Chudi

1 Ya Chudi, buɛi Chiisu Kiliti wo, pɔmbɔɔ Chemisi,+ ya cho yauwo hoo poonyiaa naa nya wanaa Mɛlɛka veelu wa chua ni.+ Nya wanaa Mɛlɛka Finya naa o kaala, nduyɛ mbo wa nya mandaa le Chiisu Kiliti wa:+

2 Maa Mɛlɛka tuiinuŋ nya inyiɛɛ, mbo ke nya kɔl nyuloo, nduyɛ mbo chɔɔlu nya kaala ndɔɔ chɔm fɔ!

3 Chaaŋaa niaa kaalaa, mi che bɛɛ yeemɛi wa ya le nya poonyiallo a pioŋɔɔ naŋ cho lehɔl o nɛiyo okɔɔ,+ kɛ mi saaluŋ maa o bɛnda mi poonyial nya le nya dɛɛniaa mi la sim o kala poŋ le laalaŋ+ wanaa diandaa a sɔla hoo le pilɛ kpe, nduyɛ mbo wa le fɛɛŋ a fɛɛŋ ndo. 4 Sabu ya cho hei dimioo wo cho ni maa, waŋnda apum, a Yau Mɛlɛkaa dimi maa a nɔ le nda yamɛi kilullo wa luɛi nya tɛɛŋ sɔɔsɔɔ. Waŋnda haa bii ma muli kɛndɛi bɛnduii Mɛlɛkɛi balaŋ amakɔɔ, le kaa kɔl vesɛiyo* tosaa.+ Nduyɛ, ma sɛɛŋgiaa diom dimiŋ maa Chiisu Kiliti ndu pilɛ kpe cho Masanɔ naa ni wo.+

5 Mi che bɛɛ la sina a sɔɔŋ muŋ okɔɔ nyɛkɛndɛi, kɛ I yeema mi yiyalaŋ nya maa, mi Chɛhowa* piŋi waŋnda, mbo soli nda o chɛleŋ niŋ Ichipi.+ Okoŋ kɔɔli, mbo tɛɛmbuu wanaa ndaa dou laalaŋ o ndu niŋ te wa.+ 6 Nduyɛ, maalikɛiyaa kɛɛ fondaŋ ndaa a wali ndaa o choo choo niŋnda bɛɛ,+ mbo duau nda o yɔlɔŋ, okoŋ mbo wou nda o fondaŋ nyumma kpiŋgbi bɛndoo niŋ, haaa mi paale bɛndule o kilul niŋ waŋnda yamɛileŋ le fuuluu.+ 7 Lende koni waŋnda Sodɔm, Komoolua, a chieeŋ bɛnduŋ balu nda woŋ yiŋnuŋ o kaa ihini nɔɔlɛiyo* niŋ ni, nduyɛ ma tual yeemaŋ ndaŋ ŋdialloŋ kɔɔli,+ ŋ bɛnda kposoŋ te woŋ. Ma sɔla tambei o yiŋnde fɛɛŋ a fɛɛŋ ndeŋ niŋ.+ Tamasilaŋ ndaŋ la cho maa sila le naa.

8 A koŋ kpou, waŋnda haa bɛɛ cho a yiŋnaŋ o yiyaŋnda wɔɔŋndaŋ niŋ, ma wa dialuŋ ndaŋ nɔɔliaa, ma kɛɛ le luɛiyɔɔ Mɛlɛka o ba bɛŋgu, nduyɛ ma wa sɔɔŋ wɔɔŋndoŋ dimioo a wanaa Mɛlɛka ke bɛɛleŋ nda okɔɔ.+ 9 Kɛ mɛɛ Maikɛɛ,+ o cho masa maalikɛiya+ wo sɛɛŋgiaŋ nda Setana* o dialuŋ Muuse woŋ choo,+ i del ndu bɛɛ o kɔl le mbo kilul ndu iyama ɔɔ mbo ke ndu lediom te.+ Kɛ mbo dimi aa: “Maa Chɛhowa* kilul num yamɛi.”+ 10 Kɛ waŋnda haa, nyɛ nda sina pɛŋgu le wo, a ndu okɔɔ nda suaa diomnda wɔɔŋndaŋ ni.+ Sɔɔŋ nda sina yɛ pɛŋgu woŋ, mɛɛ visiaa yonduaa sina sɔɔŋ yɛ koni nda sina muŋ ni.+ Nduyɛ sɔɔŋ muŋ koni luei yɛ nda o kpundɔɔ niŋ ni.

11 Hei cho bɔɔ suɛi kpundɛ le nda, kanifuule a tol kaa Keŋ ndo kɔɔli,+ nduyɛ ma luei bolleŋ o biondɔŋ Belam tosa wo+ niŋ le hɔlte ikanileŋ.* Ma tosa vɛlɛ nilakalulaŋ+ maa Kolua.+ Le hei, a chii niŋ bɛɛ tambei sɔla. 12 Mɛɛ pouta siombu siombulaŋ la cho o mɛŋndaŋ bɛŋgu yɛ, lende waŋnda haa wa nya tɛɛŋ ni te la chuuŋgiaŋ pɛ le nyɛdiaa ichaŋyaa dioo.+ Wanaa mandaa lasaa buulaŋ le dembela ndalaŋ kinɛiya nda cho ni.+ Mɛɛ piɔɔ hel nuaa mi hueiye hivi ndu yɛ, lende nda cho ni.+ Mɛɛ yɔmndo kɛɛ nuaa le komɔɔ a teleŋ kuamaa yɛ, lende nda cho ni. Mɛɛ nda suŋgu nuaa yɔmndo mbo vi yɛ, lende nda cho a vilɛi pɛ pɛ ni. 13 Sɔɔŋ lasiɔmbuŋ nda tosa woŋ cho ko mɛɛ mɛŋma ihɛllaŋ ma luaanuŋ nuaa mi hiiyo kinduŋ yɛ.+ Nduyɛ mɛɛ looŋ tɛnda nuaa choo choo yɛ, lende nda cho ni. Mɛlɛka dɔu nda o fondaŋ nyumma kpiŋgbi bɛndoo niŋ le ma wa loŋ le fɛɛŋ a fɛɛŋ.+

14 Mi Inɔki,+ o wa finya mama ŋɔmmɛuwo chɔŋ a boondii Adam nde wo dimi yooŋgu Mɛlɛkaa a nda okɔɔ aa: “La nuawɔ Chɛhowa* hunɔɔ a maalikɛiyaa nduaa waalaŋ o waalaŋ niŋ.+ 15 O cho hunɔɔ le mbo kilul wana o wana yamɛi!+ Nduyɛ wana o wana cho wana dɛnɛ wɔɔŋ, o cho nda nyɛpalaa tusi choo le yɔŋnda wɔɔŋnda nda tosa laŋ, a diomnda wɔɔŋnda nda soo a ndu okɔɔ laŋ kpou.”+

16 Wanaa ŋɔɔchiaŋnda waŋnda haa cho ni.+ A hini kɔl a nyɛm nda nɔ woŋ te. Yeemaŋ ndaŋ ŋdialloŋ kinɛi nda tual kɔɔli ni.+ Yoŋgaa kiolɔɔ a ndapila okɔɔ, nduyɛ ma dimul acheleŋnda sɔɔŋ yeelɛiyoŋ le halikpeŋ ma sɔla nyɛ nda yeema wo.+

17 Kɛ nya chaaŋaa niaa kaalaa, la loonuŋndɔ a diomnda kiilaa Masanɔ naa Chiisu Kiliti wa dimi paandu laŋ. 18 Ma dimul nya aa: “Te mɛɛlula chieeŋndo la fuuluu pɛ, waŋnda wa niŋ suɛi Mɛlɛkɛi mamɔɔ, nduyɛ ma wa yeemaŋ ndaŋ wɔɔŋndoŋ tolɔɔ kɔɔli.”+ 19 Waŋnda haa huŋ a piɔuwaŋndo ni.+ Kaa ivisiyaa nda nɔ ni, nduyɛ nyina Mɛlɛkaa cho nda choo le. 20 Kɛ nya chaaŋaa niaa kaalaa, la hiou lachi a maaliaŋndo le laalaŋ nya nɔ o Mɛlɛka niŋndo kindioo poŋ. La piɛi a mɛɛ nyina diandaa chɔm nya nɛiyo yɛ.+ 21 Nduyɛ, mɛɛ nya cho chumndo le mi Masanɔ naa Chiisu Kiliti tuiinuŋ nya inyiɛɛ, mi la sɔla yoomu fafɛɛŋndo yɛ,+ la lo o kaala Mɛlɛkaa bɛŋgu.+ 22 La hiou lachi a wanaa nɔ kiisaŋndaŋ+ nda nyiɛɛye tuiinɔŋndo.+ 23 A cho kɔlaŋ delɔɔ o yiŋndeŋ niŋnda, la miŋgi nda o nɛi, mi la piŋi nda.+ La hiou lachi a waŋnda nyiɛɛye tuiinɔŋndo, kɛ mi la mandaŋ. Nduyɛ, yɔŋ wɔɔŋ kɛ kɛ nda cho leniŋ, la tul ndu leyɛ.+

24 Saŋgalaa cho le Mɛlɛka nɔla mbo manda nya, la luei o haki niŋ te wo. O nɔla mbo tosa mi la wa a diandaa,+ nduyɛ mi la wa ndu o hɔl a kɔl kɛndɛ bɛndoo. 25 Saŋgalaa cho le Mɛlɛka piŋi naa sanaa o Masanɔ naa Chiisu Kiliti niŋndo. Saŋgalaa cho le ndu le naŋɔɔ ndɔɔ, tɔɔmayɛi nduɛi, kpaaya ndɔɔ, a le cho o cho nyɛ o nyɛ fee bolleŋ ndo, chɔŋ o sindɔɔ niŋ, suŋ suŋ, a le fɛɛŋ a fɛɛŋ. Amiina.*