyɛkindilaa kala kalaa handɔɔ choo.+

4 A teleŋ koŋ, Dɛbolua, wana lanɔ ndoo suaa le Mɛlɛka wo+ wa wana kialaa ŋyamaa o Isɔluɛi niŋ ni. Nduyɛ lanɔɔ Lapidɔti o wa ni. 5 Mi Dɛbolua ndoo chal o wau ndɔɔ* bɛŋgu, Luama+ a Bɛtɛl+ tɛɛŋ o fondaŋ ŋpemboo, o tanda Ifiluem ndo niŋ. Nduyɛ, mi Isɔluɛiya ndaa kuɛ o ndu lo le sinaa nyɛ Mɛlɛka dimi wo. 6 Mbo yooŋgu le Baluaki,+ po Abinowam ndo, fulaa Kɛdɛɛsi-nafitalii.+ Mbo dimul ndu aa: “Chɛhowa, Mɛlɛka Isɔluɛiya dimi aa, ‘Kɔ ma hɛli puaa 10,000 o yuŋgu Nafitalii a Sɛbulɔŋ ndo choo, mi la kuɛ nya ndaa o Pembii Tabɔɔ Ve. 7 I cho tosa mi Sisɛlua, masa cho puaa chɔuwaa Chabiŋ nda bolleŋ ndo, a nyɛm ndɔŋ nyaanaŋ suaa naŋndoŋ vɛlɛ a puaa nduaa chɔuwa kpou tol o pioo* Kisiɔŋ.+ Nduyɛ I cho ndu num malɔɔ o ba.’”+

8 Okoŋ mi Baluaki dimul Dɛbolua aa: “Te a chɛl pɛ miŋ kuɛ latulu, mɛɛ ya bɛɛ I cho lakɔ. Kɛ te a chɛl te, mɛɛ ya bɛɛ I cho lakɔ le.” 9 Mi Dɛbolua dimul ndu aa: “I chɛl le miŋ kuɛ naa num latulu. Kɛ loonuŋ maa, chɔu ŋ cho hoo kɔlaŋ ndo, o cho num te cho chandɔɔlaŋ sɔla le. Kanifuule, wana lanɔɔ o ba Chɛhowa cho Sisɛlua malɔɔ ni.”+ Okoŋ mi Dɛbolua chaŋ, ma kua nda Baluaki latulu Kɛdɛɛsi.+ 10 Mi Baluaki chuuŋgiaa yuŋgu Sɛbulɔŋ ndo a yuŋgu Nafitalii+ yo Kɛdɛɛsi. Nduyɛ, mi puaa 10,000 tual ndu kɔɔli. Dɛbolua bɛɛ mbo kua a ndu latulu.

11 Po pilɛ wa diolaŋ aa Hɛba, Kenaitiinɔɔ o wa ni. Nduyɛ Kenaitiiya,+ o pulale Hobabi, lefoo Muuse+ leŋ choo nda fula ni. Mbo faŋaŋ wanaa nduaa ikɛi, mbo kɔ kindu tɛndii ndɔɔ o yɔm bɛndoo ikɛi Saananim, o Kɛdɛɛsi niŋ.

12 Ma dimul Sisɛlua maa, Baluaki po Abinowam ndo kuɛ o Pembii Tabɔɔ Ve choo.+ 13 O lepilɛ niŋ kpe, mi Sisɛlua chuuŋgiaa nyɛm ndɔŋ nyaanaŋ chiliŋuŋ sɛɛmbiaa suaa naŋndoŋ 900, a puaa nduaa chɔuwa kpou a ndaa fula Halɔsiɛti-akoyim nda, le kɔlaŋ o pioo* Kisiɔŋ.+ 14 Mi Dɛbolua dimul Baluaki aa: “Chɔŋ, kanifuule paaleŋ ndeŋ hau Chɛhowa cho Sisɛlua malɔɔ num o ba ni. Baa o cho Chɛhowa le cho num kɔlaŋ lachi le?” Mi Baluaki tual Pembii Tabɔɔ Ve. Nduyɛ, puaa 10,000 wa ndu kɔlaŋ kɔɔli. 15 Okoŋ, mi Chɛhowa mal sɛɛŋgiaŋ bɛndoo puaa chɔuwaa Sisɛlua wa tɛɛŋ+ a nyɛm ndɔŋ nyaanaŋ suaa naŋndoŋ, muɛi faŋii Baluaki ve lachi. O mɛɛlulaŋ kpɔŋ, mi Sisɛlua tual o nyɛ ndɔ nyaanaŋ suaa naŋndo choo, mbo nyaanuŋ. 16 Mi Baluaki tisa nyɛm nyaanaŋ suaa naŋndoŋ a puaa nduaa chɔuwa kɔɔli haaa Halɔsiɛti-akoyim. Okoŋ, ma diu diu puaa chɔuwaa Sisɛlua wa kpou a muɛi faŋnde, o pilɛ bɛɛ lo le.+

17 Kɛ mi Sisɛlua nyaanuŋ o tɛndii Chayɛɛ wo,+ lanɔɔ Hɛba,+ Kenaitiinɔɔ. Kanifuule, kɔl nyuloo wa Chabiŋ+ masaa le Hasɔɔ tɛɛŋ a yuŋgu Hɛba wo. 18 Okoŋ mi Chayɛɛ fula o tɛndii ndɔɔ niŋ, mbo kua Sisɛlua lachi. Mbo dimul ndu aa: “Huŋ masanɔ nuu, huŋ luɛi nanuŋ. Yɔŋ isiooŋ te.” Okoŋ mbo kɔ luɛi o tɛndii ndɔɔ niŋ, nduyɛ mi Chayɛɛ kuumbuu ndu kola bɛndoo mulaa. 19 Mi Sisɛlua dimul ndu aa: “Yandii, ke ya mɛŋndaŋ mi kol, kanifuule bololeŋ le vesa ya bɔɔ fɔ.” Mi Chayɛɛ kumbi bɔlɔ yau visi milikiiyaŋ* ma wa leniŋ ndo, mbo ke ndu mbo kol.+ Okoŋ kɔɔli, mbo miŋgi ndu kolaa kuumbuu mulaa. 20 Mi Sisɛlua dimul ndu aa: “Sim o dio tɛndiiyo. Nduyɛ te wana o wana huŋ nyuna num pɛ aa, ‘Baa wana pɔnɔ cho pa nanuŋ?’ Dimul ndu aa, ‘Wana pɔnɔ cho nanuŋ te!’”

21 Okoŋ, mi Sisɛlua hiaunuŋ o luaŋ yikpi, kanifuule o wa o saŋgɛi yɔkɔɔ. Mi Chayɛɛ, lanɔɔ Hɛba chua nyɛ siombu siombu nda kindu tɛndiiyo wo a haamɛiyo,* mbo kua yɛlɛŋ yɛlɛŋ mbo baŋ ndu nyɛ koŋ o lebol mbo luɛi lɛŋ di. Okoŋ mi Sisɛlua wu.+

22 Baluaki lo kiltaŋ Sisɛlua kɔɔli, mbo fuuluu o tɛndii Chayɛɛ wo. Okoŋ mi Chayɛɛ fula, mbo kua ndu lachi. Mbo dimul ndu aa: “Huŋ I chɔm num po ŋ cho nuuviaa wo.” Mɛɛ nda luɛi, mbo cha Sisɛlua ihini lɛŋ o vilɛiyo a nyɛ siombu siomboo ndu o baŋaa o lebol.

23 O paale leŋ choo, mi Mɛlɛka yam Chabiŋ, masaa le Kenaŋ Isɔluɛiya o hɔl.+ 24 Mi Isɔluɛiya sɔŋga kalaŋ a Chabiŋ.+ Nduyɛ, a lo sɔŋgaa a ndu haaa ma dii ndu.+