Ditɔnɔmii

7 “Te Chɛhowa Mɛlɛka nyaa kuɛ pɛ a nya o lɛŋnde nya nɔ le kɔlaŋ challe leŋ niŋ,+ o cho vɛlɛ kayii cho hei faŋga bɛndoo ve touwɔɔ nya lachi.+ Ndi cho ni: Hitaitiiya, Kikasaitiiya, Amɔluaitiiya,+ Kenanaitiiya, Pɛluisaitiiya, Hivaitiiya, a Chɛbusaitiiya.+ Kayii ŋɔmmɛu ve hei cho faŋga bɛndoo, nduyɛ i nɔ kpaayaa i hiou nya.+ 2 Chɛhowa Mɛlɛka nyaa cho nda nya malɔɔ o ba mi la yem nda.+ La nɔ mi la tɛɛmbuu nda kpou.+ La nɔ mi la yii kpemaa a nda le, nduyɛ la tuiinuŋ nda inyiɛɛ le.+ 3 La nɔ mi la wa challe o nɔlaŋ niŋ nya ndaa le. La ke puaa ndaa chuaa nyaa laanduaa le, nduyɛ la chua chuaa ndaa laanduaa le puaa nyaa le.+ 4 Kanifuule, a cho tosa mi chuauwaa nyaa muliŋ mɛlɛkaa cheleŋnda sooluuwo,+ okoŋ mi Chɛhowa dɔɔnuŋ tumbe a nya o kala kala, nduyɛ mbo keleŋa nya basɔɔ tɛɛ.+

5 “Kɛ nyɛ nya nɔ mi la tosa a nda wo cho hoo ni: La nɔ mi la tɛɛmbuu bandula ndala luamaala salalaŋ, mi la pesi pesi suŋgbuma nda sooluu mɛlɛkaa ndaa waŋ,+ mi la tɛɛmbuu suŋgbuma iyɔm nda simi le sooluuwo waŋ,*+ nduyɛ mi la lom piɔmaa ndaa.+ 6 Kanifuule, wanaa diandaa nya cho le Chɛhowa Mɛlɛka nyaa ni. Chɛhowa Mɛlɛka nyaa hɛli nya waŋnda o lɛŋndeŋ choo kpou tɛɛŋ, le mi la wa wanaa ndɔ, nduyɛ mi la simnuŋ nyɛm kɛŋ ndɔŋ teŋgeŋndoŋ.*+

7 “Kaala Chɛhowa chɔm nya mbo hɛli nya wo,+ o cho nuaa maa la wa faŋga bɛndoo mi la hiau waŋnda kpou le. Kanifuule, nya nyaa hiou dɔɔnaŋ a waŋnda kpou.+ 8 Kɛ le mɛɛ Chɛhowa kaala nya, nduyɛ mbo yeema loo o buŋgɛi o chuel finyaa nyaa mamaa ve choo yɛ,+ lelaŋ Chɛhowa soli nya Feloo, masaa le Ichipi o ba bɛŋgu a kpaaya ndɔ bɛndoo ni, le mbo piŋi nya o chɛleŋ niŋ.+ 9 La sina kpendekele maa Chɛhowa Mɛlɛka nyaa, Mɛlɛka tonyaa o cho ni. O cho sakpo, nduyɛ mbo lo o kpema ndɔɔ choo. Wanaa kaala ndu nduyɛ ma wa sawala ndɔlaŋ biyɔɔ wa, mbo chɔm nda kaala lo lechoo wo haaa kɔ bii a chuauwaa mamaa o chuauwaa ndaa mamaa kɔɔli.+ 10 Kɛ wanaa tul ndu leyɛ wa cho tambei sɔla,+ nduyɛ paawa ndaa cho koŋ ni. O doonuŋ niŋ tamala le wanaa tul ndu leyɛ wa nyɛpalaa tusioo choo le. O cho nda paawa nda nɔ le sɔlaa wo ke. 11 Lelaŋ la mandaŋ a sawalaŋ ndaŋ, a nyɛ o nyɛ ya dimul nya le tosaa paale hauleŋ ndeŋ, nduyɛ mi la bii laŋ.

12 “Te la hiou pɛ lachi a nilaŋ yaŋɔɔ o sawalaŋ ndaŋ, mi la diikuŋ ndaŋ, nduyɛ mi la tosa nyɛ la dimi wo, Chɛhowa Mɛlɛka nyaa cho lo o kpema ndɔɔ choo, nduyɛ mbo chɔm nya kaala lo lechoo wo, mɛɛ o chuel finyaa nyaa mamaa buŋgɛi yɛ. 13 O cho nya kaala, mbo dɔu nya sala, nduyɛ mbo tosa mi la kui. O cho nya salaa dɔwɔɔ mi la velu chuauwa tau tau,+ nduyɛ mbo dɔu tɔlɔɔla nyalaŋ sala mi la sɔla kulloŋ, muɛima sɛnɛiyaŋ, a chuɛiyaŋ.+ O cho tosa mi nauwaa nyaa a saa nyaa wa komɔɔ tau tau, o lɛŋnde o chuel finyaa nyaa mamaa buŋgɛi le nya kioo leŋ niŋ.+ 14 O cho nya salaa dɔwɔɔ, mbo hiou wana o wana.+ Wana pɔnɔ ni, wana lanɔ ni, wana o wana ve niŋ nya tɛɛŋ mbo kɛɛ chuaa nɔ le. Nduyɛ chɔluaa nyaa bɛɛ, o kɛ kɛ cho wa komɔɔ.+ 15 Chɛhowa cho naa suu o suu nya faŋa choo. Nduyɛ naala kɛ kɛ nya sina o Ichipi niŋ,+ o cho tosa la komal niŋ nya le. Kɛ wana o wana tul nya leyɛ, o cho tosa mi naala laŋ la komal nda. 16 La nɔ mi la tɛɛmbuu* wanaa Chɛhowa Mɛlɛka nyaa mal nya o ba wa kpou.+ La* nɔ mi la tuiinuŋ nda inyiɛɛ le,+ nduyɛ la nɔ mi la sooluu mɛlɛkaa ndaa le.+ Kanifuule, keŋ cho simnɔŋ yaŋɔɔleŋ le nya.+

17 “Te la dimi pɛ o kɔl niŋ aa, ‘Kaalaŋ ndaŋ la cho faŋga la hiou naa poloŋ. Vɛɛ naŋ nɔla yɛ miŋ tou nda?’+ 18 la yɔŋ isiooŋ le nda le.+ La loonuŋ nyɛ Chɛhowa Mɛlɛka nyaa tosa a Feloo, vɛlɛ a waŋnda Ichipi kpou wo.+ 19 Mi la cha yamaŋ bɛnduŋ Chɛhowa Mɛlɛka nyaa kilul nda woŋ, sɔɔŋ kɔndɔfilloŋ, a kaamaala+ o tosa a kpaaya ndɔ bɛndoo, le nya solioo loŋ ndaŋ.+ Lende Chɛhowa Mɛlɛka nyaa cho tosa a wanaa nya nɔ siooŋii ndɛi ya kpou ni.+ 20 Wanaa cho lo yoomu nduyɛ ma wa nya vioŋnɔŋndo wa bɛɛ,+ Chɛhowa Mɛlɛka nyaa cho tosa mi siooŋii bɛnduei bii nda, haaa ma chuu kpou. 21 Siooŋii bii nya le nda le, kanifuule Chɛhowa Mɛlɛka nyaa cho a nya latulu.+ Mɛlɛka nɔ kpaayaa, nduyɛ mbo tosa sɔɔŋ kɔndɔfilloŋ ndo o cho ni.+

22 “O pɔmpɔmbɔ Chɛhowa Mɛlɛka nyaa cho kaaye hei faŋa nya lachi ni.+ O cho nya chɛlɔɔ mi la tɛɛmbuu nda o lepilɛ niŋ kpe le. O cho hei tosa, le halikpeŋ visiaa biyaa cho loŋ nda kui ma wa nya yɔŋullo le. 23 Chɛhowa Mɛlɛka nyaa cho nya nda malɔɔ o ba mi la yem nda, haaa mi la tɛɛmbuu nda kpou.+ 24 O cho nya masaa ndaa malɔɔ o ba,+ mbo tosa mi diola ndalaŋ la nyum pɔli o chieeŋndo choo.+ Wana o wana nɔla niŋ mbo simul nya le,+ haaa mi la chii nda kpou.+ 25 La nɔ mi la lom mɛlɛkaa ndaa chilikɔ.+ Kaniŋ humboŋ a kooliŋ cho o mɛlɛkaa ndaa kaŋ ndoŋ, la chua muŋ le nyapila le,+ yɔŋii nyɔɔŋ muŋ simnuŋ yaŋɔɔleŋ le nya. Kanifuule, Chɛhowa Mɛlɛka nyaa tul muŋ leyɛ.+ 26 La huŋ a nyɛm nɔɔlɛiyoŋ o chiɛila nyalaŋ niŋ te, yɔŋii nya bɛɛ sɔla tambei maa nyɛm muŋ. La nɔ mi la tul muŋ leyɛ, kanifuule nyɛm nɔ le tambei sɔlaa woŋ ŋ cho ni.