Chɔŋ Tasoo
3 La nuawɔ se mɛɛ Finyaa kaala naa yɛ!+ Mɛɛ o kaala naa tei, miŋ sɔla veeloo aa chuauwaa Mɛlɛkaa.+ Nduyɛ chuauwaa nduaa naŋ cho ni. Le sabu koŋ chieeŋndo sina naa le ni,+ kanifuule chieeŋndo sina ndu le.+ 2 Chaaŋaa niaa kaalaa, chuauwaa Mɛlɛkaa naŋ cho niŋ ni.+ Kɛ ŋ sina wɔ kpeekpei mɛɛ naŋ cho hunɔɔ wa yɛ le.+ Ŋ sina maa te o huŋ chɔɔmuŋ pɛ, ŋ cho wa maa ndu, kanifuule ŋ cho ndu chɔ mɛɛ o cho yɛ. 3 Lelaŋ, wana o wana nɔ pɛ tiindaŋndo hoo o ndu niŋ, o nɔ mbo dindi ndupila,+ mɛɛ ndu bɛɛ cho o diandaa yɛ.
4 Wana o wana lambaŋ pɛ hakioo tosaa, mɛɛ o cho lambaŋndo sawa Mɛlɛkaa tɛɛmbuuwo. Kanifuule, sawa Mɛlɛkaa tɛɛmbuuwo cho hakioo ni. 5 La sina vɛlɛ maa le hakila naalaŋ faŋaa o hiŋ ni.+ Nduyɛ, ndu nɔ haki o haki le. 6 Wana o wana wa pɛ o diompilɔɔ niŋ a ndu, o lambaŋ hakioo tosaa le.+ Kɛ wana o wana lambaŋ pɛ hakioo tosaa, mɛɛ wana koŋ chi wɔ ndu le, ɔɔ o sina ndu le. 7 Chuauwaa niaa kaalaa, la chɛl mi wana o wana hui nya le. Wana lambaŋ pɛ nyɛ cho sakpo wo tosaa, mɛɛ wana sakpoo o cho ni, mɛɛ ndu bɛɛ cho sakpo yɛ. 8 Wana lambaŋ pɛ hakioo tosaa, mɛɛ o kpaaya Setana* wo bɛŋgu o cho ni. Kanifuule, Setana* bii niŋ hakioo tosaa chɔŋ o kandɔŋndo.*+ Le saboo hoo Po Mɛlɛkaa hiŋ ni le walta Setana* laŋ tɛɛmbuuwo.+
9 Wana o wana cho chua Mɛlɛkaa, o lambaŋ hakioo tosaa le,+ kanifuule kulii nduɛi cho wana koŋ niŋ. Nduyɛ o yiŋnuŋ o hakioo niŋ te, kanifuule chua Mɛlɛkaa o cho ni.+ 10 Mɛɛ naŋ sina chuauwaa Mɛlɛkaa a chuauwaa Setana* wa yɛ cho hoo ni: Wana o wana lambaŋ nyɛ cho sakpo wo tosaa le, mɛɛ o cho chua Mɛlɛka le. Nduyɛ wana kaala puaapilɛnɔ ndɔɔ le, mɛɛ o cho chua Mɛlɛka le.+ 11 Yooŋgu nya tuei o kandɔŋndo wo cho ni maa, ŋ nɔ miŋ kaaliaŋ vellaa velle.+ 12 Ŋ nɔ miŋ wa maa Keŋ te. Kanifuule, o kpaaya wana dɛnɛ wɔɔŋndo* bɛŋgu o wa ni, nduyɛ mbo dii pɔmbɔ ndɔ.+ Le yɛɛnɛ o dii yɛ ndu? Le mɛɛ kaala ndɔlaŋ laa wɔu,+ kɛ mi kaala pɔmbɔ ndɔ laŋ la wa sakpo yɛ.+
13 Puaapiliaa, kɔndɔfili bii nya le mɛɛ chieeŋndo tul nya yɛleŋ yɛ le.+ 14 Ŋ sina maa ŋ wa a vilɛiya. Kɛ suŋ suŋ niŋ, ŋ cho yoomu,+ kanifuule ŋ kaala puaapiliaa naa.+ Wana o wana kaala chaaŋ ndɔ le, mɛɛ o cho wɔ piɔmndo o ba bɛŋgu.+ 15 Wana o wana tul pɛ puaapilɛnɔ ndɔɔ leyɛ, mɛɛ wana diyaa o cho ni.+ Nduyɛ la sina maa wana o wana cho wana diyaa, o sɔla yoomu fafɛɛŋndo le.+ 16 Wu Chiisu vi le naa wo tosa ni miŋ sina nyɛ cho kaalaa wo.+ Nduyɛ naa bɛɛ, i cho naa kuee le miŋ vi le puaapiliaa naa.+ 17 Wana o wana nɔ pɛ nyɛm kiɔɔŋ o chieeŋndo hoo niŋ, nduyɛ mbo che puaapilɛnɔ ndɔɔ o bahawɛiyo niŋ, kɛ mbo kɛɛ kpooŋ le ndu tuiinɔŋndo inyiɛɛ, vɛɛ wana koŋ dimi yɛ maa o kaala Mɛlɛka?+ 18 Chuauwaa niaa kaalaa, kaala naa wa ko dimioo a sondo le.+ Kɛ ŋ nɔ miŋ chɔm ndu a nyɛ naŋ tosa wo,+ nduyɛ mbo chɛŋ naa o lakɔl di.+
19 Te ŋ tosa hei pɛ, ŋ cho sina maa o nɛi tonyaa choo naŋ cho ni. Nduyɛ ŋ cho sina o kɔlta naalaŋ niŋ maa Mɛlɛka kaala naa. 20 O yɔŋ bɛɛ mi kɔlta naalaŋ la pɛɛsa naa o isɔɔ o isɔɔ niŋ, la sina pɛŋgu maa Mɛlɛka cho o bɛndu mbo hiau kɔlta naalaŋ, nduyɛ o sina nyɛ o nyɛ fee.+ 21 Chaaŋaa niaa kaalaa, te kɔlta naalaŋ la pɛɛsa naa le, mɛɛ ŋ cho fɛɛsɛŋ le suɛi o Mɛlɛka lo.+ 22 Nduyɛ nyɛ o nyɛ naŋ nyuna ndu pɛ, kioo o ke naa ndu ni.+ Kanifuule ŋ cho sawala ndɔlaŋ biyɔɔ, nduyɛ miŋ wa nyɛ nɛŋi ndu kɔllo wo tosaa. 23 Sawa o ke naa wo cho hoo ni maa, ŋ nɔ miŋ dɔu laalaŋndo o Po ndɔɔ Chiisu Kiliti niŋ,+ nduyɛ miŋ kaaliaŋ vellaa velle,+ mɛɛ o* ke naa sawaa yɛ. 24 Le handɔɔ lechoo, wana o wana bii pɛ sawala ndɔlaŋ, o cho lo o diompilɔɔ niŋ a ndu, mi ndu bɛɛ lo o diompilɔɔ niŋ a wana koŋ.+ Nduyɛ nyina diandaa o ke naa wo tosa ni miŋ sina maa o cho o diompilɔɔ niŋ a naa.+