Maatiu
17 Mɛɛ palɛi hiou i ŋɔmpum, mi Chiisu chua Pitɛ, a Chemisi nda Chɔŋ pɔmbɔ ndɔ, ma hel o pembii vilɛi pum choo nda kpeele.+ 2 Okoŋ, mi Chiisu maŋgaŋ nda o hɔl. Mi hɔlla wa ndu wolioo maa lepala. Nduyɛ, mi nyɛla wa ndu lekɔɔ laŋ la yɔŋnuŋ ŋɛlɛŋgi ŋɛlɛŋgi* maa nyɛ teŋgaa.+ 3 O lepilɛ niŋ kpe, mi Muuse nda Ilaicha fula nda o hɔl, ma cha nda suukaŋndo a ndu. 4 Okoŋ, mi Pitɛ dimul Chiisu aa: “Masanɔɔ, o bɛnda bɔɔ miŋ wa nanuŋ. Te a yeema pɛ, I taŋgul tɛndiilaŋ* la yaa nanuŋ. O pilɛ le num, o pilɛ le Muuse, nduyɛ o pilɔɔ le Ilaicha.” 5 Pitɛ lo suɛi, mi yumbu yumbu bɛndoo huŋ kumbu nda kpu. Okoŋ, ma tuɛi diomndo o yumbu yumbu koŋ niŋ aa: “Po nuu cho hoo ni. I kaala ndu, nduyɛ I hini kɔl a ndu.+ La tuei ndu diom.”+ 6 Mɛɛ buɛiyaa nduaa tuei hei, mi siooŋii bɛnduei bii nda, okoŋ ma deli lɛŋ lɛɛsiɛŋ. 7 Kɛ mi Chiisu huŋ nda ikɛi, mbo pilaŋ nda mbo dimi aa: “La chɔŋ. La yɔŋ isiooŋ te.” 8 Mɛɛ nda chɛŋ ma mɛɛndaŋ, a chi lɛ wana o wana cheleŋ te, mɛɛ Chiisu. 9 Mɛɛ nda wa pembei tolɔɔ, mi Chiisu dimul nda aa: “La dimul wana o wana a yilaŋnde hei okɔɔ le, haaa mɛɛ mi Po wanachioo huŋ miiŋgu yoomu.”+
10 Kɛ, mi buɛiyaa nduaa nyuna ndu aa: “Le yɛɛ wanaa pɛɛku waŋnda sawala Mɛlɛkalaŋ nda dimi yɛ niko maa Ilaicha fɛlɛŋ nɔ mbo hiŋ?”+ 11 Mbo mulul nda aa: “A tonya Ilaicha nɔ mbo hiŋ, nduyɛ mbo huŋ miŋgi nyɛ o nyɛ o fonda ndɔɔ.+ 12 Kɛ mi dimul nya, Ilaicha hiŋ niŋ, kɛ waŋnda sina ndu lapɛŋgu le. Nduyɛ ma tosa nyɛ o nyɛ ndaa yeema a ndu.+ Lende koni nda saaŋgiaa niŋ Po wanachioo ni.”+ 13 Mi buɛiyaa nduaa sina niko pɛŋgu maa a Chɔŋ Wana Yiŋaa okɔɔ o wa suɛi ni.
14 Mɛɛ nda fuuluu naa faŋgaa wa wa,+ mi po pilɛ huŋ beŋ Chiisu wulaŋ. Mbo dimi aa: 15 “Masanɔɔ, yandii tuiinuŋ po nuu inyiɛɛ fɔ, kanifuule naa wovɛiyo cho ndu ni. Nduyɛ teleŋnda bɔɔbɔɔ te o biondu pɛ, mbo del o yiŋ, te koŋ te o mɛŋndaŋ niŋ.+ 16 Mi huŋ a ndu o buɛiyaa numnda lo le ma siŋgi ndu, kɛ a tiuba le.” 17 Mi Chiisu dimi aa: “Ee nya waŋnda haa, baa la nɔ laalaŋ te? La cho wanaa tuunduɛi.+ Le vɛɛ kpɛ ya cho yɛ wa a nya latulu? Le vɛɛ kpɛ ya cho yɛ wa nya biuwɔŋndo? Huŋ a ndu naa ya chua.” 18 Mi Chiisu deŋul nyina wɔɔŋ wa poombɔɔ kɔɔli wo mbo faŋaŋ ndu kɔɔli. Okoŋ mi poombɔɔ siaŋgu o foofo koŋ choo.+ 19 Okoŋ kɔɔli, mi buɛiyaa nduaa huŋ naa ndu chua nda kpeele ma nyuna ndu aa: “Le yɛɛnɛ naŋ bumba yɛ nyina wɔɔŋ koŋ touwɔɔ?” 20 Mbo mulul nda aa: “Le mɛɛ nya nɔ laalaŋ bɔɔ le yɛ. A tonya mi dimul nya, te la nɔ pɛ laalaŋndo o yɔŋ bɛɛ maa kulii mɔsitaa ve, la dimul pembei hei aa, ‘Faŋaŋ naŋ ma kuɛ nda,’ mi i kuɛ. Nduyɛ nyɛ o nyɛ la bumba niŋ tosa le.”+ 21* ——
22 Teleŋ nda wa o Kalili niŋndo Chiisu dimul nda ni aa: “A cho hunɔɔ Po wanachioo pisi waŋnda o ba,+ 23 nduyɛ ma dii ndu. O paale yaa ndɔleŋ choo, mbo miiŋgu yoomu.”+ Mɛɛ nda tuei hei, mi mɔnɛi bii nda tau tau.
24 Mɛɛ nda fuuluu Kepaaniɔm, mi puaa wa chuuŋgiaa dulamɛi muuŋ ndoŋ* biyɔɔ wa sɔɔŋguu Pitɛ ikɛi ma nyuna ndu aa: “Baa wana nya pɛɛkaa ndu yɔŋgu chuuŋgiaa dulamɛi muuŋ ndo le?”+ 25 Mi Pitɛ muli aa: “Mbo yɔŋgu.” Kɛ mɛɛ o luɛi ndɔɔ chiɛiniŋ, mi Chiisu nyuna ndu aa: “Vɛɛ num yiyaŋ yɛ Saimɔŋ? Nɛɛ yaa masaa cho o lɛŋndeŋ choo wa bii yɛ chuuŋgiaa o ba? Chuauwaa ndaa ɔɔ mialla?” 26 Mbo muli aa: “Mialla o ba.” Mi Chiisu dimi aa: “Mɛɛ o kpeekpei niŋ, chuauwaa ndaa nɔ ma yɔŋgu chuuŋgiaa le. 27 Kɛ yɔŋii naŋ tɛɛmbuu nda kɔllo,+ kɔ wuu doŋnde o mɛŋma ihɛllaŋ niŋ. Suu tase ŋ cho chua wo, te a kumbi ndu sondoo pɛ, a cho chɔ kanii humbuei* ndu o sondo. Soli ndi ma kɔ ke nda le naa ŋiɔɔŋ.”