Chɔŋ

10 “A tonya mi dimul nya, te waŋndo keeku o dio le luɛiyɔɔ o kpaki saa niŋ te, kɛ mbo keeku naa cheleŋ pɛ, mɛɛ viinɔɔ o cho ni.+ 2 Kɛ wana keeku o dioo le luɛiyɔɔ wo, ndu cho wana manda saa wo ni.+ 3 Mi wana cho dioo mandaa wo kumbul wana koŋ dioo,+ nduyɛ mi saa nduaa tuei ndu diom.+ Mbo veelu saa nduaa diolaŋ a pilɛŋ pilɛŋnda, mbo fula a nda. 4 Te o chii pɛ saa nduaa kpou soli mbo sim nda lachi le kɔlaŋ, ma tol ndu kɔɔli, kanifuule a sina diom ndɔɔ. 5 Saa nduaa tul wana nda sina le wo kɔɔli le. Kɛ nyaanɔŋndo nda nyaanuŋ ndu ni, kanifuule a sina diom ndɔɔ le.” 6 Mi Chiisu dimul nda taloo hoo, kɛ a bii nyɛ o wa nda dimullo wo bila le.

7 Mi Chiisu dimi vɛlɛ aa: “A tonya mi dimul nya, ya cho dio saa keeku wo ni.+ 8 Wanaa hiŋ ya tase ma chɔm maa o diola nilaŋ niŋ nda hiŋ ni wa kpou, viiya nda cho ni, saa yeŋ nda lani le. 9 Ya cho dioo ni. Wana o wana keeku pɛ o ya niŋ le luɛiyɔɔ, o cho chindaa sɔla, nduyɛ wana koŋ cho wa luɛiyɔɔ mbo fula mbo saaluŋ nyɛdiaa.+ 10 Viinɔɔ hiŋ fondo fuu le, kɛ le chiimbuuwo, diyɔɔ, a tɛɛmbuuwo o huŋ ni.+ Kɛ ya ya, I hiŋ le mi saa sɔla yoomoo. 11 Ya cho wana mandaa lasaa kɛndɔɔ ni.+ Mi wana mandaa lasaa kɛndɔɔ yɔŋgu yoomu ndɔɔ le saa nduaa.+ 12 Wana nda paawa* hoo le saa waa hɔlteŋndo, ndu cho wana mandaa lasaa le, nduyɛ o cho ndu le nɔ saa le. Te wana waa nuaa che pɛ visi biyaa hunɔɔ, mbo nyaanuŋ, okoŋ mi visi biyaa diu atiŋ, mi a tuaa kpou saŋnuŋ. 13 Le mɛɛ nda chua ndu le wallo yɛ o tosa lende ni, nduyɛ o buulaŋ a saa le. 14 Ya cho wana mandaa lasaa kɛndɔɔ ni. I sina saa niaa, nduyɛ saa niaa bɛɛ sina ya,+ 15 mɛɛ Finyaa sina ya, mi ya bɛɛ sina Finyaa yɛ.+ Nduyɛ mi yɔŋgu yoomu nuu le saa niaa.+

16 “I nɔ saa cheleŋ, kɛ nda cho o kundaa hoo choo le.+ Kaŋ bɛɛ, I cho hunɔɔ a nda, ma tuei ya diom, ma simnuŋ kundaa o pilɛ, okoŋ ma nɔ wana mandaa o pilɛ.+ 17 Le saboo hoo Finyaa kaala ya ni,+ le mɛɛ ya yɔŋgu yoomu nuu+ le mi miŋgi ndu vɛlɛ sɔla yɛ. 18 Wana o wana helu ya yoomu nuu o ba le, yapila yɔŋgu ndu ni. I nɔ kpaayaa le yoomu nuu yɔŋgoo, nduyɛ I nɔ kpaayaa le ndu vɛlɛ sɔlaa.+ Nyɛ Finya nuu dimul la le tosaa wo, ndu ya tosa koŋ ni.”

19 Mi piɔuwaŋndo del vɛlɛ Chuuwa tɛɛŋ+ le sɔɔŋ o dimi muŋ ndoŋ. 20 A bɔɔbɔɔ wa dimioo aa: “Nyina wɔɔŋndo cho ndu kɔɔli ni. Seemaa o seema nuaa ni. Le yɛɛnɛ nya cho yɛ ndu nilaŋ yaŋɔɔ?” 21 Mi apum dimi aa: “Wana nyina wɔɔŋndo cho kɔɔli wo suu sɔɔŋ waa nuaa le. Nyina wɔɔŋndo tosa pa mi wanaa sumɛiya che?”

22 A teleŋ koŋ, Bɔŋaŋndo le Chiɛi Mɛlɛkaa Kumbioo wa Chulusalɛm. Teleŋ ihueiyo wa koŋ ni, 23 nduyɛ Chiisu wa balɔɔ o chiɛi Mɛlɛkaa niŋ, o toŋgo Sɔlɔmɔŋ ndo.+ 24 Okoŋ mi Chuuwa balu ndu ma kandu ndu nyunaa aa: “Le yɛɛnɛ ŋ cho yɛ naa kuɛi yɛiyo? Te num cho Kiliti ni, mɛɛ dimul naa kpendekele.” 25 Mi Chiisu mulul nda aa: “I dimul nya niŋ, kɛ la laalaŋ te. Walta ya cho tosaa o diola Finya nuu niŋndaŋ, laŋ la cho seileŋ timbioo a ya okɔɔ ni.+ 26 Kɛ la laalaŋ te, kanifuule la cho saa ni le.+ 27 Mi saa niaa tuei ya diom, I sina nda, nduyɛ ma tol la kɔɔli.+ 28 Mi ke nda yoomu fafɛɛŋndo,+ nduyɛ fɛɛŋ bɛɛ a vi le. Wana o wana nɔla mbo poonda nda ya o ba le.+ 29 A Finya nuu ke ya wa hiou poloŋ a nyɛ o nyɛ cheleŋ. Nduyɛ wana o wana nɔla mbo poonda nda Finyaa o ba le.+ 30 Naa Finya nuu, nyɔɔ o pilɛ kpe naŋ cho ni.”*+

31 Mi Chuuwa chɔuviaa vɛlɛ poutaŋ le Chiisu vii viiyo. 32 Mi Chiisu dimul nda aa: “I tosa walta kɛndɛla bɔɔbɔɔ Finyaa vem ya tosaa laŋ nya o hɔl. Le walta kuɛɛ o laŋ tɛɛŋ nya yeema yɛ ya vii viiyo?” 33 Mi Chuuwa muli aa: “O cho le wali kɛndɛ le naŋ cho num vii viiyo le, kɛ le diola Mɛlɛkalaŋ tɛɛmbuuwo.+ Wanachioo ŋ cho ni, kɛ ma siiŋguu numpila mɛlɛka.” 34 Mi Chiisu dimul nda aa: “O yau nya laSawaa niŋ, mi Mɛlɛka dimi aa, ‘Mɛlɛkaa nya cho ni.’”+ 35 Mɛlɛka veelu wanaa o pɛɛsa wa aa ‘mɛlɛkaa,’+ nduyɛ la sina maa diom Mɛlɛkaa siŋgaŋ te. 36 Ya yɛ, Finya nuu hɛli ya ni mbo viam ya o chieeŋndo niŋ. Mɛɛ le yɛɛnɛ nya dimi yɛ maa I ‘tɛɛmbuu diola Mɛlɛkalaŋ’? Baa le mɛɛ ya dimi maa, ‘Po Mɛlɛkaa ya cho ni’ yɛ?+ 37 Te o cho walta Finya nuu le ya cho tosaa le, la laalaŋ ya le. 38 Kɛ te walta ndɔlaŋ ya cho tosaa ni, mi la laalaŋ ya bɛɛ le, la laalaŋ walta ya cho tosaa laŋ,+ le halikpeŋ mi la sina, nduyɛ mi la hiou lachi a sinaa maa Finyaa cho diompilɛ a ya, nduyɛ ya bɛɛ cho diompilɛ a Finyaa.”+ 39 Okoŋ ma kindiŋ vɛlɛ le ndu biyɔɔ, kɛ a tiu ba le.

40 Mbo kuaŋnuŋ vɛlɛ Chɔɔdaŋ leeloo o fondaŋ Chɔŋ kandu waŋnda yiŋɔɔ wo,+ mbo waŋnuŋ loŋ. 41 Mi wanaa bɔɔbɔɔ huŋ naa ndu chua, ma kandu dimioo aa: “Suɛi kaamɛi i pilɛ bɛɛ Chɔŋ tosa le, kɛ sɔɔŋ o dimi a laŋunɔɔ hoo okɔɔ woŋ kpou, tonya ŋ cho ni.”+ 42 Mi wanaa bɔɔbɔɔ duau laalaŋndo o ndu niŋ o fondaŋ koŋ.