Luku
15 Mi wanaa biyaa paawaa* kpou, a wanaa lahakiaa wa chuuŋgiaŋndo naa Chiisu chua le ndu nilaŋ yaŋɔɔ.+ 2 Okoŋ, mi Falisiiya a wanaa pɛɛku waŋnda sawala Mɛlɛkalaŋ nda wa nyiimu nyiimoo aa: “Poo hoo cho wanaa lahakiaa chɛlɔɔ, nduyɛ mbo dia nyɛdiaa nda ndaa.” 3 Mbo dimul nda taloo hoo aa: 4 “Te wana pilɛ nya tɛɛŋ nɔ pɛ saa 100, nduyɛ mi o pilɛ luusiaŋ ndu o ba, baa o mɛi saa 99 kɔɔli o pollo niŋ, mbo kuɛ saa luusiaŋ ndo nuuviaa haaa mbo saaluŋ ndu le?+ 5 Te o saaluŋ ndu pɛ, o chua ndu o choŋgu, o dɔɔnuŋ nyaale. 6 Te o fuuluu pɛ chiee, o veelu chaaŋaa nduaa a wanaa nda chiɛɛliaŋ nda naapilɛ, okoŋ o dimul nda aa, ‘La mala ya kpeŋjoo, kanifuule I saaluŋ saa ni ndoo luusiaŋ ndo.’+ 7 Lelaŋ, mi dimul nya, te wana hakioo o pilɛ wookuŋ pɛ,+ nyaaloo pila wa o choo choo niŋ le ndu ni, mbo hiou le ŋwaŋ 99 cho sakpo, nduyɛ a heu lɛ ba le yɔŋnda ndala wɔɔŋndaŋ malɔɔ le wa.
8 “Te o wa yɛ vɛlɛ mi wana lanɔɔ nɔ kaniŋ dulamɛiyoŋ tɔ,* kɛ mi i pilɛ luusiaŋ ndu o ba. Baa o mɛndul lambuiyo, mbo bɛɛsuu chiɛi ndɔɔ mbo lo ndi nuuviaa haaa mbo saaluŋ ndi le? 9 Nduyɛ te o saaluŋ ndi pɛ, o veelu chaaŋaa nduaa* a wanaa nda chiɛɛliaŋ nda naapilɛ, okoŋ o dimul nda aa, ‘La mala ya kpeŋjoo, kanifuule I saaluŋ kanii dulamɛi* nii ndii luusiaŋ nde.’ 10 Lelaŋ, mi dimul nya, te wana hakioo o pilɛ mal pɛ yɔŋnda ndɔla wɔɔŋndaŋ, mi maalikɛiyaa Mɛlɛkaa dɔɔnuŋ nyaale tau.”+
11 Mi Chiisu dimi aa: “Finya pilɛ ndoo nɔ puaa a ŋiɔɔŋ. 12 Okoŋ mi pɔmbɔɔ dimul finya ndɔ aa, ‘Kɛkɛ, ke ya nyɛm kiɔɔŋ ŋ nuŋ.’ Mi finya ndɔ piɔu nyɛm kɛŋ ndɔŋ nda tɛɛŋ. 13 Mɛɛ palɛi hiou i tiŋ, mi pɔmbɔɔ chua nyɛm ndɔŋ kpou mbo kuaŋnuŋ o lɛŋnde cheleŋ niŋ pɔɔli. Mbo kɔ laasiaa nyɛ o nyɛ o sɔɔŋ fondoŋ niŋ. 14 Mɛɛ o chii nyɛ o nyɛ laasiaa, mi yima bɛnduaŋ ma del o lɛŋnde leŋ niŋ kpou, nduyɛ mi pɛŋndeŋ le bii ndu. 15 Mbo kɔ holnuŋ pilachioo o pilɛ o lɛŋnde leŋ niŋ, okoŋ mbo viam ndu o chiɛi nduɛi niŋ le peuwaa nduaa mandaa.+ 16 Mɛɛ yiaaŋ ma nɛi ndu tei, mbo yeema le nyɛdiaa peuwaa kaŋ dioo, kɛ koŋ bɛɛ ndaa ke ndu le.
17 “Mɛɛ o che maa diɔmnde o wa tosaa ni, mbo dimi aa, ‘Finya nuu nɔ wanaa walla tau, nduyɛ a cho o diaa sɔlaa a cho chii le, mi wa piɔmndo nanuŋ a yiaaŋ! 18 I cho chɔnɔŋ mi kuɛ o finya nuu lo, mi kɔ dimul ndu aa: “Kɛkɛ, I tosa hakioo a Mɛlɛka vɛlɛ a num. 19 I bɛnda lɛ pɛŋ ma veelu ya maa po num te. Chua ya maa wanaa num aa walla o pilɛ.”’ 20 Okoŋ mbo chaŋ nya mbo kua o finya ndɔ lo. O lo landaŋ mi finya ndɔ cha ndu, mi nyiɛɛye bii ndu tau. Mi finya ndɔ nyaanuŋ mbo kɔ demul ndu, mbo sɔsa ndu kuuwo. 21 Okoŋ mbo dimul finya ndɔ aa, ‘Kɛkɛ, I tosa hakioo a Mɛlɛka vɛlɛ a num.+ I bɛnda lɛ pɛŋ ma veelu ya maa po num te.’ 22 Kɛ mi finya ndɔ dimul buɛiyaa nduaa aa, ‘La huŋ a doma kɛndɛ kɛndɔɔ chɔ chɔ mi la wou ndu. La wou ndu kelɛi o iso, vɛlɛ a kɔwɛilaŋ.* 23 Nduyɛ mi la hiŋ a nau fɔŋndɔ chelulɛiyo mi la dii, miŋ deŋnuŋ, okoŋ miŋ dɔɔnuŋ nyaale, 24 kanifuule po nuu hoo ndoo vi, kɛ o miiŋgu yoomu.+ Ndoo luusiaŋ, kɛ o cheŋnuŋ.’ Okoŋ ma kandu nyaaloo dɔɔnɔŋndo.
25 “A teleŋ koŋ, po ndɔ tasoo wa o chiɛi niŋ. Mɛɛ o miiŋgu chiee mbo sɔɔŋguu chiɛi ndaa ikɛi, mbo tuɛi nyɛchaa diom, nduyɛ waŋnda wa yolaŋ. 26 Okoŋ mbo veelu buɛiyo o pilɛ, mbo nyuna ndu le nyɛ wa yɔŋnɔŋndo wo. 27 Mi buɛiyo dimul ndu aa, ‘Pɔmbɔ num hiŋ ni, mi finya num dii nau fɔŋndɔ chelulɛiyo le mɛɛ o miiŋgu nanuŋ kɛndiaa yɛ.’ 28 Kɛ mbo duaunuŋ tumbe. Mbo kɛɛ pɛŋ le luɛiyɔɔ chiɛiniŋ. Okoŋ mi finya ndɔ fula mbo huŋ kandu ndu dɛɛniaa. 29 Mbo dimul finya ndɔ aa, ‘Wɔsilaŋ ndaŋ kpou I cho saŋgaa le num, paale pilɛ bɛɛ I kɛɛ wɔ num diikɔŋ te. A koŋ kpou, hali chuiŋ chuaa a ke wɔ ya lepilɛ bɛɛ le mi de naa chaaŋaa niaa le. 30 Kɛ dimioo nuaa mi po num chii hoo nyɛm kɛŋ numndoŋ laasiaa waŋ laanduaa suundɛiya kɔɔli wo huŋ, ma dii nau fɔŋndɔ chelulɛiyo le ndu.’ 31 Mi finya ndɔ dimul ndu aa, ‘Po nuu, naa num cho latulu le lɔɔlɔɔ ni. Nduyɛ nyɛ o nyɛ ya nɔ, num nɔ ni. 32 Kɛ mɛɛ miŋ dɔɔnuŋ nyaale, kanifuule pɔmbɔ num ndoo vi, kɛ o miiŋgu yoomu. Ndoo luusiaŋ, kɛ o cheŋnuŋ.’”