Sam
O wana sim lachi le chondei yo lo. A mɛɛ Kititi* chomul lɛ. Chondii puaa Kolua+ ve.
84 Oo Chɛhowa, Mɛlɛka puaa chɔuwa,
I kaala bɔɔ chiɛi num tɔɔma bɛndoo!+
2 Yeemɛi cho ya bɔɔ!
A tonya, yeemɛi cho ya le waa o luŋ Chɛhowa wo ve, i cho bɔɔ.+
I cho chonduŋ kɔl kɛndɔŋ soli a kɔl nuu vɛlɛ a yoomuma niaŋ kpou,
O Mɛlɛka cho yoomu wo lo.
3 Oo Chɛhowa, Mɛlɛka puaa chɔuwa,
Masa nuu a Mɛlɛka nuu,
Hali youwo bɛɛ mbo sɔla naa lɔlaa loŋ,
Nduyɛ mi lɛfɛŋndo taŋgul waaŋnde ndɔleŋ,
Naa o manda chuauwaa nduaa o bandu num luamaa lasala bɛndoo ikɛi ya.
4 Kɔl kɛndɔɔ cho le wanaa cho o chiɛi numndo niŋnda!+
A cho hiouwɔɔ lachi a num saŋgalaa.+ (Sila)
5 Kɔl kɛndɔɔ cho le wanaa sɔla yoomuaŋ o num niŋnda,+
Nduyɛ ma nɔ yeemɛi le kɔlaŋ o nɛila numndaŋ choo wa.
6 Te a kei pɛ o Kpoloŋ Yɔmii Bakaa Ve,
A siiŋguu ndu fondaŋ mamɛŋndo.
Nduyɛ, mi piɔɔ tase sia wo kumbu ndu kpu a salalaŋ.
7 A cho wa kɔlaŋ, kɛ yoomuma ndaŋ ma dɔɔnaŋ te.+
Wana o wana cho lakɔ Mɛlɛka isisi lachi Saayɔŋ.
8 Oo Chɛhowa, Mɛlɛka puaa chɔuwa, yandii tuei piɛile nileŋ.
Oo Mɛlɛka Chekɔpu wo, yaŋ nilaŋ o piɛile nileŋ. (Sila)
9 Oo Mɛlɛka naa a boo naa chɔuwo,+ tofawɔ.*
Tofa wana ŋ pɔya wo hɔlla.+
10 Waa o luŋ chiɛi numndo le paaleŋ le pilɛ bɛɛ kpe bɛnda, mbo hiau waa o fondaŋ kɛ kɛ cheleŋ le wɔsilaŋ o waalaŋ niŋ!+
Oo Mɛlɛka nuu, I kɛɛsiaa le mi sim o dio chiɛi numndo sondoo,
Mbo hiau challe o tɛndiila wanaa dɛnɛ wɔɔŋnda niŋ.
11 Kanifuule Chɛhowa Mɛlɛka cho paaleŋ+ a boo chɔuwo ni.+
Mbo bii naa nyɛkɛndɛi, nduyɛ mbo ke naa bɛɛleŋ.
Chɛhowa kɛɛ wanaa chɔm lo lechoo wo o ndu lo wa,+
Sɔɔŋ kɛndɔŋ tosallo le.
12 Oo Chɛhowa, Mɛlɛka puaa chɔuwa,
Kɔl kɛndɔɔ cho le wana dɔu tiindaŋ ndɔɔ o num niŋndo.+